Цар тахлын улмаас гурван жилийн туршид олон нийтийн газарт амны хаалттай явахаас аргагүй байсан япончууд энэ хугацаанд хэрхэн инээмсэглэдгээ “мартсан” гэнэ. Тиймдээ ч бусад руу найрсгаар инээж сурахын тулд тусгай зөвлөгчид хандах нь эрс нэмэгдсэн талаар Japan Times мэдээлжээ.
Тодруулбал, хүмүүст нүүр, хүзүүний булчингаа хэрхэн чангалж, суллах хичээл орж, инээмсэглэл заах дамжаанууд ихээхэн алдартай болсон гэнэ. Ийм дамжааг анх радиогийн хөтлөгч Кейко Кавано 2017 онд нэвтрүүлж байжээ. Тэрбээр 4000 гаруй хүнд инээмсэглэх хичээл зааж, түүгээр зогсохгүй мэргэшсэн 700 “инээмсэглэлийн мэргэжилтэн” бэлтгэн гаргажээ.
Сүүлийн үед энэ үйлчилгээний эрэлт эрс нэмэгдсэн гэнэ. Гурван жилийн хугацаанд амны хаалт зүүж, инээмсэглэхээ мартсан хүмүүс ихээр хандаж байгаа аж.
“Амны хаалтандаа хэт их дасчихсан, яаж инээмсэглэхээ ч мэдэхгүй байна гэсээр хүмүүс ирдэг” хэмээн инээмсэглэлийн дасгалжуулагч Михо Катано өгүүлжээ.
Инээмсэглэх хичээл нь биеийн бусад хэсгийг хөгжүүлэхийн тулд хийдэг бэлтгэлтэй адилхан гэж мэргэжилтнүүд онцолдог аж. Стандарт дасгал бие халаалтаас эхлэх бөгөөд дараа нь бэлтгэл хийж буй хүнд жижиг толь бариулж, дасгалжуулагчийн зааварчилгааг даган нүүрний булчингаа хэрхэн зөв ажиллуулах, баяр баясгалан, аз жаргалаа хэрхэн илэрхийлэх бэлтгэл хийдэг гэнэ.
Г.Бямбасүрэн
http://www.shuud.mn/a/549724
