Хичээлийн цагаар багшийн зааж буй бүх хичээлийг нэг бүрчлэн тэмдэглэж авах боломжгүй байдаг. Харин үүний оронд оюутан бүр хичээлийн тэмдэглэлээ өөрт ойлгомжтой, товч байдлаар тэмдэглэж авах нь илүү үр дүнтэй. Тэгвэл хичээлийн тэмдэглэлээ хэрхэн ойлгомжтой, сонирхолтой байдлаар хөтлөх талаар дараах зөвлөмжийг хүргэж байна.
Хуудасны зөвхөн нэг талд бич
Хичээлийн тэмдэглэл хийхдээ хуудасны зөвхөн нэг талд бичих. Харин нөгөө талд нь номоос тухайн сэдвээр уншсан зүйлүүд, мөн тухайн сэдэвтэй холбоотой гэрийн даалгавар, бие дааж хийсэн дасгал, бодлогууд гэх мэтийн нэмэлт материалуудыг бичиж болно.
Бичих талбараа хуваарилах
Хуудсаа ямар ч зай завсаргүй болтол нь бичих хэрэггүй. Харин үүний оронд бичих талбараа хувааж эмх цэгцтэй байдлаар хөтөлж болно. Бичих талбараа дараах байдлаар хуваарилах боломжтой.
Үүнд:
- Гарчиг хэсэгт он сар өдөр, хичээлийн нэр, сэдвийн гарчиг, лекцийн дугаар, багшийн нэрийг бичнэ
- Сануулга хэсэгт тухайн лекцээс сайн ойлгоогүй зүйлс, дэлгэрүүлж унших номын нэр, тогтооход хэцүү нэр томьёо, гадаад хэллэгүүд гэх мэт тэмдэглэх боломжтой
- Нэмэлт мэдээлэл хэсэгт лекцийн явцад багшийн хийсэн нэмэлт тайлбар, нэр томьёонуудын гадаад хэл дээрх орчуулга, тухайн сэдэвтэй холбоотой өөрийн санаад бууж ирсэн жишээнүүдийг тэмдэглэж ашиглаж болно.
.jpg)
Товчлол хийх
Хичээлийн тэмдэглэл хийхдээ товчилж бичиж болох үг бүрд товчлол хийж болно. Харин нэр томьёо, гадаад үг, мэргэжлийн хэллэгүүдийг бүтнээр нь бичих нь зүйтэй.
Тодруулагч хэрэглэх
Зарим оюутнууд зөвхөн нэг өнгийн үзэг буюу тосон балаар лекцээ бичдэг. Ингэж дан ганц өнгөөр тэмдэглэсэн ямар ч бичвэрийг уншихад төвөгтэй байдаг. Харин тэмдэглэлдээ өвөрмөц дүрслэл, схем оруулж, улаан харандаа болон тод өнгийн тодруулагч хэрэглэж дадах нь хичээлээ уншиж, тогтооход хялбар болгодог.
Эх сурвалжуудыг тэмдэглэх
Лекцийн үеэр тухайн сэдвийн талаар дэлгэрүүлж уншиж болох ном, сонин, веб хуудас гэх мэт эх сурвалжуудыг сайн тэмдэглэж ав. Сүүлд нь шалгалтад бэлдэх, илтгэл, реферат, курсийн ажил, дипломын ажил бичихэд хэрэг болно. Эх сурвалжийн тэмдэглэгээг хуудасны аль нэг хэсэгт тогтмол бичиж хэвших нь зүйтэй.
