Би 30 настай, 4 настай хүүхэдтэй, мэдлэг боловсролтой, боломжийн цалинтай ажилтай, сайхан хамт олонтой. Мөн нилээн шударга шулуухан зантай, архи тамхи хэрэглэдэггүй, энэ яваа насандаа ганц л эр хүнд өврөө нээсэн нь хайртай хань, үрийн минь аав, харин одоо бол салсан нөхөр, хүүхдийн биологийн эцэг.
Бид анхны харцаар дурлаад л бие биенийгээ ухаангүй хайрлаад л дундаасаа үр хүүхэдтэй болсон. Жирэмсэн болсон мөчөөс хүүхэд төрөөд 3 сар хүртэл үлгэрийн юм шиг л ямар нэг асуудалгүй сайхан л байсан. Хүүхдээ 3 сартайгаас бидний харилцаа хөндийрч тэр өөр эмэгтэйчүүдтэй хоблогдож эхэлсэн. Би ч эхнэрээсээ өөр эмэгтэй хүн сонирходоггүй эр хүн гэж байдаггүй гэдгийг сайн мэдэх болохоор яг л гардчихаагүй бол амьдралаа үрчихгүй байлгүй, шууд л салах дээрээ тулаад яах вэ гээд л бага багаар анхааруулаад л өөрт нь ойлгуулаад л байсан. Сүүлдээ ч найз хүүхэнтэй минь хамт шоудсныг, ажлынхаа замбараагүй явдалтай хүүхэнтэй холбогдоод салж хагацаж чадахгүй болсныг мэдэж авсан.
Тэр хүүхэн нөхрөөс минь хэд дүү боловч үнэхээр айхтар хүүхэн байсан. 3-лаа хамт унтаж байхад шөнө болгон над руу залгаад л би нөхөрт чинь ухаангүй хайртай, чи салчихаач, хайргүй хүн өвөртөлж хонох сайхан байна уу, та хоёрын дундаас гарсан хүүхэд чинь яг нөхрийнх чинь мөн юм уу, энээ тэрээ гээд доромжилж гарна. Ид нойрондоо ийм зүйл сонссон хүн яаж сайхан байхав дээ. Би ядаж бүтэн нойртой унтаж баймаар байна, эр хүн гэр бүлээсээ гадуурх ор хөнжлийнхөө асуудлыг эхнэр хүүхэддээ мэдэгдэхгүй зохицуулдаг байх хэрэгтэй, би чамайг хардаж мөрдөөгүй байхад энэ асуудлаа зохицуулчихаад эхнэр хүүхдээ гэсэн сэтгэл байвал бид хүлээж авна гээд явуулсан. Над шиг ийм тайван ч юм шиг, тэнэг ч юм шиг эхнэр ховор л байх. Тэр ирээгүй, тэр чигтээ явсан. Хүүхэд минь нэг эмнэлгээс нөгөө эмнэлэг, нэг бариачаас нөгөө бариач, нэг өвчингөөс нөгөө өвчин гээд маш хэцүү байсан.
Энэ бүхэнд хайртай хань, хүүхдийн минь аав хажууд минь байгаагүй, хүүхэд нь сэхээнд байна гэхэд очиж чадахгүй гэж хэлээд утсаа тасалсан… тэр үед түүнд хичнээн их гомдож шаналсан, цөхөрснийг үгээр илэрхийлэх ч арга алга. Одоо тэр үеэ бодохоор хоолой минь зангирдаг. Тэрний унтаж хэвтсэн хүүхэн түүгээр нь дуусаагүй, бас нэг охин утасдаад жирэмсэн болсноо надад хэлсэн, аборт хийлгэхгүй, чиний хүүхдийг жорлонд хийгээд усыг нь татвал яах уу ч гэх шиг. Би жирэмслүүлчихсэн юм шиг, би тэр хүний ээж шиг, уул нь албан ёсны эхнэр нь, дундаасаа үр хүүхэд төрүүлсэн гэр бүл шүү дээ. Тэр охинд тусдаа байгаад удаж байна, энэ маягаар надтай нөхрийн минь талаар ярьсан эмэгтэй чи эхнийх нь биш, бас төгсгөлийнх нь биш гэдэгт итгэлтэй байна, ухаантайхан шиг байгаад өөрийгөө бодоод шийдвэрээ гаргаарай, эгч нь ганцаараа хүүхэд өсгөх зовлонг мэднэ, би та хоёрыг танилцуулаагүй болохоор насанд хүрсэн хүмүүс өөрсдөө учраа ол гэж хэлсэн. Салах өргөдөл шүүхт өгөх гэхээр хүүхдээ бодоод, эцэггүй гэж энд тэнд адлуулах вий, эцэг шигээ гэр бүлийн хайрыг дутуу мэдэрч бүү өсөөсэй гэж бодож байгаад түүний хүсэлтээр шүүхээр орж гэр бүлээ цуцлуулсан.
Түүнээс хойш хүүхэд минь өвчин, эмнэлэг гэхгүй бид хоёр аз жаргалтай сайхан л амьдарч байна. Энэ хугацаанд эргүүлэх, ээрэх эрчүүд байсан хэдий ч эр хүнд итгэх итгэлгүй болчихжээ. Энэний зорилго юу бол, нөхөртөө хаягдсан ганц унтаад сална л гэсэн бодолтой байх гэж бодоод…Нөгөө талаар нөхөртөө хайртай хэвээрээ, түүний араас үхэн хатан, улайм цайж хэрүүл уруул хийж гүйгээгүй ч гэсэн түүнийгээ хайрласаар, хүндэлсээр…
Гэхдээ өөртөө бол дахиж эргэж ирвэл нэгэнт үх хүүхдээ үхэх гэж байхад ирээгүй хүнийг хүлээж авахгүй гэж шийдвэр гаргасан. Түүндээ ч тууштай байгаа. Эргүүлдэг эрчүүд ихэнх нь гэр бүлтэй, гэр бүлээсээ түр тусдаа байгаа гэх мэт асуудалтай. Би өөрөө эр нөхөр нь эхнэрээ хуурдаг эмэгтэй хүний зовлонг, үр хүүхдийн өнчрөлийг нүдээрээ харж байгаа болохоор тэдэнд нүгэл хийж өөрийнхөө ганцхан шөнийн жаргалын төлөө бусдыг шаналгахыг, зовоохыг хүсээгүй. Ийм зовлон шаналалтай гэр бүл, эмэгтэйчүүд, хагас дутуу хайранд өсч эцэг эхийнхээ хэн нэгнийг үгүйлж байгаа бяцхан хүүхдүүд бид хоёроор л дуусаасай гэж хүсдэг.
Хэний ч өмнө нүгэл үйлдээгүй болохоор би бяцхан жаалтайгаа сайхан амьдрана, бид хоёрын хэн нэгнийг үгүйлсэн шаналал эцэс болно гэж итгэдэг. Будда ч бай, Есүс ч бай, Аллах тэнгэр ч бай гэм хийгээгүй нэгнийг жаргааж, гэмтнийг хэзээ нэг цагт гэсгээнэ гэдэгт итгэлтэй байна. Эрчүүд минь ээ эхнэрээ, үр хүүхдээ битгий өнчхүүлээрэй. Өөрсдийнхөө хоромхон зуурын жаргалын төлөө нэгэн цагт хайрлаж, бүхнийг зориулахад бэлэн гэж амалж байсан тэр хүнээ битгий гомдоогоорой, шаналгаарай. АЗ ЖАРГАЛТАЙ АМЬДРАЛ ГЭЖ БАЙДАГГҮЙ, АЗ ЖАРГАЛТАЙ ХОРОМ. АЗ ЖАРГАЛТАЙ МӨЧ гэж байдаг. Олон олон аз жаргалтай мөчүүдийг хайртай эхнэртээ, хайртай хүүдээ, охиндоо үлдээгээрэй…Үүнийг зав гаргаж уншсанд бүхэнд аз жаргал хүсье…
