Хятадын эрдэмтэд Нарны аймгийн зах хязгаар луу дэлхийгээс 100 одон орны нэгж (15 тэрбум км) зайд сансрын аппарат илгээх боломжийг судалж байна.Сансрын аппаратыг 2049 он гэхэд БНХАУ үүсэн байгуулагдсаны 100 жилийн ойг тохиолдуулан хөөргөхөөр төлөвлөж байна. “Хэрэв төсөл амжилттай хэрэгжвэл энэ нь дэлхийн болоод хүн төрөлхтний хөгжилд оруулах Хятад улсын хувь нэмэр болно” гэж тус улсын сарны хөтөлбөрийн ерөнхий зохион бүтээгч, академич У Вэйжэн хэлжээ. Түүний хэлснээр “Хятадын сансрын салбарт энэ зорилгод хүрэх хүч чадал бий”.
Нэг одон орны нэгж нь ойролцоогоор 149.6 сая км бөгөөд дэлхийгээс нар хүртэлх дундаж зай гэж тооцдог байна. БНХАУ цаг уур, харилцаа холбоо, навигацын хиймэл дагуулууд, мөн Сарыг эзэмших технологийг боловсруулж, сансар судлалын үндэсний хөтөлбөрөө эрчимтэй хөгжүүлж байгаа билээ. Тус улсын эрдэмтэд мөн солирууд, Ангараг гаргийг судлах хөтөлбөр хэрэгжүүлж байгаа юм.
Одоогийн байдлаар “Вояжер 1”, “Вояжер 2” гэсэн хоёрхон хөлөг Нарны аймгаас гараад одод хоорондын зайгаар аялж байгаа юм. Тэдгээрийн хийсэн хэмжилтүүдийн тусламжтайгаар эрдэмтэд анх удаа сансар огторгуйн зарим шинж чанарыг нарийвчлан судалж, Нарны аймгийн зааг дээр хэд хэдэн үзэгдлийг илрүүлжээ.
