Реалити шоуны од, гоо сайхны магнат бүсгүй Каяли Женнер хоёр дахь хүүхдээ өлгийдөн авчээ. Реппэр Трэвис Скотт болон Каяли Женнер нар энэ сарын 2-ны өдөр хоёр дахь хүүхдээ өлгийдөн авсан бөгөөд өнөөдөр олон нийтэд инстаграмаар дамжуулан энэхүү баярт мэдээгээ хуваалцжээ.
Тэд одоогоор хүүхдийнхээ нэр болон хүйсийг нууцлаж байгаа ч цэнхэр өнгийн зүрхэн эможи тавьсан нь эрэгтэй хүүхэдтэй болсон гэх таамаглалыг төрүүлээд байна.
Тэдний том охин Сторми энэ жил 4 нас хүрч байгаа. Дүүгийнхээ гарыг атгасан түүний хар цагаан зураг инстаграм хуудаснаа тавигдсан бөгөөд хосууд олон хүүхэдтэй болох мөрөөдөлтэй аж. Каяли Женнер том охиноо төрүүлснийхээ дараахан People сэтгүүлд өгсөн нэгэн ярилцлагадаа “Ээж болох нь үнэхээр миний хийхийг хүсэж байсан зүйл шиг л санагдсан. Би долоон охинтой болохыг хүсэж байна. Дараа нь хүүтэй болох талаар бодох байх” хэмээсэн байна.