Энэ бүхэн энгийн нэгэн хошигнолоос эхэлжээ. Их Британийн Ланкашир хошууны фермийн эзэн Дот Маккарти хөл хорионы үеэр ямаануудаа видео хуралд оруулах боломжтой гэж хэлснээр 50 мянган фунт стерлингийн орлого олсон байна.
“Кронкшоу Фолд фермийн Лола ямаа болон бусад амьтадтай маш олон хүн дүрсээр холбогдохыг хүссэн” хэмээн Дот хэлжээ. Их хэмжээний мөнгө олсноор тэрбээр фермээ хаахаа больж, ажилчдынхаа цалинг олгон, засвар ч хийгээд амжсан байна.
Таван жилийн өмнө ээжээсээ уг фермийг өвлөн авсан Дот видео хурлын үеэр дэлгэц дээр гэнэт ямааны хошуу гараад ирвэл хуралд оролцогчдыг хөгжөөх болов уу гэж бодсон гэнэ. Зүгээр л тоглоом шоглоом хийх зорилгоор өнгөрсөн оны дөрөвдүгээр сард сэдэж олсон уг үйлчилгээнийхээ талаарх зарлалыг тэрбээр веб хуудастаа тавьчхаад орондоо ороод унтаад өгчээ. Гэтэл өглөө нь сэрэхэд уг үйлчилгээг авах сонирхолтой хэдэн зуун зурвас ирсэн байна.
Амьтдыг “түрээслэх” төлбөр нь 5 фунтын үнэтэй бөгөөд фермийн ямаанууд АНУ, Орос, Хятад, Австралид болсон видео хурлуудад оролцож, эзэндээ их хэмжээний мөнгө “олж өгсөн” байна.
Кронкшоу Фолд ферм нь аж ахуйн ажлаасаа гадна хурим зохион байгуулах, сурагчдад хичээл заах зэрэг ажил эрхэлдэг байжээ. Гэвч цар тахлын улмаас тэдгээр ажлууд нь хумигдаж ажилчдынхаа цалинг тавих ч боломжгүй болсон байна.
Ямаанууд түрхэн зуур дэлгэцээр гардаг ч Маргарет дуудлагатай ямаа нэгэн гэр бүлтэй бямба гараг бүр холбогдож сонин сайхнаа “хуваалцдаг” болжээ. Тухайлбал, нэг удаа холбогдоход ямаа “найз залуутай” болсон бол, бас нэг удаа “жирэмсэн” болсноо “дуулгасан” байна.
Фермийн эзэн бүх захиалгыг авч, үйлчилгээ үзүүлэх амаргүй байгаа ч үүнийхээ ачаар хоёр ч ажилтнаа халалгүй үлдээж чадсан гэжээ.
Эх сурвалж: ВВС