ТикТок сүлжээний блогчид #cancelbalenciaga хэштегтэйгээр Balenciaga брэндийг бойкотлох аяныг өрнүүлжээ. ТикТокчид энэ брэндийн цүнхийг хайчилж уран, саяхан авсан гуталнуудаа хаяж, өндөр үнээр зарагддаг пүүзнүүдээ шатааж байгаа бичлэгийг хийж эхэлсэн байна. Тэд ийн Balenciaga-г бойкотлох болсон нь загвар өмсөгч хүүхдүүдийг оролцуулан хийсэн сурталчилгаанаас үүдэлтэй аж.
Форбс сэтгүүлийн мэдээлснээр, #cancelbalenciaga хэштегтэйгээр эхлүүлсэн энэ аянд нэгдсэн блогчид төрөл бүрийн бичлэг оруулж байгаагийн дотор нэгэн хэрэглэгч 895 долларын үнэтэй гутлаа хаяж, өөр нэг хэрэглэгч 500 долларын үнэтэй цүнхээ хайчилжээ. Түүнчлэн үзэгчдэд эсэргүүцлээ тодоор илэрхийлэхийн тулд брэндийн шошгыг харуулан, хэдэн хэсэг болгон хайчлах аж.
Ийнхүү эсэргүүцэл дэгдэх болсон нь загвар өмсөгч хүүхдүүдийг оролцуулан авсан сурталчилгааны зураг авалттай холбоотой юм байна. Balenciaga брэнд Адидастай хослуулсан Garde-Robe цувралынхаа сурталчилгааг танилцуулжээ. Энэ сурталчилгаанд моделиуд офис хэв маягтай, олон цаас бүхий өрөөнд зогсох аж. Гагцхүү эдгээр цааснууд нь алдарт брэндийг эсэргүүцэх шалтгаан болжээ.
Зурган дээр байх нэг цаасан дээр “порнограф”, “секс” гэсэн үг байгааг хүмүүс анзаарсан бөгөөд түүнчлэн нүцгэн хүүхдүүдийн дүрслэлээрээ алдартай зураач Микаэл Борремансын ном ч байсан гэнэ. Мөн гол асуудал нь хүүхдүүдийн гарт байгаа бамбарууш гэж олон нийт шүүмжилжээ. Хүүхдийн гарт байгаа чихмэл бамбарууш савхин бүс, цоож, гавтай хүзүүвчтэй байгаа нь садар самууныг илтгэсэн хэрэг гэж олон нийтийн сүлжээний хэрэглэгчид үзсэн байна. Тиймээс олон нийт үүнийг “хүүхдүүдийг порнографт ашигласан” хэмээн буруутгаж, Balenciaga-г бойкотлох болсон байна.
Ийнхүү шүүмжлүүлснийхээ хариуд Balenciaga албан ёсны мэдэгдэл гаргаж, хүүхдийн эрхийг хамгаалах байгууллагуудтай хамтран ажиллана хэмээн мэдэгдсэн байна. Гэхдээ чухам ямар байгууллагатай хамтрах талаараа тодорхой мэдээлэл өгөөгүй, түүнчлэн уучлалт гуйсан ч энэ зураг авалтад буруутай этгээдүүдийн талаар зарлаагүй нь олны дургүйцлийг төрүүлсээр байгаа аж.
Г.Бямбасүрэн
http://www.shuud.mn/a/545200