Уэйн Руни Премьер лигт өнгөрүүлсэн 10 жилийнхээ тухай дурсамж номоо дөнгөж гаргаад буй юм. Тэрээр энэ номынхоо талаар болон “Олд Траффорд” дахь амьдралынхаа талаар ийм нэгэн ярилцлагыг хэдхэн хоногийн өмнө өгсөн байна.
-Уэйн, та Английн Премьер лигт өнгөрүүлсэн 10 улирлынхаа тухай ном бичжээ. Энэ он жилүүд таны хувьд юуг илэрхийлэх вэ?
-Энэ бол алдаа, онооны он жилүүд байлаа. Би амьдралдаа ч их туршлага хуримтлуулсан. Английн хөлбөмбөгийн дээд зэрэглэлд арван жил тоглоно гэдэг том амжилт гэж би ойлгодог. “Эвертон”-д хоёр жилээ үдсэн. Энэ баг намайг өсгөж, хөлийг нь минь дөрөөнд хүргэсэн. Харин дараа нь “Манчестер Юнайтед”-д найман жилийг өнгөрөөлөө. Би багтайгаа Аваргуудын лигт түрүүлж, Английн аварга болж, Тив хоорондын цомыг ч өргөсөн. Энд ирсэндээ, тоглож буйдаа үргэлж баяртай явдаг болохоор ирэх 10 жилээ ч энд өнгөрүүлнэ гэж найддаг.
-Тэгэхээр дахиад арван жилийн дараа та “Премьер лигт өнгөрүүлсэн 20 жил” гэдэг ном бичих нь ээ дээ?
-Тэгнэ гэж их найдаж байна. Райан Гиггз, Пол Скоулзыг харахаар болохгүй, бүтэхгүй зүйл гэж байхгүй юм шиг санагддаг. Английн хөлбөмбөгт ийм удаан тоглохын тулд гайхалтай зан чанартай байх хэрэгтэй. Тиймээс арван жилийн дараа таньтай дахиад энд уулзана гэж найдъя. Одоо үүнийг миний зорилго гээд бодчихьё.
-Тэгвэл та ойрын арван жилийг “Олд Траффорд”-д өнгөрөөх юм байна, тийм үү?
-Тэгж л найдаж байна. Би өөр багт тоглож буйгаар өөрийгөө төсөөлдөггүй гэж олон хэлсэн. Хэдэн жилийн өмнө би алдаа гаргачих шахсан. Гэхдээ тэр даруй алдаагаа ухаарч, цайруулсан. Тиймээс “Юнайтед”-ын өмсгөлтэй минь харахыг хүсч буй хүмүүс байгаа цагт би багтаа зүтгэсээр байх болно. Би багаа хэзээ ч орхихгүй.
-Та хэдэн жилийн өмнө багаасаа явахаар шийдээд байснаа хэлэв үү дээ?
– Хүн бүр л алдаагаа ойлгож, суралцдаг. Тухайн үед би “Юнайтед”-ыг орхивол маш том алдаа хийхээ ойлгосон. Би Дэвид Гиллтэй уулзаад, хэвлэлээр гарсан, ярьсан зүйлдээ ихэд харамсаж буйгаа хэлсэн. Тухайн үед багийн удирдлага тэр даруй шинэ гэрээ хийх, баримт бичиг бэлтгэх ажилд ердөө 12-хон цагийг зарцуулж, би эндээ үлдсэн. Одоо тэр үеийг дурсахад хүнд байдаг. Тэр түүхийг бодохоор багийнхаа төлөө бүр ихийг хиймээр санагддаг.
-Танд хоёр дахь боломжийг олгосон болохоор тэр үү?
-Тийм ээ, тэгэлгүй яахав. Тэд хэвлэлд чалчсан зүйлсийг минь хараад хөөчихөж болох л байсан. Гэвч Дэвид, Сэр Алекс хоёр их мэргэн шийдвэр гаргасан. Тэд болоод буй үйл явдлын учрыг ухаж ойлгохыг хичээснээр надад их тус болсон. Мөн надад урьдын адил итгэж буйгаа ч хэлсэн. Тэр цагаас хойш миний бодол санаа зөвхөн багийнхаа төлөө, хөгжөөн дэмжигчдийнхээ төлөө л байх болсон. Мэдээж, тэр явдал олон хүний сэтгэлийг гонсойлгосныг би мэднэ. Гэхдээ л одоо хүртэл надад итгэж, найдаж буйд би талархаж явдаг.
-Таныг хөгжөөн дэмжигчид уучилсан болов уу. Та юу гэж бодож байна вэ?
-Хөгжөөн дэмжигчдийн ихэнх нь надад урьдын адил итгэж байгаа. Тэд намайг багтаа хайртай, түүнийхээ төлөө зүтгэх сэтгэлтэйг олж хардаг. Би “Олд Траффорд”-д гайхалтай ялалт байгуулахыг хүсдэг. Үүнийг минь хөгжөөн дэмжигчид бүгдээрээ мэдэрдэг гэж найдаж байна.
-Өнгөрсөн улирлын сүүлийн тойрогт “Сандерлэнд”- тэй тоглосны дараагаар танд ямар мэдрэмж, сэтгэгдэл төрсөн бэ?
-Үнэхээр аймшигтай. Бид аварга болчихлоо гэсэн бодолтойгоор тоглолтыг өндөрлүүлсэн. Гэтэл гэнэт хоёрдугаар байрт орчихсон байлаа. Тэвчихийн аргагүй мэдрэмж л гэж тэр байх. Манай багийнхнаас гарч буй гайхалтай сайн, сайхан энергийг би мэдэрч явдаг. Бид аваргын алдраа алдсан ч гэсэн баг минь задраагүй, зангидсан гар шиг хэвээрээ л үлдсэн. Бид олон хүнд тоглолтод хожил авч чадсан. Тиймээс өнгөрсөн жилийн хар дарсан зүүдийг эргэн мэдрэхгүйн тулд бид хичээх хэрэгтэй.
-Та номдоо тухайн өдөр “Манчестер Сити”- “Куинз Парк Рейнжерс”- ийн тоглолтыг бичлэгээр үзсэнээ дурьдсан байна билээ. Дахиад тийм гашуун мэдрэмжийг мэдрэх хүсэл яагаад төрсөн юм бэ?
-Би үргэлж Премьер лигийн багуудын тоглолтын бичлэгийг үзэж, давуу болон сул талыг нь олж харахыг хичээдэг. Харин тэр өдөр “Сити”-гийн сүүлийн хоёр гоолыг аль болох харахгүй байхыг хичээсэн. Гэвч одоо энэ гоолуудын бичлэг телевиз бүрээр л байнга цацагдаж байна шүү дээ. Биднийг аварга болоход хэвлэлүүд хэзээ ч тэгж их шуугиж байгаагүй. Гэхдээ “Сити”- гийн амжилтыг бас хүлээн зөвшөөрөх хэрэгтэй. Аварга болж чадсан л бол аварга болохоор л байсан хэрэг.
-“Сити”-тэй энэ жил дахиад л ширүүн өрсөлдөх болов уу?
– Тэгэлгүй яахав. Үүн дээр бас “Челси” нэмэгдэнэ. Гэхдээ Лондоны баг аваргын төлөө өрсөлдөх туршлага илүүтэй болохоор тэд илүү аюултай болов уу. “Ливерпуль” аваргын төлөө өрсөлдөөд эхэлбэл би лав гайхахгүй. Брэндан Рожерс бол ямар ч багийг амжилтад хүргэж чадахаар сайн мэргэжилтэн. Тэд гараагаа муухан эхэлсэн ч барианд тун чангарч орох чадалтай, түүхтэй баг.
-Та өмнө нь Рууд Ван Нистелрой, Криштиану Роналду, Карлос Тевес нарын шилдэг тоглогчидтой хамт довтолгоонд гарч байсан. Робин Ван Перси эдгээр тоглогчдын чинээнд хүрч, довтолгоог хүчирхэгжүүлж чадах болов уу?
-Ямартай ч үүнд саад хийчихээр зүйлийг би олж харахгүй байна. Робин өнгөрсөн улирлын мэргэн буучаар шалгарсан, туршлагатай довтлогч. Тэр тоглолтын арга барилаа жаахан өөрчлөөд, олон гоол оруулж эхэлсэн. “Арсенал”-д тэр ноднин чадахаараа л тусалсан. Манай багт ийм тоглогч ирсэн нь улам хүчирхэг болго ж байгаа.
Би гэмтлээ түргэн эдгээгээд, хурдан талбайд эргэн гарч, түүнтэй хөл нийлэн тогломоор байна. Би олон шилдэг хөл бөмбөгчтэй хамт тоглож байсан, тоглож ч байна. Рууд, Луи Саа, Тевес, Бербатов, Чичарито, Дэнни гээд. Бүгдтэй нь л хэл амаа олж, хөл нийлж яваа. Дасгалжуулагч Робинтой ч хамтран тоглох тэр боломжийг олж харсан гэдэгт итгэлтэй байгаа.
-“Фулхэм”-тэй тоглох үеэр авсан бэртэл хэр түргэн эдгэж байна вэ?
-Түргэн эдгэж байгаа. Бүр хүнд бэртэл байх вий гэж айж байсан. Одоо эмчээс л бүх зүйл шалтгаална. Тэр намайг тоглох боломжтой гэвэл маргааш ч би талбайд гарна. Урьдчилаад дөрвөн долоо хоног эмчлүүлнэ гэсэн хугацаа тавьсан. Тиймээс түүнээс эрт бол амжихгүй байх. Одоо гам барьж, болгоомжтой байх хэрэгтэй. Тухайн мөчид би хөлөө бариад, шүүчид эмч хэрэгтэй байгааг хэлсэн. Би носилк дээр талбайг орхихгүй юмсан гэж их хичээсэн. Тиймээс өөрөө талбайн зах хүртэл алхахыг хичээсэн юм. Гэвч эмч ингэх нь хэтэрхий эрсдэлтэй гэж хэлсэн л дээ. Хүү минь цэнгэлдэхэд байсан болохоор аавыг нь носилк дээр өргөөд гарахыг битгий хараасай гэж хүссэн юм.
-Та мөдхөн 27 нас хүрлээ. Хөлбөмбөгчийн хувьд оргил үедээ ирлээ гэсэн үг. Та цаашид улам сайжрах боломж бий болов уу?
-Ийм багт тоглож буй хөлбөмбөгч үргэлж сайжирж байхаас аргагүй. Өнгөрсөн жил би олон гоол оруулсан. Хэдийгээр баг маань ямар ч цом гардаагүй ч хувийн амжилтын хувьд дажгүй байсан. Одоо тоглох юмсан гэж тэсч ядаж л сууна. Робинтой хамт тоглоно гэхээр бүр ч яараад байх юм. Тэр үнэхээр гайхалтай тоглож байна аа. “Саутгемптон”-ы эсрэг тэр өөрийгөө бүрэн харуулсан. Манай баг дахь довтолгооны шугамын өрсөлдөөн ширүүн болж байна. Эцэстээ энэ нь багийн амжилтад сайнаар л нөлөөлнө.
-Өнгөрсөн улиралд таныг үндсэн бүрэлдэхүүнд гаргах нь тодорхой байлаа. Харин энэ улиралд ийм их итгэл бий юу?
-Би энэ талаар нэг их бодоогүй ээ. Урьдын адил хөдөлмөрлөж, үндсэнд багтахыг л хичээнэ. Миний хөлбөмбөгчийн замнал хэр удаан үргэлжлэхийг би өөрөө хэлж мэдэхгүй. Майкл Оуэнтэй энэ талаар нэлээд ярилцаж үзсэн. Тэр гэмтэл бол хөлбөмбөгчийн хувьд эрт оргилд хүрсний төлөөс гэж үздэг юм билээ. Майкл одоо ч гэмтэлдээ шаналж яваа. Хөлбөмбөгт бүх зүйл өндөр босготой, хариуцлагатай байдаг. Тиймээс ирээдүйд юу ч болсон түүнд бэлэн л байх хэрэгтэй.
Р.МӨНХДАВАА /MONGOLNEWS.MN/