Уран гулгалтын олимпын аварга Камила Валиева ирэх хавар Монголд үзүүлэх тоглолт хийх мэдээ манай хоёр орны спортын хэвлэлийн нэгэн гол үйл явдал болоод байгаа.
Түүний харьяалагддаг баг болох Оросын “Самбо‑70” төвийн ерөнхийлөгч Ренат Лайшев энэ талаар “Матч ТВ”-д сэтгэгдлээ хуваалцлаа.
Ренат Лайшев “Оросын жүдочид Монголд өнгөрсөн жил болсон тэмцээнд маш амжилттай оролцсоныг бүгд санаж байгаа. Монгол Улс манай тамирчдыг тэмцээн, уралдаанд оролцоход ямар ч саад тавьдаггүй. Ийм нөхөрсөг орнууд хүнд үед нэг нэгэндээ тусалдаг юм. Монгол шиг орнууд улам олон болно. Оросын спортыг хорионд оруулсан нь сайн зүйлд хүргэхгүй, улс орнууд ч залхаж эхлээд байна. Татьяна Навкагийн арга хэмжээн дээр би Камилатай уулзсан. Форм маш сайтай, сэтгэл санаа нь өөдрөг байсан. Камила Монголд очиж, үзэгчдийн өмнө гулгахад ямар ч асуудал байхгүй. Гол нь сэтгэл зүй. Гэхдээ тэр 16 настайдаа маш их дарамтыг даван гарсан охин. Валиева тэмцээн уралдаан, үзүүлэх тоглолтод орох боломжоос татгалзахгүй. Гэхдээ мэдээж дасгалжуулагч Этери Тутберидзе шийднэ. Спортын талаасаа хэрэгтэй гэж Этери үзвэл Камила Монголд очно” гэж ярьжээ.
