Дэлхийн сонгодог урлагийн урын санд томоохон байр суурийг эзэлсэн “Щелкунчик ба гайхамшгийн орон” балетын жүжгийг “Элит балет” компани нь ерөнхий найруулагч Ц.Цолмонбудын найруулгаар 2019 онд Солонгосын үзэгчдэд толилуулсан юм байна. Харин 2021 онд дахин шинэчлэн тоглохдоо медиа арт урлагтай хослуулсан нь солонгосын үзэгчдээс өндөр үнэлгээ авчээ. Улмаар тус компани нь медиа арт урлагийг балетын урлагтай хослуулснаараа олон улсад анхдагч болж чадсан байна.
“Щелкунчик ба гайхамшгийн орон” медиа арт балетын бүжгэн жүжигт гарах Клара охины зүүдэн дэх Хулганы орон, Цасны орон, Гайхамшгийн орон зэрэг шидэт ертөнцийг бодит мэт төсөөлөгдөхүйцээр бүтээн Projection Mapping, Hologram, 3D background, Video effects бүхий шинэлэг шийдэл, сүүлийн үеийн технологийг ашиглан Монголд урьд өмнө тоглогдож байгаагүй уран бүтээлийг үзүүлэхэд бэлэн болсон гэдгийг өнөөдөр мэдээллээ.
Тоглолтонд олон улсын балетын тэмцээний шагналт Монгол, Солонгосын шилдэг уран бүтээлчид болон циркчид оролцох юм байна. Балетын урлаг бол олон зуун жилийн түүхтэй. Гэхдээ бүхий л зүйл шинэчлэгдэн өөрчлөгдөж буй өнөө үед балетын сонгодог хэлбэрийг хадгалахын зэрэгцээ технологийн тусламжтайгаар үйл явдал бүрийг тодотгож өгч буй нь энэ уран бүтээлийн онцлог аж. Түүнчлэн Степпе Ареана буюу Мөсөн өргөө бол Монгол Улсад ийм төрлийн бүтээлийг толилуулах боломжтой цор ганц техник технологийн шаардлага хангасан газар бөгөөд энэ удаад Монголын нэгэн гайхамшигт уран бүтээлчийн санаачлагаар олон улсад анх удаа медиа арттай хослуулан шинэчилсэн найруулгатайгаар бүтээсэн дэлхийн үзэгчдийн хайртай “Щелкунчик ба гайхамшгийн орон” бүжгэн жүжгийг шинэ жилийн баярын бэлэг болгон та бүхэнд толилуулах гэж байна.
Тоглолт Степпе Ареанад гурван өдөр болох бөгөөд энэ сарын 31-ний эхний өдрийн тоглолтын дараа шинэ жилийн арга хэмжээ үргэлжилж, уран бүтээлчидтэй хамт шинэ оноо гарган гайхалтай дурсамж бүтээлцэх боломжтой гэдгийг уран бүтээлчдийн зүгээс онцлон дуулгалаа.
