Монголын сайхан бүсгүй шалгаруулах тэмцээн тэртээ 90-ээд оны үед анх зохион байгуулагдаж байсан цагаас хойш өдгөө 23 дахь удаагийн “Miss Mongolia” саяхан Улаанбаатар хотод болж өнгөрсөн билээ. Цагийг эзэлсэн сайхан бүсгүйчүүд манай оронд бишгүй л олон бий. Гэвч дэлхий даяар даяарчлагдаж буй энэ цаг үед үзэсгэлэн гоо бүсгүйчүүдийг шалгаруулдаг уламжлал нэгэнт бий болсоор удаж байна. Энэ жилийн “Miss Mongolia” тэмцээний дэд байрын шагналт, “Оюунлаг мисс” өргөмжлөлт Амармэндийн Уянгыг БНСУ руу суралцахаар явах гэж байхад нь уулзаж цөөн хэдэн асуултад хариу авсанаа толилуулъя.
– Юуны өмнө танд энэ жилийн “Miss Mongolia” тэмцээний дэд байрын шагнал хүртсэнд баяр хүргэе! Манай уншигчдад өөрийгөө товч танилцуулна уу?
– Баярлалаа. Би 1989 онд Улаанбаатар хотод төрсөн. Тэгээд бусад хүүхдүүдийн нэгэн адил арван жилийн 47 дугаар дунд сургуулийг 2007 онд дүүргэж, дараа жил нь Солонгосын Доксонг их сургуульд Олон улсын худалдааны мэргэжлээр суралцах болсон. Энэ жил дөрөвдүгээр курст сурч байна.
– Гэр бүлийнхэн тань миссийн тэмцээнд оролцохыг хэрхэн хүлээж авсан бэ?
– Би аав, ээж, дүүгийн хамт амьдардаг. Аав маань Олон улсын худалдааны компанид, ээж Сарантуяа Хөдөлмөр зуучлалын товчоонд ажилладаг. Нэг дүүтэй. Манай гэр бүлийнхэн миний саналыг тун хүндэтгэлтэй хүлээж авсан. Өнгөрсөн жил би “Miss Mongolia”-д оролцож байсан ч сургуулийн зүгээс чөлөө олгоогүй тул тэмцээнээ дундаас нь орхиход хүрсэн юм. Тэгээд энэ жил заавал ч үгүй орно гэж төлөвлөж байгаад сургуулиасаа чөлөө авч энэхүү тэмцээнд оролцлоо.
– Энэ жилийн тэмцээнд хичнээн бүсгүй оролцсон бэ?
– Энэ жил 100 гаруй бүсгүй шалгаруулалтад орж, үүнээс 16 нь сүүлийн шатанд шалгарсан. Тэмцээний хувьд ярих юмгүй шударга болсон.
– Өөрийг тань талбайн теннисээр хичээллэдэг гэж сонссон юм байна?
– Тийм ээ. Би арван жилд байхдаа талбайн теннисээр хоёр жил орчим хичээллэсэн. Манай аав мөн теннисээр хичээллэдэг байсан нь надад сайхан санагдаж, улмаар “Цагийн эрч хүч” төвийн багш, дасгалжуулагч О.Алтанхуягийн удирдлаган дор сурч байсан. Сая зуны амралтаар эх нутагтаа амарч байхдаа мөн л багш дээрээ очиж бэлтгэл, сургууль хийлээ. Ер нь ямар ч хүн багаасаа спортоор хичээллэж, эрүүл мэнддээ анхаарал тавьж байж бусад ажил төрөл, амьдрал дээр ч мөн амжилт гаргадаг гэж би боддог. Талбайн теннисний хувьд бүхий л насны хүмүүс хичээллэхэд тохиромжтой. Бие бялдрын зөв хөгжлийг олгодог маш сайхан спорт гэж би ойлгодог. Солонгост хичээлээс бусад чөлөөт цагтаа би ном уншиж, олон орны хэл, соёлыг сонирхон судлахын сацуу талбайн теннисээрээ хичээллэдэг.
– Ямар учраас Солонгос улсыг сонгож суралцах болсон юм бэ? Гадаадад сурч, амьдарч байгаа манай загвар өмсөгчид аливаа загварын шоу, тэмцээнд оролцох нь цөөнгүй байдаг. Таны хувьд тэнд сурч байхдаа загварын шоунд оролцож байсан тухай сонссон юм байна?
– Манай аав Солонгост ажиллаж, амьдарч байхдаа судалгааны ажил хийдэг байсан. Түүний хэлж зөвлөснөөр би тус улсад суралцах болсон. Солонгосын сургалтын чанар чансаа нэлээд өндөр юм билээ. Миний хувьд сүүлийн нэг жилд хэд хэдэн загварын шоунд оролцож байсан. Гэвч эцсийн зорилго бол сургуулиа амжилттай төгсч Монголдоо ирээд Олон улсын худалдааны төв байгуулах хүсэл мөрөөдлийг дотроо тээж явдаг.
– Үе үеийн миссүүдийн дотор хүмүүнлэгийн үйл ажиллагаа эрхэлж байсан цөөн боловч бүсгүйчүүд бий. Харамсалтай нь, тэд цагийн эрхээр хүний хань болж, олон нийтийн ажлаасаа хөндийрдөг бололтой. Энэ талаар та юу гэж бодож байна?
– Өнгөрсөн зургаадугаар сард би “Дэлхийн инээмсэглэл” нэртэй Төрийн бус байгууллага байгуулан үйл ажиллагаагаа явуулж эхлээд байна. Манай байгууллагын гол зорилго бол эмзэг бүлгийн хүүхдүүд, асрамжийн газар хүмүүжиж буй эцэг, эхгүй хүүхдүүдэд туслахад оршино. Энэ хичээлийн шинэ жил эхлэхээс өмнө асрамжийн газрын 23 хүүхдэд хувиасаа хичээлийн хэрэгсэл бэлэглэсэн. Мөн түүнчлэн жил бүр эрүү, нүүрний эмгэгтэй нэг хүүхдийг Солонгос улсад үнэ төлбөргүй эмчлүүлэх төлөвлөгөө гарган ажиллаж байна. Солонгосоос эмч ирж эмчлэх хүүхдээ сонгон авч явж эмчлэх юм. Эхнийх нь хүүхэд ирэх нэгдүгээр сараас явах байх. Өнөөдөр Монголд 20-30 мянган хүүхэд тутамд эрүү, нүүрний эмгэгтэй нэг хүүхэд байна. Тэр бүх өвчин, эмгэгтэй хүүхдүүдэд чин сэтгэлээсээ туслахыг хүсч байна. Гэвч боломж бололцоо гэдэг хязгаарлагдмал байдаг тул ямар ч байсан өөрийнхөө хэмжээнд чадах ядахаараа л тусалж дэмжинэ гэж бодож байна. Солонгос хэл сурснаар тус улсын хүмүүнлэгийн байгууллагууд болон эмнэлгүүдтэй холбоо тогтооход ядаж хэл усны хувьд бэрхшээл гарахгүй нэг талаасаа амар юм. Тэгээд ч монгол хүн л болсон хойно өвчтэй, өнчин өрөөсөн хүүхдүүдийн зовлонг аль болох зөв талаас нь ойлгуулж, эмчилгээнд хамруулахын төлөө ажиллана гэж бодож байна.
– Хүн бүр ганцхан тохиох амьдралаа аз жаргалтай, инээд баяслаар дүүрэн, эрүүл саруул туулахыг хүсдэг. Хүний нүүрний гоо сайхан гэдэг бол юу юунаас чухал байдаг. Тиймээс хүмүүнлэгийн элч болж эрүү, нүүрний эмгэгтэй олон арван хүүхдүүдэд сайн сайхан амьдрал бэлэглэхээр сэтгэл шулуудсан таны цаашдын ажил, амьдралд хамгийн сайн сайхан бүхнийг хүсэн ерөөе!
– Баярлалаа. Миний өнөөдөр миссийн тэмцээнд оролцож дэд байрын шагнал хүртсэн нь бол нэг хэрэг. Харин Монголын тэр олон эмгэгтэй хүүхдүүдэд туслах нь ганцхан хүний хийж чадах ажил биш. Тиймээс сайн санаат хүн бүрийг чадах ядахаараа ирээдүйдээ хөрөнгө оруулалт хийж, хүмүүнлэгийн үйлст өгөөмөр гараа сунгаж хамтран ажиллахыг хүсч байна.
Ярилцсан Г.Амар (www.wikimon.mn)
