Улсын өсөх идэр начин Э.Энхбат олимпын аварга Н.Түвшинбаярт зодуулсны улмаас тархиндаа хүнд гэмтэж, ГССҮТ болон БНСУ-д эмчлүүлж байсан ч харамсалтай нь амиа алдсан билээ.Түүнийг зодож, аминд нь хүрсэн хэрэгт холбогдож буй олимпын аварга Н.Түвшинбаярын шүүх хурал энэ сард болж, дахин нэг сар цагдан хорих шийдвэр шүүхээс гарсан байдаг. Түүнийг хэрэгт холбогдсон цагаас хойш хорьж байгаа аж.
Харин талийгаачийн эхнэр Б.Нандинцэцэг өөрийн цахим хуудастаа “Би хэний ч байрыг аваагүй. Ханийг минь алчихаад одоо намайг муу, муухай болгох гээд байна. Энэ бүхний эцэст хэн нь үүрдийн өнчин болж, хохирч үлдээд, хэн нь завшиж, хожиж, баяжсан билээ. Би хүсээгүй ч энэ бүхнийг мэдчихээд байна. Ор үндэслэлгүй худал зүйлд итгээд, амаа уралдаад ярьдаг хүмүүс минь битгий ийм байгаач. Гурван бяцхан үр минь “ээжийгээ зовоохгүй” гээд нулимсаа залгиад амьдарч байна. Алуурчинд ч, тэдний хамсаатнуудад ч хүний үнэр, хүн чанарын өчүүхэн хэлтэрхий байдаг гэдэгт итгэхийг хүсэж байна” хэмээжээ.
