Нөхөртөө ахин дахин дурладаг эхнэр байхын тулд…

34913400f5d77f1120ca242b857447c6

Юунаас хамгийн их айж байгааг чинь би сайн мэдэж байна. Тэр чамайг байгаа бүхнээрээ хайрладаг гэдэгт чи хэзээ ч эргэлздэггүй. Бусад эмэгтэйчүүд нөхрөө өөрийг нь хуурах вий гэж айдаг байхад энэ чиний санаа зовох зүйл огт биш. Тийм ээ, чи маш азтай эмэгтэй! Гэхдээ эсрэгээрээ чи түүнээс биш өөрөөсөө эмээдэг.

Өөрийгөө түүнийг хуурах вий, өөртөө байдаг энэ их сэтгэл хөдлөлдөө автаад ирээдүйд тэнэг үйлдэл хийх вий дээ гэж бодохоос хайртыгаа хараад өрөвддөг. Уг нь сэтгэлд сэвгүй сайхан гэр бүлийг бүтээхийг чи маш их хүсдэг хэрнээ л хааяа зөв гэж бодож байгаагаа биш догдлолоо дагаад л явах шахдаг, явчихдаг өөрийгөө яаж “хазаарлах” вэ?

Аз жаргалтай, амар тайван, зүв зүгээр амьдарч байхад чинь чамайг өмнө нь шархлуулаад одсон, чин зүрхнээсээ татагдаж дурласан залуу чинь гарч ирээд “Одоо л хоёулаа шинээр эхлэе. Чи шийдвэрээ гарга” гээд байвал яах вэ? Зөвхөн түүнийхээ л гараас хөтлөөд алхаж байтал чинь дэндүү дур булаам өөр нэг гар чинийхээс хөтлөх оролдлого хийгээд байвал яах вэ? Нэг гараа нөгөөгөөрөө барих уу? Тэгэхийн тулд хайрттайгаа хөтөлсөн гараа түр тавих уу? Эсвэл гараа дэлгээд түүнийхийг чангахан атгах уу? Мэдээж чи “амьдралд байдаг л зүйл” хэмээн хүн бүрийн ярьдаг хэв маягаас өөрөөр, бахархалтай, ухаантайгаар гэр бүлээ авч явахыг хүсч байгаа. Чиний сэтгэл хөдлөл бодож байгаагаас чинь ч илүү сул дорой. Нөхөртөө ахин дахин дурладаг эхнэр байна гэдэг бол өөрийгөө өөр зүг рүү гарах ямар ч завсар зай гаргахгүй байна гэсэн үг.

Хамгийн чухал нь шийдвэр…
Ирээдүйд юу болохыг тааж мэдэхгүй учраас чи үргэлж хэн нэгэнд амлалт өгөхөөс айдаг байх. Өөртөө хүртэл. Гэхдээ тааварлахын аргагүй ирээдүйг өөрийнхөө хүсч байгаагаар бүтээн байгуулахад юу хамгийн чухал байдгийг мэдэх үү? Чиний бас бидний айдаг амлалт юм. Чиний өөртөө өгөх эргэж буцалтгүй амлалт, шийдвэр бол чамайг айдсаас чинь салгахад хамгийн том дэмжлэг болж чадах зүйл. Өөртөө итгэхгүй байсан ч, өөрийгөө чадна гэдэгт итгэж “Би энэ хүнтэй л насан туршдаа амьдарч, түүнийг хайрлах, түүнд дурлах шинэ шалтгаануудыг өдөр болгон олж харах гэж хичээх болно” гэж шийд. Энэ шийдвэр чинь ямар нэг эргэлзээгүй байх ёстой, хэрвээ өөрийгөө дорвитой сайн итгэн үнэмшүүлж чадахгүй байвал яагаад тэр шилдэг нь болох тухай, яагаад түүнд дурласан тухайгаа, цаашид ч гэсэн хайрламаар ямар мөн чанарт нь сэтгэл татагддагаа бичээрэй. Бодох хангалтгүй учраас заавал бичиж үзээрэй. Гэхдээ энэ нь чамд өөрөөсөө гарахааргүй зүйлийг гаргах гэж байгаа юм шиг, албадлагын мэдрэмж төрүүлэх ёсгүй. Хэрвээ тийм мэдрэмж төрж байвал угаасаа л чиний түүнийг гэх хандлагад ямар нэг доголдол байна аа гэсэн үг.

Тэгээд өөдрөг зан чанар…
Юу гээч? Гутранги хүн мянга төгс залуутай гэрлэсэн байлаа ч түүнд өдөр болгон дурлаж чадахгүй. Учир нь тийм хүний оюун санаа угаасаа ямар нэг өө сэв олж харахад бэлтгэгдсэн байдаг. Тиймээс хэрвээ чи өөдрөг хүн мөн бол энэ юуг ч болно бүтнэ гэдэг зангаа хайр дурлалдаа ахиухан гарга. Айдастаа бүү авт. Наад айдас чинь л ирээдүйд хамаг юмыг баллаж магадгүй. Бид нар “бүр нэг ингэх гээд байсан юм аа” гэж бодох зүйлээ өөрсдөө бий болгох гэж, бараг батлах гэж зүтгэдэг мунхаг хүмүүс шүү дээ.

Баттай шийдвэр дээр үндэслэсэн өөдрөг чанараараа өөрийгөө чиглүүлж, амьдралын олон саад бэрхшээл дунд өөртөө болон шийдвэртээ үнэнч үлдэх арга замыг л бусдаас нь түрүүнд ялгаж хардаг байгаарай. Мэдээж 40, 50 жилийн турш хийх энэ хичээл зүтгэл чинь амархан байхгүй. Учир нь амьдрал үнэхээр баян учраас чамд ямар ч саад тотгор, сорилтыг бас ямар ч татгалзахын аргагүй санал, гэнэтийн романтик учралыг зэхсэн байж магадгүй. Гэхдээ л чи өөдрөг, бас шийдвэрээсээ эргэж буцахгүй байвал энэ бүхэн чамайг өдийг хүртэл босгосон сайхан гэр бүлээ нураах хүртэл эргэлзүүлж хүчрэхгүй. Түрхээн, бүр бяцхаан зуурын мэдрэмж, догдлол, дурсамж төдий болоод л замхарна.

Чи чадна аа, хонгор минь! Чи л хүсвэл нүдээ, чихээ, мэдрэмжээ шинээр нь хадгалж чадна. Чиний хайрт, чиний л хайрт үнэхээр хайрлахгүй байхын аргагүй залуу шүү дээ!


Нөхөртөө ахин дахин дурладаг эхнэр байхын тулд…
Жиргэх
Манай хуудсанд LIKE дарж нэгдэнэ үү
Түлхүүр үгс:

Сэтгэгдэл бичих

АНХААРУУЛГА: Уншигчдын бичсэн сэтгэгдэлд MISS.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 7711-0505 утсаар хүлээн авна.