Аппарат зүүхийн өмнө
Эрүү нүүр, гажиг заслын эмч аппарат, зэмсгийн тусламжтайгаар шүдний эгнээ байр, зуултыг хэвийн харьцаатай болгохыг “Гажиг заслын эмчилгээ” гэнэ. Хэрвээ та аппарат зүүхээр төлөвлөсөн бол дараах хэд хэдэн зүйлийг анхаарах нь чухал.
- Юун түрүүнд өөрт чинь ямар төрлийн эмчилгээ тохиромжтойг судлах.
- Гажиг заслын нарийн мэргэжлийн эмчид үзүүлж, өөрийн шүдний гажиг болон шүдний аппаратын төрлүүд, тэдгээрийн ялгааг мэдэх хэрэгтэй.
- Мөнгө, санхүү эдийн засгаа тооцоолох. Учир нь аппарат зүүх урт хугацааны үйл явц тул аппаратын үндсэн үнээс гадна сарын бүрийн чангалгааны мөнгө, эрүү нүүрний рентген зураг, зүүхийн өмнөх эмчилгээний төлбөр зэрэгт багагүй мөнгө зарцуулах хэрэг гарна. Тийм учраас аль болох боломжийн үнэ ханштай, гэхдээ бодит үр дүнд хүргэх гажиг заслын эмнэлгийг сонгох хэрэгтэй.
- Аль хэдийн аппарат зүүхээр шийдсэн бол мэргэжлийн ур чадвартай эмч дээр аппаратаа хийлгэвэл зүгээр. Учир нь аппарат зүүхээс эхлээд авах хүртэлх хугацаанд нэг л эмчийн төлөвлөгөө, графикаар явах тул энэ алхам маш чухал.
- Авагддаг болон авагддаггүй, металл, шаазан гэх мэт аппаратын төрөл олон янз бий. Эдгээр аппаратын аль нэгийг сонгосны дараагаар хэдий хэр хугацаанд зүүх шаардлагатайг эмч танд хэлж өгнө. Энэ нь мэдээж таны шүдний гажгаас хамаараад харилцан адилгүй. Шүдний аппаратыг дунджаар 1-3 жилийн хугацаанд зүүдэг.
Аппарат зүүсний дараа
- Аппарат зүүсний дараа хамгийн түрүүнд анхаарах зүйл бол “хоол хүнсний хэрэглээ”.
Нүүр усны агууламж ихтэй, наалдамхай хоол хүнс нь аппаратын завсраар сойз хүрэхгүй хэсэгт үлдэж, цоорол үүсгэх эрсдэлтэй байдаг. Мөн хатуу самар, хатаасан жимс, резинэн чихэр, өнгө оруулсан газтай болон газгүй ундаа, кофе, ааруул зэргээс аль болох татгалзах хэрэгтэй. Тогтсон хугацаандаа аппаратаа чангалуулах, BRACKET-ээ аль болох унагаахгүй байх, амны хөндийн эрүүл ахуйг сайтар сахих зэрэг нь эмчилгээний үр дүнтэй шууд холбоотой.
- Шүдний аппарат зүүсний дараа шүдэн дээр өнгөр тогтох магадлал 2-3 дахин ихэсдэг тул ямар нэг зүйл идсэний дараа шүдээ тогтмол угааж цэвэрлэх нь чухал.
