“Дэлхийн хамгийн бохир хүн” хочтой Иран улсын иргэн 94 насандаа таалал төгссөн тухай тус улсын төв хэвлэл өчигдөр мэдээлжээ.
Хагас зууны турш усанд оролгүй, ганц биеэр амьдарч байсан Аму Хажи өнгөрсөн Ням гарагт Ираны өмнөд бүсийн Фарс мужийн Дежга тосгон дахь гэртээ нас барсныг IRNA агентлаг мэдээлсэн байна.
Өвдөхөөс болгоомжилж, усанд огт ордоггүй байсан түүнийг хэдхэн сарын өмнө тосгоны оршин суугчид албадан усанд оруулж, биеийг нь угааж байсныг орон нутгийн албаны хүн ярьжээ. Үүний дараа Хажийн бие муудаж, удалгүй нас барсан байна.
“Аму Хажигийн этгээд амьдрал” нэртэй богино хэмжээний баримтат кино 2013 онд дэлгэцэнд гарахад хүмүүс түүнтэй танилцаж байжээ.
Бага залуу насанд нь тохиолдсон сэтгэл зүйн цочролоос болоод усанд оролгүй амьдрах сонголт хийснээ Хажи нэг удаа хэвлэлд ярьж байсан юм. Тэрбээр газар нүхэлсэн оромжид маш бохир нөхцөлд амьдардаг байжээ.
Эх сурвалж: AFP
