Америкийн кино академи Холливудын киноны музей байгуулахаар зарлаж байсан боловч хөрөнгө мөнгөний бэрхшээлээс болоод төслөө хэрэгжүүлж чадахгүй байсан билээ. Харин жүжигчин Том Хэнкс, Аннет Бенинг нар хөрөнгө мөнгө цуглуулах хөтөлбөрийг удирдан хэрэгжүүлсний ачаар шаардлагатай 250 сая доллароос 100 саяыг нь одоогийн байдлаар цуглуулж чаджээ. Мөн барилгын ажил ойрын хугацаанд эхлэх болсныг зарласан байна.
Амстердамын NEMO музей, Сиднейн тэнгэр баганадсан Aurora Place барилга, Нью-Йорк Таймс сонины төв байрын барилга, Кёльн хотын “Вельтштадхаус” худалдааны төвийн барилгын загварыг гаргасан архитекторч Ренцо Пьяно болон Золтан Пали загвараар байгуулах уг кино музей Лос-Анжелесын урлагийн музейгээс холгүй 300 мянга орчим ам фут талбай бүхий барилгад байрлахаар болжээ.
Урьд нь худалдааны төв байсан энэ барилга 20 жил ашиглагдаагүй байсан аж. Шинэ музейг 2016 онд үзэгчдэд нээхээр төлөвлөж байна.
Үзэсгэлэнгийн танхим, галерейгаас гадна сонирхолтой хөтөлбөрүүдийг үзэгчдэд санал болгоно. Музейн цуглуулгад 140 мянга гаруй кино, 10 сая гэрэл зураг, 42 мянган зурагт зарлалын хуудас, 10 мянган загвар, хар зураг, тэрчлэн хувцас хэрэглэл, киноны тоног төхөөрөмжүүд багтах ажээ.
З.Амгалан