Зургаан долоо хоног үргэлжилсэн дуулиант шүүх хурал Лхагва гарагт өндөрлөж, Холливүүдийн экс хосын маргааныг шийдвэрлэсэн билээ.
Долоон хүний бүрэлдэхүүнтэй АНУ-ын шүүгчдийн баг Эмбер Херд, Жонни Депп нар харилцан бие биеийнхээ нэр хүндэд халдсаныг тогтоож, хоёулангийнх нь хохирлыг барагдуулах шийдвэр гаргасан.
Гэхдээ нэхэмжилсэн мөнгөний хэмжээ эрс ялгаатай байв. Тухайлбал Херд экс нөхөртөө $10.35 саяыг, Депп хуучин эхнэртээ $2 саяыг төлөхөөр болсон юм. Тиймээс шүүхийн маргаанд Депп ялсан гэж үзэхэд болохоор байлаа.
Өчигдөр NBC сувгийн “Today” шоунд оролцсон Эмбер Хердын өмгөөлөгч Элаин Бредхофт үйлчлүүлэгч нь нэхэмжилсэн мөнгийг төлөх санхүүгийн “ямар ч боломжгүй” болохыг мэдэгджээ.
Тэрбээр жүжигчин бүсгүй шүүхийн шийдвэрийг давж заалдах төлөвлөгөөтэй байгааг бас хэлсэн байна.
Херд 2018 оны арванхоёрдугаар сард “The Washington Post” сонинд хэвлүүлсэн нийтлэлдээ гэр бүлийн хүчирхийллийн талаар бичиж, өөрийгөө “гэр бүлийн хүчирхийллийн хохирогч болсон олны танил хүмүүсийн төлөөлөл” гэж нэрлэж байжээ.
Ингэхдээ тэр хуучин нөхрийнхөө нэрийг шууд дурдаагүй юм. Үүний дараа Жонни Депп өөрийнх нь нэр хүндэд халдсан гэж үзээд шүүхэд гомдол гаргаж байжээ. Тэрбээр хоёр жил хамт амьдарсан экс эхнэрээсээ $50 саяыг нэхэмжилсэн юм.
Бичсэн нийтлэлийг нь “худал хуурмаг” гэж хэвлэлд ярьсан Деппийг өөрийнх нь нэр төрд халдсан гэж үзээд Херд бас $100 саяыг хариу нэхэмжилж байжээ.
Өмгөөлөгч Бредхофт жүжигчин Жонни Депп шүүх дээр ялалт байгуулсан явдлыг гэр бүлийн хүчирхийллийн хохирогч болсон эмэгтэйчүүдийн хувьд “томоохон ухралт” болсныг өчигдөр харамсан ярьсан байна.
Тэрбээр бас шүүх ажиллагааг олон нийтэд нээлттэй явуулсныг шүүмжилж, сошиал сүлжээн дэх хүмүүсийн хандлага, Деппийн алдар нэр шүүхийн шийдвэрт нөлөөлсөн байх магадлалтайг ярьжээ.
Эх сурвалж: AFP
