Бямба гарагт “Зуны зугаа” тоглолт болж, залуучууд тоглол үзэхээр олноороо цугласан. Тоглолт болсны маргааш Төв цэнгэлдэхийн нөхцөл байдал хотын даргын бухимдлыг төрүүлж, өөрийн цахим хуудсанд байр сууриа илэрхийлсэн нь сошиал идэвхтнүүдийг хоёр талцуулж, “хэрүүлийн алим” болсон.
Тэгвэл “Vandebo” 15 цагийн өмнө цахим хуудсандаа “Цэнгэлдэхийн дотор болон гадна хогийг цэвэрлэлээ. Сошиал орчинд буруу ташаа мэдээлэл явж л байна. Гэхдээ яахав ээ угаасаа тэгдэг л хойно. Энд нэг зүйлийг онцолж хэлмээр байна.
Аливаа шоу тоглолт, фестиваль дууссаны дараа их хэмжээний хог гардаг нь хэвийн үзэгдэл. Ганц манай оронд биш дэлхийн бусад хотуудад ч ийм л байдаг. Хамгийн гол нь тэр хогийг дараа нь цэвэрлэдэг. Яг энэ зарчмаар бид бүх хогийг цэвэрлэж дууслаа. Мэдээж хоггүй цэвэрхэн байхыг хэн хүнгүй л хүснэ шүү дээ.
Бид ч тоглолт эхлэхийн өмнө үзэгчдэдээ хогоо битгий ил задгай хаяарай. Нэг нэгэндээ хүндэтгэлтэй хандаж соёлтой байхыг уриалсан. Дор бүрнээ хичээж байж бидний хүсээд байгаа орчин нийгэм илүү сайхан гэрэл гэгээтэй болно. Тиймээс дан ганц чи дан ганц би гэж хэн нэгэн рүүгээ буруу өгөлгүй хамтдаа л хичээе.
Эцэст нь Vandebo– той хамт байсан үзэгч та бүхэндээ баярлалаа.
Хайртай шүү 
Жич: Тоглоомын талбайн эвдэрсэн бүх зүйлсийг засаж, шинээр сольж өгөхөөр болсон” гэсэн пост оруулсан байна. Ямартай ч тарьсан хогийг залуус цэвэрлэсэн байна.
Гэхдээ эндээс юу харагдаж байна вэ гэвэл тоглолт үзэж, шоунд оролцож байгаа бол залуус “тоглолт үзэх соёлд” суралцах ёстой гэдгийг харуулж байна. Тэнд очсон бүх залуусын хандлага биш ч гэсэн төлөвшөөгүй цөөнх залуусын балаг ийнхүү үеийн нөхдөө нийгэмд чичлүүлэхэд хүргэлээ.
