Майкл Жексоны дүрийг үеэл дүү нь бүтээнэ

Попын хаан Майкл Жексоны амьдралаас сэдэвлэсэн “Michael” киноны гол дүрийг түүний үеэл дүү, 26 настай дуучин Жаафар Жексон бүтээхээр болжээ. Найруулагч Антуан Фукуаны “Michael” киноны зураг авалт энэ онд эхлэх бөгөөд гол дүрийн сонгон шалгаруулалтад мянга мянган жүжигчид орж, эцэст нь Жаафар Жексон шалгарчээ.Жаафар Жексон нь Майкл Жексоны дүү, “Jackson 5” хамтлагийн дуучин Жермен Жексоны хүү бөгөөд дуучин, дууны үг зохиогч, залуу уран бүтээлч юм. Найруулагч Антуан Фукуан “Би хоёр жилийн өмнө Жаафартай сонгон шалгаруулалтын үеэр уулзахад яг л “Bohemian Rhapsody” кинонд Фредди Меркуригийн дүрд Рами Малекийг сонгосон “Тэр л цор ганц сонголт” гэх мэдрэмж төрсөн. Авга ах Майкл Жексонтой биеийн хэлэмжийн хувьд ч төстэй төдийгүй камертай харьцах гайхалтай ур чадвартай уран бүтээлч. Дэлхий ертөнцөд тэр попын хааныг эргэн амьдруулах болно” гэжээ.