Хүүхдийн баяраар гэлтгүй зуны дэлгэр цагт нийслэлийн хүүхдүүд паркад очоод тоглох шиг аз жаргал бараг үгүй. Паркад очоод завинд сууж, алсыг харж, мангасын аманд гулгаж, дээрэмчний завинд сууна гэдэг нь мөрөөдөл болоход ойрхон байна. Учир нь мөнгө, эрх мэдэлтэй томчууд хүүхдийн паркийн газраас хумсалж, хүүхэд багачуудад алга дарам ч газар үлдэхгүй байх магадлал өндөр байна. Паркийн газарт Монголын аль том гэсэн бизнесийн байгууллагууд тал талаас нь уулгалан дайрсаар байгаа энэ асуудлыг Монголын залуучуудын холбоо /МЗХ/-ноос хөндөж саяхан Төрийн ордны “Иргэний танхим”-д “Паркаа аваръя” хэлэлцүүлэг өрнүүлсэн юм.
Тус хэлэлцүүлэгт МЗХ-ны ерөнхийлөгч А.Мөнхбат, Нийслэлийн газрын албаны дарга М.Батсайхан, “Үндэсний соёл амралтын хүрээлэн” ХХК-ийн гүйцэтгэх захирал Б.Батнягт, болон паркийн газрыг эзэмшигч MCS группийн “MCS Пропертиз” компанийн гүйцэтгэх захирал Б.Даваа-Очир, “Мон-уран” компанийн эзэн, УИХ-ын гишүүн Б.Наранхүү, “Сөүл” группийн зөвлөх А.Энхтөр болон залуусын төлөөлөл оролцсон.
Харин Үндэсний соёл амралтын хүрээлэнгийн 74 хувийг эзэмшдэг “Бодь” группийн төлөөлөл ирээгүй юм. Цугларагсад өнгөн талдаа хүүхдийн паркийн газраас хумслахгүй байх тухай өчнөөн л сайхан зүйл ярив. Тухайлбал, УИХын гишүүн Б.Наранхүү өөрийгөө өмгөөлж, өрөөл бусад нь хумсалсан газраа паркад нь буцааж өгвөл би ч гэсэн өгнө хэмээн “шударга” загнасан. Түүний ярьснаар бол “Голомт”-ын захирал Баясгалан уг газрыг ганцаар эзэмшихийн тулд Б.Наранхүүгийн “Мон-уран”-ыг буруутгасан зүйл ярьжээ. “Монуран” хүүхдийн паркийн газраас 1.1 га-г эзэмшдэг юм байна.
Тэрбээр нэгэнт л бүгд шударга бусаар газар эзэмшиж байгаа, тиймээс бусад нь газраа өгвөл би ч өгнө гэсэн утгатай уриалга гаргасан. Гэхдээ би эхлээд өглөө, та нар дараа нь өгөөрэй гэж хэлж чадсангүй. Газрын төлөөх цусгүй дайнд улайрдаг МСS, “Сөүл” болон бусад байгууллага мэдээж түүний уриалгыг дэмжээгүй билээ. Бүгд л хууль ёсны дагуу газраа авсан хэмээцгээв. Б.Наранхүү хэсэг ярьсныхаа дараа дээрх үгнээсээ буцаж “Ерөөсөө бүгдээрээ нийлж хөрөнгө оруулаад паркаа сэргээе. Тэгээд 10 жил хүүхдүүдийг үнэгүй тоглуулъя” гэсэн юм. Тоглоомных нь үнийг дийлдэггүй учраас парк гэдэг мөрөөдлийн газар болон хувирдаг хүүхэд олон тул түүний үг бас ч гэж авууштай л санаа байлаа.
ПАРКИЙН ГАЗАР ОДОО ЯГ ХЭНИЙ ЭЗЭМШИЛД БАЙНА ВЭ
Нийслэлийн Засаг даргын 1998 оны тавдугаар сарын 20-ны өдрийн А125 дугаар захирамжаар анх “Монтана” компанид Үндэсний соёл амралтын хүрээлэнгийн хашааны хойд талд ажлын байрны барилга барих зориулалтаар 0.5 га газар гурван жилийн хугацаатай олгосон байна. Дараа нь 2002 онд эзэмших эрхийг нь дөрвөн жилээр сунгажээ. Улмаар Үндэсний соёл амралтын хүрээлэнг шинэчлэх төсөлтэй холбогдуулан нийслэлийн Засаг даргын 2005 онд 263 тоот захирамж гарч, тус компанийн эзэмших эрхийг хүчингүй болгосон аж. Гэвч тус компаниас захиргааны хэргийн шүүхэд гомдол гаргаж, 2006 онд УДШийн хяналтын шатны захиргааны хэргийн шүүх хуралдаанаар газар ашиглах зөвшөөрлөө сэргээжээ.
Ингээд “Монтана” компани MCS групптэй хамтран ажиллах гэрээ байгуулж, хүсэлт гаргасны дагуу нийслэлийн Засаг даргын 2007 оны захирамжаар MCS-д 4900 ам.метр газрыг үйлчилгээ, зочид буудлын зориулалтаар эзэмшүүлэх болсон байна. Харин MCS эзэмшил газартаа Хонгконгтой хамтарч 300-400 сая долларын хөрөнгө оруулалттай таван одтой “Шангрила” зочид буудал барихаар болж, газрын хэмжээг нэмэх хүсэлт гаргасныг тухайн үеийн Засаг дарга зөвшөөрч, 0.5 га газрыг нь гурван га болгон нэмжээ. Энэ маягаар MCS компани хүүхдийн паркийн газраас, гурван га газрыг эзэмшсэн аж.
Тэгвэл “Сөүл” групп өмөнө нь ажиллаж байсан “Туяа” рестораныг хувьчилж авсан бөгөөд нийслэлийн Засаг даргын 2001 оны арваннэгдүгээр сарын 07- ны өдрийн 510 тоот захирамжаар газраа өөрийн болгож авсан байна. Улмаар 2008 онд эзэмших эрхээ иргэн н.Өнөрболорт шилжүүлсэн аж. Харин ““Мон-Уран” ХХКийг паркийн газрыг хууль бусаар авсан гэлцдэг билээ. Учир нь 1998 оны арванхоёрдугаар сарын 9-нд паркийн баруун хойд хэсэгт Монголын теннисний холбоонд гурван жилийн гэрээтэй теннисний талбай байгуулах тухай шийдвэрийг хотын захиргаанаас гаргаж байжээ.
Гэтэл энэ газарт нь “МонУран” ХХК хууль бусаар барилга барьсан аж. Тиймээс Монголын теннисийн холбооноос гомдол гаргаж, газар чөлөөлөх тухай нэхэмжлэлийг Сүхбаатар дүүргийн шүүхэд гаргасан байна. Анхан шатны шүүх 2004 оны аравдугаар сарын 19 өдрийн 1186 шүүхийн захирамжаараа нэхэмжлэлийг хэрэгсэхгүй болгожээ. Энэ үеэс эхлэн 14 жил паркийн газрыг эзэмшсэн Б.Наранхүү өнөөдөр “Төрийн байгууллагын удирдлагууд авлигад орооцолдсон байхад одоо биднийг хууль бусаар газар авсан гэх нь буруу. Нураана, буулгана, булаана гэх нь зохимжгүй. Харин цаашид ийм байдал гаргахгүй л байх хэрэгтэй” хэмээн хээв нэг хэлсэн юм. Түүний ил цагаахан шоуг эс тооцвол газраас хумслагчдын хэн нь ч газраа эргүүлж өгөх санал хэлээгүй байна. Түүний хэлснээр “Бодь” групп бусад компаниа жийж, өөрөө эзэн суух гэв үү, эсвэл жүжиг зохиож нийлж өмчлөх гээд байна уу.
52 ЖИЛИЙН ДАРААХЬ ЗАЛУУСЫН ТЭМЦЭЛ ЮУНЫ ТӨЛӨӨ ВЭ
Анх 1960 онд Монголын хувьсгалт залуучуудын холбоо / МХЗХ/-ны гишүүд өнөөдрийн парк байгаа газрын талбайг нь засч, цэвэрлэжээ. Ингээд 1965 онд энэхүү газрыг намын Төв хорооны Улстөрийн товчооны тогтоолоор “Хүүхэд залуучуудын парк” болгохоор шийдвэрлэсэн байна. Улмаар 1966-1969 онд Ардчилсан Герман, Лениний коммунист залуучуудын эвлэл, Зөвлөлтын барилгынхан өөрсдийн хөрөнгөөр тоглоомын талбай байгуулж өгчээ. Харин энэхүү хүүхэд залуусын эзэмшлийн газрыг нийслэлийн Засаг даргын 1997 оны нэгдүгээр сарын 3-ны өдрийн 1003 тоот захирамжаар, Сүхбаатар дүүргийн нэгдүгээр хорооны нутаг дэвсгэрт амралт зугаалгын цогцолборын зориулалтаар баталгаажуулж байв.
Үүний дараа буюу 2007 оны арваннэгдүгээр сарын 19-ний өдөр газар эзэмших хугацааг сунгаж, амралт зугаалгын зориулалтаар 32 га газрыг эзэмшүүлэх эрхийг нийслэлийн Засаг даргын 577 тоот захирамжаар баталгаажуулж, газар ашиглах гэрчилгээг олгосон байна. Гэвч НИТХ-ын 2005 оны есдүгээр сарын 21-ний өдрийн 188 тоот тогтоолоор “Монголын үндэсний соёл амралтын хүрээлэн” НӨҮГыг татан буулгаж, Улаанбаатар хот Японы “Иточу” корпорацийн хамтарсан компани байгуулж үйл ажиллагааг нь эхлүүлсэн байна.
Өөрөөр хэлбэл, 52 жилийн өмнө Монголын хувьсгалт залуучуудын холбооны залуучууд цэвэрлэн байж байгуулсан паркийн газрыг өнөөдөр уг залуучуудын байгууллагын залгамж халаа болсон Монголын залуучуудын холбоо аврахаар ярьж байгаа юм. Гэхдээ юм бүхэн улстөрийн зорилготой, цаанаа ямар нэгэн эрх ашиг нуугддаг болсон өнөө цагт Монголын залуучуудын холбооны удирдлагыг хүүхдийн паркийг аврахаар жинхэнээсээ явж байгаа гэдэгт эргэлзэж байна. Тэднийг “Бодь”-ийн захиалгаар шоу хийж байна гэх хардлага бусад газар эзэмшигчдийн дунд тархжээ.
М.НАРАНБОЛД
Эх сурвалж: www.UNEN.mn
