Norwegian Cruise Line компанийн судалгаагаар бол гурван аялагч тутмын нэг нь амьдралдаа дор хаяж нэг удаа ганцаараа аялж үзэх хүсэл сонирхолтой байдаг аж. Ялангуяа ахимаг насны эмэгтэйчүүд дэлхийн аль нэг улс руу, хаа нэгтээ ганцаараа аялахыг илүүд үзэх болсон бөгөөд “Virtuoso” аялал жуулчлалын холбооноос 2022 онд хийсэн судалгаанаас үзвэл ганцаараа аялалд гарсан эмэгтэйчүүдийн 18 хувь нь 65-аас дээш насны эмэгтэй байжээ. Ганцаар аялагчдад ээлтэй, хүйсээр ялгаварлалт, хүчирхийлэл багатай эхний таван орныг Эмэгтэйчүүдийн аюулгүй байдлын индекс (WPS) болон Дэлхийн энхтайвны индекс (PGP)-ийн үр дүн, эмэгтэй аялагчдын сэтгэгдэлд үндэслэн тодруулжээ.
Словени-“The Detour Effect” аяллын блог хөтлөгч, явган аялагч Клэр Рамсделл анх Словенийн нийслэл Любляна хотод ирээд гэрэл зураг дарж, шөнө оройн цагаар ганцаараа явахад аюулгүй тайван байсан бөгөөд хэлний бэрхшээлээс өөр асуудал гараагүйг онцлон дурдсан байдаг. Ганцаараа аялж яваа гэдгээ сэтгэл түгшин нуух шаардлагагүй байснаас гадна нийтийн тээврийн үйлчилгээ нь ч тун найдвартай байсан нь маш их таалагдсан гэжээ. Айх аюулгүй, амар тайван ганцаараа аялахад хамгийн тохиромжтой газрын нэг бол Словени улс юм.
Руанда- Аялагч Ребекка Хансений хэлж буйгаар Руанда бол энхтайван аюулгүй байдлын баталгаа болсон улс бөгөөд бүхий л байршилд өдөр, шөнө алинд ч цагдаа, цэрэг, хамгаалалтынхан ажиллаж байдаг аж. Англи, франц хэл нь Руандагийн албан ёсны хэл учраас хэлний бэрхшээлтэй тулгарахгүй. Хэрвээ тэдгээр хэлээр ярьдаггүй бол төөрсөн тохиолдолд дуртайяа зам заагаад өгөх найрсаг ард түмэн тэнд байдаг аж. Тиймээс Африк тивд орших амар тайван Руанда улсад очвол Нюнгве болон Акагера үндэсний цэцэрлэгт хүрээлэнг заавал үзэхийг зөвлөж байна.
АНЭУ–Эмират улс нь Ойрхи Дорнод, Хойд Африкийн орнууд дундаас охид, эмэгтэйчүүдийн боловсрол, эдийн засгийн хараат бус байдалд ихээхэн анхаарч, бүс нутагтаа жендэрийн эрх тэгш байдлыг эрхэмлэгч тэргүүлэгч оронд тооцогддог. Дубай хот “Insure My Trip” аялал жуулчлалын даатгалын компаниас гаргасан шалгуур индексээр эмэгтэй аялагчдад хамгийн ээлтэй, аюулгүй хотоор шалгарчээ.
Япон-Дэлхийн энхтайвны индексээр аюулгүй 10 орныг Япон улс тэргүүлдэг. Зөвхөн эмэгтэйчүүдэд зориулсан байр сууц болон метро, вагоноор үйлчилдэг учир ганцаараа аялагч эмэгтэйд амар тайван, айх айдасгүй нөхцлийг бүрдүүлж, амгалан мэдрэмжийг төрүүлж чаддаг байна.
Норвеги-Дэлхийн жендэрийн тэгш эрх, Дэлхийн аз жаргалтай улс орны 10 дугаарт эрэмбэлэгддэг Норвеги нь нас, хүйс, бэлгийн чиг баримжаа үл харгалзан бүх төрлийн аялагчдад ээлтэй газар гэдгээрээ алдартай юм. Хамгийн гол нь Норвегид бусдын эд зүйлсийг хулгайлах зэрэг хэрэг, зөрчлийн хохирогч болох үзэгдэл харьцангуй бага, аюулгүй оронд тооцогддог тул аялагчдад хамгийн тохитой ажээ.
