“Sony” компани “Xperia” таблетаа үйлдвэрлэж худалдаанд гаргаснаас хойш нэг сарын дараа худалдаагаа түр хугацаанд зогсоосноо мэдэгджээ.
Өнгөрсөн амралтын өдөр Японы үйлдвэрлэгч мэдэгдэхдээ “Таблет компьютерт гэмтэл илэрсэн учраас худалдааг түр хугацаанд зогсоож байна. Бид гэмтлийг даруйхан засварлаж хэрэглэгчдэд сэтгэл ханамжийн баталгаа олгоно” гэжээ.
Ус нэвтрэхгуй хэмээн онцолж буй “Xperia” таблетын гадаргуу, дэлгэцийн заагт ан цав гарсан байна. Энэ нь Хятадын “Xperia” угсардаг үйлдвэрийн гологдол гэж “Sony” компанийн төлөөлегч Норико Сази цохон тэмдэглэв. Тэрбээр “Худалдааг хэдийд сэргээх шийдвэр одоогоор гараагүй” гэжээ.
“Sony” компани “Android” үйлдлийн системтэй “Xperia” таблетаа Япон, АНУ болон Европын орнуудад худалдаж байсан юм. Тэд өнгөрсөн сарын хугацаанд 100 мянган ширхгийг үйлдвэрлээд байжээ.
Худалдаалагдсан бүх таблетыг засварлана хэмээн Норико Сази мэдэгдсэн юм. Түүний ярьснаар гологдол нь таблетын худалдаанд төдийлөн нөлөө үзүүлэхгүй аж. “Xperia” нь таблетын зах зээлд өөрийн гэсэн байр сууриа эзэлсэн бөгөөд гэвч “Apple”-ийн “iPad”-ыг гүйцэхгүй байгаа юм. “Sony”-ийн таблет нь 400 ам.долларын үнэтэйгээр худалдаалагдаж байна.
