Амттай хоолыг харах юм уу үнэрлэх нь зөвхөн шүлс ялгаруулаад зогсохгүй биеийн өөр, чухал хариу үйлдлүүдийг ч мөн өдөөж өгдөг ажээ. Үүнтэй холбогдуулан хулгана дээр хийсэн туршилтын үр дүнд үндэслэн эрдэмтэд хоолыг идэхээсээ өмнө үнэрлэх нь элэгний үйл ажиллагааг эрчимжүүлж, шингээлтийг түргэсгэдэг гэдгийг тогтоосон байна.
Энэхүү судалгааг удирдан явуулсан Германы Кёлн хот дахь Макс Планкийн нэрэмжит бодисын солилцоо судлалын хүрээлэнгийн эрдэмтэн Иенс Брюнинг “Энэ нээлт нь хүний биеийн үндсэн процессын талаарх бидний мэддэг ердийн ойлголтыг өөрчилсөн. Тархинд хоолны талаар мэдээлэл очсоноор хүний элэг хүлээн авах шим тэжээлийг урьдчилан мэдэж, шингээхдээ бэлдэж эхэлдэг” хэмээн ярьжээ. Тус судалгааны ажлын үр дүн шинжлэх ухааны “Cell” сэтгүүлд нийтлэгдсэн байна.
Туршилтад оруулсан хулганууд юм идэх үед “mTOR” болон “xbp1” мэдрэлийн судалд нь цочрол очиж байжээ. Тэдгээр судалнууд нь зөвхөн элэг хоолноос амино хүчлийг авах үед үйл ажиллагаанд орж эндоплазмын торлог уургийг шингээхэд чухал нөлөө үзүүлдэг гэнэ.
Энэхүү судалгаа нь таргалалт болон чихрийн шижин өвчний хоорондын хамаарал дээр хэрэгтэй мэдээллийг олоход томоохон тус хүргэж магадгүй юм. Чихрийн шижин өвчнийг үүсгэдэг гол хүчин зүйл болох инсулины эсэргүүцлийг таргалалтаас болж үүдсэн элэгний удаашралтай ажиллагаа сэдрээдэг байх боломжтой ажээ.
| Найруулагч: | Х.АРВИНТАЛ |
| Эх сурвалж: | СААК |
