Х.ОЮУНБОЛД
Далайн эрэгт өнгөрүүлсэн хүүхэд нас
Тэйлор Алисон Свифт 1989 оны арванхоёрдугаар сарын 13-нд Пенсалвини мужийн Ридинг хотод төржээ. Түүний нэрийг дуучин Жеймс Тэйлороос авч өгсөн аж. Свифт Аустин гэдэг ахтай. Түүний аав Скотт Кингслей Свифт Америкийн Ланч Мерилл банкны санхүүгийн зөвлөхөөр ажилладаг, гурван үе дамжсан банкны захирлын гэр бүлээс гаралтай,Пенсалвини мужид өссөн байна. Харин дуучин бүсгүйн ээж Андреа Гарднер Свифт хөрөнгө оруулалтын нийгэмлэгт маркетингийн гүйцэтгэх захирлаар ажиллаж байжээ. Дуучин Тэйлор Свифт Кумру хотын шинэ жилийн модны эдлэнд өссөн байна. Тэрээр католик гэлэнмаа нарын хичээл заадаг Альверниа Монтессори сургуульд Виндскрофт хувийн сургуульд шилжих хүртлээ суралцжээ. Мөн ахтайгаа зун бүр амралтаараа библийн сургуульд суралцсан аж. Дараа нь гэр бүлийнхэнтэйгээ Вайомисингэд түрээсийн байранд амьдрах болсон байна. Мөн дунд болон ахлах сургуульд суралцсан бөгөөд зуныхаа амралтаар аав ээжийнхээ Нью Жерси дэх далайн хажууд байдаг гэрт өнгөрүүлдэг байв. Тэрээр энэ газарт миний хүүхэд насны ихэнх дурсамж бий болсон гэж тодорхойлсон байдаг. Есөн настайдаа хөгжмийн театрыг сонирхож эхэлсэн бөгөөд Беркийн театрын олон бүтээлд тогложээ. Түүнээс гадна заримдаа дуу болон жүжиг тоглохоор Бродвейн театр руу явдаг байсан гэнэ. Харин Шайна Твайнийн нөлөөгөөр Свифт контри хөгжмийг сонирхож эхэлснээр амьдарч байсан хотынхоо караоке, дуу хөгжмийн наадамд тоглодог болсон аж. Түүнээс гадна олон удаа оролцож бүтэлгүйтсний дараа орон нутгийн авьяастнуудын тэмцээнд түрүүлсэн нь Штраусстоун хотод очих үеэрээ хөгжимчин Чарли Даниелсийн тоглолтын нээлтэд жүжиглэх боломж олгосон байна.
Тэйлор Свифтийн анхны амжилт
Тэйлор Свифт 2006 оны аравдугаар сарын 24-нд цомгоо гаргахдаа нэрээ нууцалсан байна. Свифт сургуулийнхаа бэлтгэл ангид сурч байхдаа анхныхаа цомогт багтсан дуунуудын үгийг бичжээ. Түүнээс гадна цомог гаргахын тулд олон продюссертэй ажиллаж үзсэн аж. Гэвч Натан Чампанийг продюссерээр сонгосон байна. Энэ цомог нь кантри, поп стилийн дуутай бөгөөд Свифт романтик харилцааг ажигласнаар романтик дуугаа бичсэн аж. Харин 2007 оны зургадугаар сарын 27-нд гаргасан видео нь санал хураалтаар Топ 20 дууг шалгаруулдаг жагсаалтыг 30 долоо хоног тэргүүлсэн амжилт тогтоож байжээ. Тэрээр өнгөрсөн долдугаар сарын 23-нд “The Archer” цомгоо гаргаснаас гадна “Ме” хэмээх долоо дахь цомогт багтсан дуу нь гарснаасаа хойш гурван өдрийн дараа Билбоардын шилдэг 100 дууны жагсаалтыг тэргүүлсэн байна.
Сонирхуулахад Тэйлор Свифт дууныхаа үгийг хүний амьдралаас санаа авч бичдэг байна. Мөн түүнийг дууны зохиолчийн хувьд Нашвиллийн дууны үг зохиогчдын нийгэмлэг, дууны үг зохиогчдын алдрын танхим хүндэтгэдэг аж. Тэрээр Грэмми дуу хөгжмийн наадмын 10, Эмми наадмаас нэг, Билбоард мюзик авардсаас 22, Америкийн мюзик авардсаас 29, Бритийн шагнал, МTV дуу хөгжмийн сувгаас зургаа, Кантри дуу хөгжмийн нийгэмлэг авардсаас 11, Алтан бөмбөрцгөөс хоёр удаа шагнал авч байжээ. Мөн 2015 он хүртэл 50 сая цомог зарагдаж, түүний дуунуудыг цахим хэлбэрээр 150 сая удаа татаж авсан түүнийг дэлхийн хамгийн их цомог нь зарагдсан дуучин болсон байна. Тэйлор Свифт дуучнаас гадна 2009 онд Гэмт хэргийн талбар дахь судалгаа телевизийн олон ангит цуврал, 2010 онд Валентинийн өдөр инээдмийн кинонд тоглож, 2012 онд “Лоракс” хүүхэлдэйн киноны Аудрейд дуу оруулжээ. Түүнээс гадна сайн үйлсийн аянг дэмжиж урлагийн боловсрол, хүүхдийн боловсрол, байгалийн гамшгийн үеэр тусламж үзүүлдэг сан, хүний эрхийн төлөө болон өвчтэй хүүхдүүдийн эрх ашгийн төлөө ажилладаг байгууллагуудыг дэмждэг аж. Мөн Билбоард сэтгүүлээс түүнийг дуу хөгжмийн ертөнцөд үзүүлсэн нөлөө, худалдааны салбар дахь их амжилтыг харгалзан үзэж энэ жил “Зууны эмэгтэйгээр” нэрлэжээ. Харин Американ мюзик авардсаас 2019 оны уран бүтээлч болохыг нь хүлээн зөвшөөрсөн байна.
Дуучны тухай сонирхолтой баримтууд
-Тэйлор Свифт хоёр жил дараалан Форбесийн жагсаалтыг 185 сая ам.долларын ашиг олсон дуучнаар тодорсон байна.
-Попын хаан Майкл Жексоны амжилтыг Америкийн дуу хөгжмийн наадмаас зургаан шагнал хүртсэнээр эвдэж энэ наадмын хамгийн их шагнал авсан дуучин болжээ.
-2017 онд гаргасан “Look What You Made Me Do” хэмээх аймшгийн сэдэвт клиптээ зомбигийн дүр бүтээсэн байна.
-Түүний амьдралд 13-ын тоо их утга билэгддэг байна. Тэрээр 13-нд төрсөн. 13-ны баасан гаригт 30 нас хүрчээ. Мөн анхны алтан цомгоо 13 дахь долоо хоногтоо авч байсан. Түүнээс гадна ямар нэг шагнал авах бүрт 13 дугаартай суудалд суусан байдаг гэж ярьжээ. Ихэвчлэн 13-ын тоо ирэхээр миний амьдралд ямар нэгэн сайхан юм болдог гэв. Тэрээр үргэлж тоглолт болгоныхоо өмнө нэгийн тоо зурдаг байна.
-2009 онд гарсан телевизийн 16 ангитай, есөн цуврал “Лас Вегас” кинонд Халей Жонесийн дүрд тоглосон байдаг.
-Шарсан төмс шиг хувцасласан Тэйлор Свифт “You Need To Calm Down” клипийн үеэр хавчуургатай талхны хувцастай Кэти Перритэй найзалсан байна.
-Тэрээр мууранд дуртай бөгөөд Оливиа, Мередит, Бенжамин гэсэн мууртай аж.
-“People” сэтгүүлээс түүнийг энэ жилийн хүчирхэг дөрвөн эмэгтэйн нэгээр нэрлэжээ.
-АНУ-ын поп дуучны гаргасан хоёр дахь “Fearless” цомгоороо Грэммийн дуу хөгжмийн наадмаас шагнал авснаас гадна олон амжилтыг эвдсэн байна. Тэрээр долоон дууны цомогтой бөгөөд саяхан “Lover” цомгоо гаргажээ.
-Тэйлор Свифт 75 мянган хүний сонгосноор 2012 оны хамгийн халуухан 100 эмэгтэйг танилцуулдаг жагсаалтад багтаж байсан аж. Харин 30 настай түүнийг хоёр дахь удаагаа энэ жагсаалтад багтааснаар олон өрсөлдөгчөө ялсан байна.
Эх сурвалж: www.polit.mn
