960 оны хоёрдугаар сарын 4. Сүн гүрний сэргэн мандалт
Жоу гүрний жанжин байсан Жао Куанинь буюу Эзэн хаан Тайзу 960 оны хоёрдугаар сарын 4-нд Хятадын Сүн гүрнийг үүсгэн байгуулсан. Тэрээр Өмнөд Тан, Мэн Шү, Өмнөд Хан, Жинань улсуудыг нэгтгэснээр Хятадын таван гүрэн, арван хаант улсын эрин үеийг дуусгасан ба цаг үеийнхээ хамгийн тайван, бат бөх улсыг бий болгосон.
Эзэн хаан Тайзу 976 онд нас барсан бол түүний байгуулсан Сүн гүрэн 1279 онд Юань гүрэнд эзлэгдэх хүртлээ оршин тогтносон.
1945 оны хоёрдугаар сарын 4. Ялтын уулзалт эхлэв
Дэлхийн хоёрдугаар дайны дараах Герман, Европыг төвхнүүлэх тухай хэлэлцэхээр Их Британи, АНУ, ЗХУ-ын тэргүүнүүд Ялтын уулзалтыг 1945 оны хоёрдугаар сарын 4-нд эхлүүлсэн.
ЗХУ-ын Ялт хотод болсон уулзалтад АНУ-ын Ерөнхийлөгч Франклин Д.Рузвельт, Их Британийн Ерөнхий сайд Уинстон Черчил, ЗХУ-ын удирдагч Иосиф Сталин нар оролцсон.
Уулзалт хоёрдугаар сарын 11-нд дуусаж “Чөлөөт Европын тунхаг”-ийг байгуулсан ба Берлин хотыг дөрвөн хэсэгт хуваасан.
2004 оны хоёрдугаар сарын 4. Facebook-ийн төрсөн өдөр
“Facebook (Одоо Meta нэртэй болсон)” компани нийгмийн харилцааг хөнгөвчлөн цахим платформ болох Facebook-ийг 2004 оны хоёрдугаар сарын 4-нд үйлчилгээнд нэвтрүүлсэн.
Анх зөвхөн Харвардын их сургуулийн оюутнууд, дараа нь Хойд Америкийн их сургуулиудын оюутнуудын ашигладаг байсан уг платформыг 2006 оноос эхлэн 13-аас дээш насны хүн бүр ашиглах болсон.
Өдгөө 2.8 тэрбум хэрэглэгчтэй болсон Facebook нь дэлхийн интернэт хэрэглээний жагсаалтад долоод бичигддэг ба үүсгэн байгуулагч Марк Закербергийг дэлхийн тэргүүлэх баячуудын нэг болгосон.
