Эцэг, эх бүр хүүхдийнхээ сурлагад санаа тавьж, амжилттай байхыг хүсдэг. Эцэг эхчүүд амжилт нь чанартай боловсрол мэдлэгээс бий болдог гэж үздэг. Зарим хүүхэд идэвх чармайлт ихтэй, сурах дуртай байдаг бол, зарим нь огт сурах дургүй байдаг.Тэгвэл хүүхдийн сурах хүсэлд нь нөлөөлдөг 5 хүчин зүйлийг товчхон дурдая.
1. Сурахыг уйтгартай зүйл гэж боддог
Хүүхдүүд нэг зүйлээ давтан сурах дургүй байдаг. Тэдэнд илүү сонирхолтой, хөгжилтэй байдлаар заах нь сурах хүслийг нэмдэг байна. Ялангуяа бага насны хүүхэд тоглоомоор дамжуулан сурдаг. Тэдний сурах явцад нь хөгжилтэй үйл явдал, тоглоом оролцуулбал уйдах асуудал, улмаар сурах дургүй байдлыг нь засах боломжтой гэнэ.
2. Зорилгодоо хүрч чадахгүй байх
Заримдаа хүүхэд хичээл, шалгалтдаа муу дүн авахад их хэмжээний гутралд ордог. Энэ нь даамжирч хүүхдийн идэвхийг сулруулж, сурах хүсэл эрмэлзэлгүй болгодог байна. Энэ үеийг нь таньж, хүүхдээ урамшуулж, алдаанаас суралцахад нь туслах хэрэгтэй.
3. Суралцах зохистой орчин байхгүй байх
Эцэг эхчүүд хүүхдийнхээ гэрийн даалгаврыг хийлгэх гэж оролцох эсвэл гэрийн ажил, өөр бусад зүйл хажууд нь хийхэд хүүхдийн анхаарал сарнидаг. Харин эсрэгээрээ хүүхдэд таатай, саад болох зүйл багатай, зохистой гэрэлтэй орчныг бүрдүүлж өгснөөр хүүхэд илүү сайн төвлөрч чаддаг байна.
4. Сурахын ач холбогдлыг мэдэхгүй байх
Сурах нь яагаад чухал вэ гэдгийг мэдэхгүй бол сурах дургүй болно. Тийм учраас хүүхэдтэйгээ тогтмол ярилцаж, яагаад суралцах ёстой, яагаад чухал болохыг тайлбарлаж өгөх хэрэгтэй.
5. Урам зориг дутвал
Эцэг эхчүүд хүүхдээ улам амжилт, дэвшилттэй байхыг эрмэлздэг. Гэвч хүүхдийнхээ амжилт, хичээл зүтгэлийг талархан хүлээн авч, магтахаа мартах нь элбэг.
Ингэснээр хүүхдийн идэвх буурч, сонирхолгүй болж, сурах гэдэг хэзээ ч дуусашгүй оргил мэт хүлээж авч, урамгүй болдог байна. Тийм учраас хүүхдээ цаг тутамд сурахад нь урамшуулж, сурсан зүйлс, амжилтыг нь сонсож, дэмжих хэрэгтэй.
6. Хэт их, олон талын ачаалал
Ихэнх эцэг эхчүүд хүүхдийнхээ тухайн үеийн бодит боломж, хөгжлийн түвшинг тооцож үзэлгүйгээр гүнзгийрүүлсэн, тусгай хөтөлбөртэй, ачаалал ихтэй сургуульд өгөх хүсэл сонирхолтой байдаг. Хэт их ачаалал хүүхдийг залхааж, сурах сонирхлыг нь бууруулдаг. Үүнээс зайлсхийхийн тулд мэргэжлийн сэтгэл зүйч, багш нартай зөвлөж, хүүхдийн хүч хүрэхгүй байгаа түвшинд зүтгүүлэх нь хэрэгтэй эсэх талаар сайтар бодох хэрэгтэй. Үнэхээр тохиромжгүй байвал энгийн сургуульд шилжүүлсэн нь зөв
7. Эрх дураараа байдал ба дэг журам
Гэр орондоо хэтэрхий эрх дураараа байдаг хүүхэд сургууль дээрх дэг журманд дасан зохицож чадахгүйгээс хичээл номондоо дургүй болох тохиолдол их гардаг. Ялангуяа хүссэн болгоныг нь биелүүлж, хайр энхрийлэлд умбуулж байдаг айлын ганц хүүхдүүд ийм асуудалд орох нь элбэг. Сургууль дээр байдал шал өөр. Хэн ч ганц түүнд анхаарал тавиад байхгүй. Сургууль дээр тавигдаж буй шаардлагыг бүх хүүхдүүд адилхан л биелүүлэх ёстой. Энэ үед эцэг эхчүүд ухаалгаар хандаж, хайртай үр чинь олны дунд эв зүйгээ зөв олоход туслахын тулд хүмүүжлийн арга барилаа өөрчлөх хэрэгтэй болно.
8. Таарамжгүй харилцаа
Ангийнхан, багш нар, аль эсвэл ганц нэг хүүхэдтэй ч гэсэн таарахгүй байгаагийн улмаас хүүхэд сурах сонирхолгүй болж болно. Ийм тохиолдол болгоны учрыг маш сайн олж, асуудлыг дор нь, шударгаар шийдэж байх хэрэгтэй. Энд аль аль талд эмзэг асуудлууд маш их гардаг учир хамгийн үнэн зөв, шударга мэргэн шийдвэр л асуудлыг нэгмөсөн шийдэлд хүргэдэг. Өөрийн хүүхдийг хэт өмөөрөх, нэг талыг барьж асуудлыг шийдэх, багшийн аяыг харах зэргийн аль аль нь хүүхдийн ирээдүйн үзэл санаанд нөлөөлж болох хор уршигтайг санаарай. Хэрэв зөрчилдөөн хэт гүнзгийрсэн бол өөр сургуульд шилжүүлсэн нь дээр байдаг.
