Сүүлийн үед охид, бүсгүйчүүд филлер буюу дүүргэлт ашиглан хамраа өндөрсгөх, уруулаа томруулах, эрүүгээ урт болгох зэргээр гадаад төрхөндөө өөрчлөлт хийх болсон. Гэхдээ филлер нь эрүүл мэндэд сөрөг нөлөө үзүүлэх тохиолдол бий. Филлер хүний эрүүл мэндэд ямар сөрөг нөлөө үзүүлдэг, хэнд үл зөвшөөрөгдөх талаар мэдээлэл хүргэе.
Филлер буюу дүүргэлт гэж юу вэ?
Филлер буюу дүүргэлт эмчилгээ нь нүүрний хэлбэр, эзлэхүүн алдагдалтыг засаж, үрчлээг арилгадаг. Нас явах тусам хүний нүүрний өөхөн давхарга багасаж, арьсны уян хатан чанар алдагддаг аж. Ингэснээр нүүрний зарим хэсгүүд хонхойж, овор нэмж эхэлдэг. Филлер нь нүүрний өөхөн давхарга байхгүй болсон, хонхойсон хэсгүүдийг дүүргэх, хэт хавтгай хэсгийг товойлгох, нүүрний хэлбэр засах, гүн үрчлээсийг тэнийлгэх зориулалттай мэсийн бус ажилбар юм.
Филлерийг гиалуроны хүчил ашиглан хийдэг ба хүний арьсанд ус, чийгшлийг хуримтлуулах үйлчилгээтэй уг бодис тодорхой хугацааны дараа биед шимэгдэж уусдаг.
Филлерийг нүүрний аль хэсгүүдэд хийдэг вэ?
Дүүргэлтийг нүүрний шаардлагатай гэсэн бүх хэсэгт хийлгэх боломжтой. Ихэвчлэн эрүү нүүрний гажиг засах, уруулын хэлбэр засах, хамар өндөрлөх, хавтгай духыг товойлгох, нүдний доорх хүнхэрийг дүүргэх, хацрын доорх хонхойсон хэсэг болон хөмсөгний дээд талын хонхойсон хэсгүүдийг дүүргэх байдлаар хийдэг аж.
Түүнчлэн зөвхөн нүүр гэлтгүй биеийн бусад хэсгүүд болох хөх, өгзөгөнд хийх боломжтой. Хамгийн гол нь хэсэг тус бүрт тохирсон зориулалтын, сайн чанарын филлерийг найдвартай газраар хийлгэх хэрэгтэй.
Хэр уддаг вэ?
(2).jpg)
Филлер нь чанараасаа хамааран зургаан сараас нэг жил гаруйн хугацаанд тогтоцтой байдаг. Энэ нь мэсийн бус ажилбар учир эдгэрэх хугацаа бараг шаардлагагүй. Харин хийлгэсэн филлерээсээ шалтгаалан бага зэрэг хавдалт үүсэж болно. Тухайлбал, уруулын филлер хийлгэсний дараа бага зэрэг хавддаг бөгөөд нэг долоо хоногийн дотор хавдар нь буух ёстой.
Мөн эмч нар филлер хийлгэсэн өдрөө хүнд дасгал, эрсдэлтэй хөдөлгөөн хийхгүй байхыг зөвлөдөг. Үүнээс гадна 2-3 сар дотроо арьсны гүн рүү ордог лазер зэрэг гоо сайхны өндөр хүчлийн аппаратанд орох хэрэггүй. Арьс арчилгааны хувьд ч ердийн хийдэг арчилгаагаа хийгээд явах ба нэмэлт арчилгаа шаарддаггүй.
Сайн чанарын, цэвэр найрлагатай филлер нь 100 хувь бүрэн шимэгдэж арилах ёстой.
Филлерийг ямар хүнд хийж болохгүй вэ?
Энэ нь гоо заслын эмчилгээ учраас эмчилгээнд тавигдах тодорхой хориглох заалтууд бий. Үүнд:
- Эмчлүүлэгч 18 нас хүрээгүй бол
- Жирэмсэн болон хөхүүл байвал
- Филлерт орох бүтээгдэхүүний найрлага дахь бодист хэт мэдрэг бол
- Батга болон идэвхтэй үрэвсэлтэй арьстай бол
- Стрептококкийн гаралтай өвчний түүхтэй, келоид сорвитой
- Цус бүлэгнэлтийн эсрэг эмчилгээ хийлгэж буй эсвэл цус бүлэгнэлтийн дутмагшилтай хүмүүст хийх боломжгүй.
Филлерийн сөрөг нөлөө
Бүх л дэвшилтэт технологийн адил филлер ч гэсэн тодорхой хэмжээний эрсдэл дагуулдаг. Үүнд:
- Филлерийг хийлгэсний дараа тарилга хийсэн газарт хэсэг зуур улайх, хавдах, өвдөх, загатнах, хөхрөх
- Тарилга хийсэн хэсэгт товойх, хатуурах
- Дүүргэлт хийсэн хэсэгт хэт мэдрэгшлийн урвал илрэх
- Үйлчлүүлэгч хараагаа үүрд алдах. Филлерийг дух, хөмсөгний дундах хэсэг, хамар болон уруулын дээд хэсэгт тарихад ийм хүндрэл гарах тохиолдол бий. Ботокс тарилгаас ялгаатай нь филлерээс болж хүний өөх нь артерийн судсанд нэвтэрвэл артерийн бөглөрөл үүсгэн, нүдний эд эрхтэн цусан хангамжаар дутагдан үхжиж, хараагаа алддаг.
Иймээс гадаадад олон эмнэлэг, эмч нар филлер тарихаа больжээ. Та нүүрэндээ дүүргэлт хийлгэхдээ хайнга хандаж болохгүй. Эрүүл мэндийн шаардлага хангасан, тав тухтай орчинд, чанартай, баталгаатай бүтээгдэхүүнээр хийлгээрэй.
Филлер хэдэн төрөл байдаг вэ?
Филлер нь хатуу, дунд, зөөлөн гэсэн гол төрлүүдтэй. Нүүрний аль хэсэгт ямар зориулалтаар хийхээс шалтгаалан сонгоно.
https://news.zindaa.mn/45tb
