Чамд бишгүй тунирхлаа би
Чин үгээ хэлэхгүй байж
Чамайг ханатлаа зовоолоо би
Ганганаж явья хоёулаа
Нуурын хос хун шиг
Ижилсэж явья хоёулаа.
Нарт дэлхийд хүн билээ
Наддаа чи наран билээ
Ертөнцөд ер ганц түүнийг
Ерөөлөөр надад заяасан билээ
Гарт чинь түшиг болж
Гэрт чинь чимэг больё
Нэрэнд чинь нэмэр болж
Нэгэн биед чинь хань больё
Хөдөлмөр амьдрал хоёрт
Хүний зэрэгтэй явья
Хүний хоёрхон үр шиг
Эвтэй сайхан явья
Сэтгэлийн чинь тавгүй үед
Дэмжих нөхөр чинь больё
Итгэлийн чинь саарах үед
Дуудах хань чинь больё
Буруу болоод гутарвал
Уруу унагахгүйг хичээе
Онгироод нисэхэд хүрвэл
Ойчиход чинь түшиж явья
Өвдөөд зовохын цагт чинь
Эдгээж сувилж байя
Өвчний чинь хагасыг авж
Үхэхээс буцахгүй байя
Нугын 2 ангир шиг
Ганганаж явья хоёулаа
Нуурын хос хун шиг
Ижилсэж явья хоёулаа.
Хайртай билээ гэж даврахгүй
Хартай билээ гэж өмчлөхгүй
Харамч билээ гэж нуухгүй
Өглөгч билээ гэж үрэхгүй
Ахан дүүгий чинь ад үзэхгүй
Анд нөхдий чинь алаг үзэхгүй
Алсын албанд явсан ч
Авгайн журмыг эвдэхгүй
Зөөлөн гээд боол болохгүй
Хатуу гээд ноёлж байхгүй
Хоосон гээд чамлахгүй
Баян болно гээд шунахгүй
Сайн үйлсийг чинь сэтгэлээрээ дэмжиж
Сайхан биеийг чинь халамжаараа тэтгэж
Сэтгэл санаагий чинь түвшилж
Итгэл баяраар дүүрэн байя
Хүүхэд багачуудаа өсгөж
Хөлийг нь дөрөөнд хүргэе
Хөвчийн буга согоо шиг
Сэргэлэн цовоо явья
Нугын 2 ангир шиг
Ганганаж явья хоёулаа
Нуурын хос хун шиг
Ижилсэж явья хоёулаа.
Чамд муу юм гэж байхгүй
Чамд муухай юм гэж үгүй
Чамд дутуу юм гэж байхгүй
Чамд илүү юм гэж байхгүй
Хүний мөс өвч бүрдсэн
Арван хуруу тэгш цогцолсон
Аавын хөвгүүдийн нэг билээ
Амьдын жаргал өгөх нөхөр билээ
Чамд сайн гэгдвэл шагнал тэрээ
Чамд сайхан гэгдвэл жаргал тэрээ
Чиний дэргэд байвал хот хөдөө ч яахав
Чамтай хамт байвал говь хангай ч яахав
Баярлах гомдох цагтаа
Баахан хэсэг уйлах байх
Бачимдаж сандрах үедээ
Базаахгүй үг ч хэлэх байх
Ухаан санаагаа зарж
Уужим талбиун бодож байя
Харилцан буулт хийж
Хагарж эвдрэхгүй явья
Янаг ихэдвэл тэнэг ихэднэ гэдэг
Цэнгэл хэтэрвэл жаргал холдоно гэдэг
Ухаангүй хайртай билээ гэж
Учиргүй мунхаглавал сургаарай
Уйдаад эхэлбэл уурлах хэрэггүй
Учирлаад сайхан яриарай!
Цээртэй гэж бодолгүй
Тээртэй болбол хэлээрэй!
Татаад авах сэтгэл нь хэцүү ч
Холдоод явах зориг нь бий
Эр хүний нандин хайраар
Энхрийлүүлж явсан гэж бодьё
Энэ насны зурвасхан заяа
Эрхэм жаргалын дээд гэж саная
Чамаар бишгүй гуйлгасан
Чамд бишгүй тунирхасан
Чин үгээ хэлэхгүй байж
Чамайг ханатлаа зовоосон
Хоёр биендээ итгэлтэй байж
Хорвоогийн бартааг туулья
Хөрст дэлхийн хуудсан дээр
Хос мөр бичиж явья
Нугын 2 ангир шиг
Ганганаж явья хоёулаа
Нуурын хос хун шиг
Ижилсэж явья хоёулаа.