Оффисын ихэнх ажилтан өдөрт 9 болон түүнээс дээш цагийг ажил дээрээ өнгөрүүлдэг. Иймээс ч бизнесийн амжилтад нөлөөлөгч хүчин зүйлсийн нэг нь ажлын байрны тав тух юм.
Ажил олгогчдын хувьд ажилдаа чин сэтгэлээсээ ханддаг, бүтээмж өндөртэй, ёс суртахуунтай ажилтнууд бүхнээс чухал байдаг билээ. Тав тухтай оффис нь ажилтнуудын бүтээмжийг нэмэгдүүлээд зогсохгүй, байгууллагын эрүүл уур амьсгалыг бүрдүүлэхэд асар том хувь нэмэр оруулдаг билээ. Харин нас насны ялгаа бүхий ажилтнуудынхаа хэрэгцээнд нийцсэн тэрхүү сайхан ажиллах орчныг төсөвт багтсан, бүгдэд таашаагдсан байдлаар бүрдүүлэхэд сайтар боловсруулсан төлөвлөгөө хэрэгтэй.
Бизнес эрхлэгч та ажлынхаа орчинг сайжруулж, дараах эерэг өөрчлөлтүүдийг бий болгоход анхаараарай.
Ажилтны ажилдаа дуртай байдал
Өглөөний нарнаас үдшийн бүрий хүртэл оффист суудаг ажилтнуудад ажиллах орчны тав тухтай байдал нь тэднийг бусадтай найрсаг харилцаа үүсгэхэд амин чухал байдаг. Иймээс ч ажил олгогчийн хувьд ажилдаа дуртай, хамт олонтойгоо нийцтэй ажилтанг “бий болгох”-ын тулд түүний ажиллах орчныг бэлдэж өгөх хэрэгтэй. Ингэснээр тухайн ажилтанд бизнес болон нийгмийн харилцаанд бусадтай харилцахад хялбар болно.
Үр өгөөжийг нэмэгдүүлэх
Судлаачдын дүгнэлтээр, аливаа ажилтан ширээнийхээ ард нийт ажлын цагийнхаа ердөө 40%-г л өнгөрүүлдэг байна. Иймээс ажиллах орчныг бүрдүүлэхдээ тухайн ажилтны хувийн орон зай болон бусадтай харилцах орон зайны тэнцвэрт байдлыг хангах нь чухал. Мэдээж энэ нь ажил үүргийн онцлог, ажиллаж буй салбараас ихээхэн шалтгаалах болно.
Боломжит дизайн
Ажиллах орчны дизайн ихэнх тохиолдолд тухайн байгууллагын төсөвт баригддаг. Гэсэн ч байгуулагуудын гаргадаг нийтлэг алдаа нь үр өгөөжөө өгөхгүй зүйлд хэт их төсөв мөнгө зарцуулдаг атлаа, хамгийн өндөр үр өгөөжтэй зүйлсээ үл тоомсорлодог явдал юм. Үүнд ажлын байрны тав тух ч багтана. Иймээс тогны хэт өндөр зардал гэх мэт шаардлагагүй зардлаа танаж, түүгээрээ боломжийн үнэтэй хэрнээ тав тухтай орчныг бүрдүүлэхэд анхаарах нь зүйтэй.
