Сүүлийн жилүүдэд дэлхийн олон оронд Хятадаас гаралтай гуаша массаж ихээхэн дэлгэрсэн. Энэ иллэгийн ачаар үрчлээ татагдаж, нүүр зөв хэлбэртэй болно гэж сурталчлах нь элбэг. Харин олон орны эмч мэргэжилтнүүд гуаша массажийн үр дүнд ихээхэн эргэлздэгийн дээр, арьс унжих аюултай гэдгийг сэрэмжлүүлжээ.
Тухайлбал, Москвагийн Анагаах ухааны улсын их сургуулийн Арьс, бэлгийн замын өвчний эмнэлгийн арьсны эмч, анагаах ухааны дэд эрдэмтэн Елена Морозова гуаша ашиглан хөгшрөлттэй тэмцэх нь үр дүнгүй, харин арьс унжих эрсдэлтэй гэдгийг сануулсныг “Москва” агентлаг дамжуулсан байна. Эмчийн өгүүлснээр, гуаша ашиглан иллэг хийснээр цусны эргэлтийг сайжруулдаг, гэхдээ олон хүний итгэдэг шиг залуужуулах үр дүн үзүүлдэггүй аж.
“Энэ аргын гол зориулалт нь хөгшрөлтийн эсрэг биш. Ийм иллэг үрчлээнд нөлөөлж чадахгүй. Харин цусны эргэлтийг дэмжсэнээр арьсны өнгийг сайжруулж, арьсанд ирэх тэжээлийг нэмэгдүүлэх боломжтой. Хялгасан үрчлээ үл мэдэгдэм болж болох юм. Харин үрчлээ, хөгшрөлттэй тэмцэх гэж энэ аргыг хэрэглэж болохгүй. Гуаша хэрэглэснээр арьс татагдаж, унжина” хэмээн Елена Морозова өгүүлжээ.
Түүний өгүүлснээр, гуаша иллэг хийлгэснээр хаван бууж, булчин суллахад нөлөөлөх ч өөрөө хийх хэрэггүй гэнэ.
“Энэ иллэгийг буруу хийснээр эрүүл арьсанд муугаар нөлөөлнө. Тиймээс өөрөө өөртөө ийм иллэг хийхгүй байсан нь дээр” гэж Морозрова онцолжээ.
Түүнчлэн арьсны өвчлөлтэй хүмүүс чулуун роллер эсвэл гуаша хэрэглэвэл арьсыг улам гэмтээх эрсдэлтэй гэдгийг анхааруулсан байна. Батга гарсан, үрэвссэн арьсанд ямар ч иллэг хийж болохгүй гэдгийг сануулжээ. Харин чулуун роллер болон гуаша ихээхэн алдаршсан нь олон нийтийн сүлжээний нөлөө гэж тэрбээр үзсэн байна.
“Гуаша иллэгийг Хятадын анагаах ухаанд ашиглаж байсан, одоо ч ашигладаг. Гэхдээ нүүрэнд биш биенд хийдэг юм. Биеийн тодорхой цэгүүдэд тусгай аргаар хийдэг. Нүүрэнд хийдэг гэх арга ингэтлээ алдаршсан нь олон нийтийн сүлжээний нөлөө байх гэж бодож байна” хэмээн эмч өгүүлжээ.
Г.Бямбасүрэн
http://www.shuud.mn/a/547641
