Хүүхэд өвдөхөд аав ээжийн мөрдөх 10 зарчим юу вэ. Дагаж мөрдөөрэй эцэг эхчүүд ээ.
1.Эвтэй бол хүчтэй.
Хүүхэд өвдөхөд хэний ч буруу бай энэ үед ээж аав нь хоорондоо эвтэй байх нь хамгаас чухал. Мэдээж хэн ч хүүхдээ өвчин тусгачихая, гэмтээчихье гэж хүсэхгүй шүү дээ. Хүүхэд өвдөхөд ээж аавд нь л хэн бүхнээс илүү хэцүү байдаг. Өмнөөс нь өвдчих юмсан гэж өдөр шөнөгүй боддог юм шүү. Тийм учраас энэ үед бие биедээ дэм болж, эвтэй байх нь хүнд байдлыг арай дээрдүүлдэг санагдсан.
2. Өнгөрсөн борооны хойноос цув нөмрөх хэрэггүй.
Хэний ч буруу байсан одоо нэгэнт өвдчихсөн, гэмтчихсэн бол болсон явдлын тухай эргэж сөхөх хэрэггүй. Харин яаж эдгээх вэ, буцаад хэвийн байдалд нь яаж хүргэх вэ гэдэг талаар л бодож хүүхдээ сайн асрах хэрэгтэй.
3. Өвдөж байж хүн болно.
Хатуу ч гэлээ ингээд хэлэхээс өөр арга байсангүй. Хүн л болсон хойно өвдөнө бэртэнэ гэмтэнэ. Гэхдээ тэгэх л ёстой юм чинь гээд хүнд өвтгөж гэмтээж болохгүй л дээ. Өвдсөн бол өвдчихлөө гээд шаналаад байх хэрэггүй. Дахиж ингэж өвтгөж болохгүй юм байна гэдэгт бид суралцаж байгаа юм шүү.
4. Бүх зүйл түр зуурынх
Өвчин ирсэн шигээ эдгэж л таараа. Тийм учраас жаахан л хүлээ. Эдгээр өдрүүд хэцүү байгаа ч удахгүй бяцхан үр нь инээгээд гүйх өдөр ирнэ шүү.
5. Бурууг бусдаас хайх хэрэггүй.
Хүүхэд өвдөхөөр угаасаа сэтгэл санаа тавгүй байдаг болохоор хэн нэгэнд буруу өгмөөр санагдаад байдаг. Гэвч хэн нэгэнд буруу өглөө гээд юу ч дээрдэхгүй. Тэрний буруу энэний буруу гэж найз нөхөддөө, аав ээждээ ч ярих хэрэггүй. Ярьлаа гээд та л дахиж стрессдэнэ, найз нөхөд гэрийнхэн чинь элдэв янзын юм ярьж нэрмээс болно уу гэхээс хүүхэд чинь эдгэрчих юм биш шүү.
6. Заримдаа зүгээр л чимээгүй байхад болно.
Хүүхэд өвдөхөөр хүмүүс нэг зүйлийг байнга асуудаг. Яаж байгаад тэгчихвээ? Яагаад ингэчихвээ гэх мэт. Иймэрхүү үед зүгээр хариулах хэрэггүй. Чимээгүй байхад л болно. Хариулах тусам бас л стрессдэнэ.
Мэдээж санаатайгаар тэгж өвтгөнө гэж байх биш тэртээ тэргүй хэцүү байхад ингэж асуугаад байхаар бас их хэцүү санагддаг юм билээ. Тэгэхээр таны мэддэг хэн нэгний хүүхэд нь өвдсөн гэвэл сайн эдгээж аваарай, ээж нь өөрөө хүчтэй байгаарай л гэж хэлж байгаарай. Яачив ийчив салгасан юм бэ, болгоомжгүй гэдэг нь гэх мэт үгс битгий хэлээрэй.
7. Аавын тусламжийн оргил үе
Энэ үед хамгийн их туслах хүн аав нар. Хүүхдийн бие өвдсөн үед хүүхдэд тавгүй байдаг болохоор өдөржин ээжийгээ ороож тэврүүлэх гээд байдаг. Өдөржин тэвэрч асарсан ээж мэдээж зүгээр хүүхдээ харсанаас илүү ядарсан байгаа. Тэгэхээр энэ үед нь аав нарын тусламж илүү их хэрэгтэй байдаг шүү. Эхнэрээ амрааж унтуулж, хүүхдээ сайн авч туслах хэрэгтэй. Хүүхэд өвдсөн байхад эхнэр чинь ядарчихвал за тэгээд үнэхээр хэцүүгийн хэцүү зүйл чинь тэр л болно шүү.
8. Ээж тайван байхад бүх зүйл сайхан болно.
Ээжийн сэтгэл санаа ер нь энэ амьдралыг удирдан авч явдаг гэхэд буруудахгүй шүү хэхэ. Хамгийн гол нь ээж та тайван байж гэмээнэ маамаа нараа сайн асарч, хурдан эдгээж авна. Ээж нар тайван биш байвал өвдсөн хүүхэдтэйгээ нийлээд бүр хачин юм болно. Тэгэхээр ээжүүд минь та нар минь л сайн сайхныг бодож, хүчтэй байх хэрэгтэй шүү.
9. Өвдөх эрхгүй өдрүүд
Хүүхэд өвдсөн энэ өдрүүдэд ээж аавууд өөрсдөө өвдөж хэрхэвч болохгүй. Ядарч болохгүй. Ядарвал дархлаа муудаад өвдчих магадлалтай. Хүүхдээ сайн асрахын тулд өөрсдөө эрч хүчтэй, эрүүл саруул байх нь чухал шүү.
10. Түр завсарлага
Хүүхэд өвдсөн энэ өдрүүдэд аав ээжүүд ялангуяа ажил хийж байгаа хэн нэг нь аливаа арга хэмжээ, баяр цэнгээн гээд ажлаас бусад бүх зүйлээсээ түр завсарлага авах хэрэгтэй. Байнга ийм байхгүй учраас эдгээр өдрүүдэд л хүүхэддээ 100 хувь анхаарч, эхнэртээ туслаж хүнд өдрүүдийн ард хамтдаа, гэр бүлээрээ гарах хэрэгтэй.
