Сүүлийн үед цусны даралт ихсэх өвчин эрс залуужиж, хот суурин газрын төдийгүй орон нутгийн хүн амын дунд хурдтай тархаж буй нь хөдөлгөөний хомсдол, хүн амын дундах таргалалт, зохисгүй хооллолт, амьдралын хэв маягийн өөрчлөлт, стресс зэрэг олон хүчин зүйлээс шалтгаалдаг байна. Манай улсын хүн амын дунд аюулын харанга дэлдэж, нас баралтын тэргүүлэх шалтгааны нэг болсон энэ өвчнөөс хэрхэн урьдчилан сэргийлэх тухай иргэдэд мэдлэг мэдээлэл олгож, эрт илрүүлгийн болон төрөлжсөн нарийн мэргэжлийн үзлэг оношилгоо хийж, орон нутгийн эмч нарт сургалт зохион байгуулах ажлыг 2017 оноос “Цусны даралт ихсэлтийн эсрэг аян”-ы хүрээнд Улсын Гуравдугаар Төв Эмнэлэг, Хаан банк сан, Нийгмийн эрүүл мэндийн үндэсний төв хамтран зохион байгуулж байгаа юм.
Бид энэхүү аяны тухай болон цусны даралт ихсэх өвчний талаар Улсын Гуравдугаар Төв Эмнэлэгийн Зөвлөх поликлиникийн эрхлэгч Г.Бадамцэцэг, Зүрх судлалын тасгийн эмч Б.Нандинцэцэг нартай ярилцлаа.
