Кофег хэтрүүлэлгүй хэрэглэвэл олон өвчнөөс урьдчилан сэргийлэх ашигтай болохыг Нью-Йоркийн Эрүүл хооллолтын хүрээлэнгийн эрдэмтэд хоол судлаачидтай хамтран какао хүний бие махбодид хэрхэн нөлөөлдөгийг судлах явцдаа тогтоожээ.
Судалгааны дүнгээс үзвэл, өдөрт хоёр аяга кофе уудаг эмэгтэйчүүдийн зүрхний шигдээстэй болох магадлал 20 хувиар буурдаг байна. Хүчтэй үл исэлдүүлэгч агуулсан сэргээгч ундаа нь уг өвчнийг үүсгэдэг холестерины хэмжээг багасгадаг ажээ.
Энэ баримт нь зүрхний шигдээс тусах магадлалд илүү өртөмтгий эмэгтэйчүүдэд их чухал юм. Тэгээд ч кофе чихрийн шижин өвчин хоёрдугаар шатандаа орох эрсдэлийг бууруулдаг байна. Өдөрт хоёр аяга кофе уудаг эмэгтэйчүүдэд ийм эрсдэл гуравны нэгээр буурдаг ажээ. Кофенд агуулагддаг үл исэлдүүлэгч болон эрдэс бодисууд нойр булчирхайн эд эс гэмтэхээс, тэрчлэн инсулины хэмжээ ихсэхээс урьдчилан сэргийлдэг байна. Үүний сацуу кофе тархины ажиллагаанд сайнаар нөлөөлж, ой тогтоолт муудах эрсдэлийг 65 хувиар багасгадаг ажээ.
Кофе хоол боловсруулалтыг сайжруулж, бие махбодийг цэвэрлэх үүрэг гүйцэтгэдэг. Сэргээгч энэ ундааг уудаг хүмүүс бүдүүн гэдэсний хорт хавдартай болох эрсдэл нь бараг дөрөвний нэгээр багасдагийг Америкийн шинжээчид мөн нотолжээ. Кофе элэгний эд эс гэмтэхээс хамгаалж, тухайлбал, элэгний хатуурал болон хорт хавдрыг газар авахуулдаггүй гэж мэргэжилтнүүд тогтоосон бол хоол судлаачид кофег илүүдэл жинтэй болохоос урьдчилан сэргийлэх зорилгоор ууж байхыг зөвлөжээ. Учир нь кофе бие дэх өөх тос хайлахад тус болж, шээс хөөдөг аж. Гэхдээ бүх мэргэжилтэн кофег хэтрүүлэлгүй хэрэглэвэл эрүүл мэндэд сайнаар нөлөөлөхийг онцгойлон анхааруулж байна.
З.Амгалан
