КАНБЕРРА. /ABC/. Эмэгтэйчүүдийн хөл бөмбөгийн 2023 оны дэлхийн аварга шалгаруулах тэмцээний /ДАШТ/ хагас сая гаруй тасалбар худалдаалагдаад байгаа талаар Олон улсын хөл бөмбөгийн холбоо /ОУХБХ/, Австралийн хөл бөмбөгийн холбооноос өнөөдөр мэдээлжээ.
Австрали, Шинэ Зеландад энэ оны 7-8 дугаар сард болох эмэгтэйчүүдийн хөл бөмбөгийн ес дэх удаагийн ДАШТ-ий тасалбарыг 120 гаруй улс орон, бүс нутгийн хөгжөөн дэмжигчид, тэр дундаа зохион байгуулагч хоёр орноос гадна Англи, Катар, АНУ, Хятад, Канадын иргэд хамгийн ихээр худалдан авчээ. Энэхүү тэмцээн нь 32 баг өрсөлдөх анхны тэмцээн гэдгээрээ онцлогтой.
ДАШТ-ий тоглолтуудаас Сидней хотын “Stadium Australia” цэнгэлдэх хүрээлэнд наймдугаар сарын 20-ны өдөр болох шувтаргын тоглолтын тасалбар хамгийн эрэлттэй байна. Мягмар гарагт ОУХБХ тэмцээний тасалбарын борлуулалт өнгөрсөн долоо хоногт 500 мянгын босгыг давсан талаар мэдээлээд, тэмцээн эхлэхэд 184 хоногийн хугацаа үлдээд байгаа үед нааштай эхлэл болж байгааг цохон тэмдэглэжээ.
ОУХБХ энэ удаагийн эмэгтэйчүүдийн хөл бөмбөгийн ДАШТ-ээр Канадад 2015 онд болсон тэмцээний /1.35 сая/ амжилтыг ахиулан 1.5 сая тасалбар борлуулахыг зорьж байгаа аж. Дөрвөн жилийн өмнө Францад болсон ДАШТ-ийг 1.13 сая хөгжөөн дэмжигч үзэж сонирхож байжээ.
https://montsame.mn/mn/read/311465
