Найз залуутайгаа муудалцсаныхаа дараа, эсвэл хэн нэгэнтэй тангараг тасарсныхаа дараа “Үүнийг БИ хүсээгүй ш дээ…” гэж бодож байсан уу? Уг нь чи өөрөө маргалдсан шалтгаандаа нэг их ач холбогдол өгөөгүй. Уг нь чи гомдоллосон зүйлийнхээ талаар тайван хүлээж авч байсан. Яг л ховсдуулчихсан юм шиг… Ихэнхдээ бүсгүйчүүд бид найзууд юм уу, бидний харилцаагш хөндлөнгөөс ажиглагчдын үгэнд автаж өөрсдийн хүсээгүй үйлдлээ хийж орхидог. Жаахан байж байгаад хариу бич ээ”
Бид бага байхын л хөвгүүд лүү түрүүлж харц шидэж болохгүй гэсэн бичигдээгүй дүрмийг дагадаг байсан. Гэхдээ ийм дэмий ихэмсэг зангаасаа салаад, хайртдаа арай гэж нээлттэй болж эхэлж байхад л найз чинь чамд энэ үгийг хэлж, дээр нь нэмээд эрчүүд уулын оргил шиг бүсгүйчүүдэд дуртай тухай баахан ухуулга сурталчилгаа хийгээд байвал чи яах вэ? Хэрэв чи хайртыгаа чамд ч бас нээлттэй хандаасай гэж хүсч байвал тоглоом тоглоод дэмий л болов уу. Утастай гэдгээ мартчихдаг хүн шиг мессеж болгонд нь 3 цагийн дараа хариу өгөх гээд хэрэггүй.
“Өөрийгөө жаахан нээ л дээ”
Чи өөрөө ганц бие байхаас залхаж байна гэж гомдоллосон ч бай, эсвэл найзууд чинь чамайг сингл хэвээрээ насыг барах нь гэж айснаас ч болсон бай чи өөрийнхөө амьдралыг бусдын үгээр өөрчлөх хэрэггүй. “Өөрийгөө жаахан эвдээч” гэсэн найзуудынхаа үгнээс болоод танилцах сайтад бүртгүүлж, хүсээгүй уулзалтандаа явж сэтгэлээ хүчлэнэ гэдэг өөрийгөө хуурч байгаагаас ялгаагүй. Ялангуяа энэ бүхэн чиний өнөөдрийг хүртэл амьдарч ирсэн зарчмаас чинь хазайж байвал, чи илүү их урам хугаралтаас өөр юуг ч олж долоохгүй.
Атаархуу найзуудаас болгоомжил
“Би чиний сайн сайхны төлөө л хэлж байна” гэдэг үгээр бүхнийг далдалж болдог болохоор, атаархуу найз нарыг ялгаж салгахад хэцүү байдаг. Гэхдээ үргэлж чиний залууг доош нь хийдэг, эсвэл түүнийг өөр хүнтэй явж байсан тухай хов хүргэдэг эмэгтэйчүүдээс болгоомжлоорой. Хэрэв түүний хэлж байгаа зүйлс үнэхээр үнэн бол, чи түүнийг зөн совингоороо мэдэрнэ. Харин огтхон ч үнэн юм шиг санагдахгүй байвал, атаархуу найзыг дэргэдээ байлгаж байж ч магадгүй.
Тэд та хоёрын хооронд яг үнэндээ юу болоод өнгөрснийг хэзээ ч мэдэхгүй
Чи найзууддаа болсон процессыг бүгдийг нь ярьдаг байж болно л доо. Гэхдээ тэр үйл явдлын цаана юу оршиж байсныг хэзээ ч бүрэн дүүрэн тайлбарлаж чадахгүй. Үүнийг зөвхөн та хоёр өөрсдөө л мэдэрч чадна. Өөрийн бодол өөртөө зөв гэдэг дээ. Зарим тохиолдолд найзуудынхаа ятгалгыг хүлээж авалгүй, өөрийнхөө мэдрэмжинд итгэж шийдвэрээ гаргах нь зөв байдаг гэдгийг санаарай. Тэгвэл дараа нь алдсан ч, хэн нэгэнтэй биш өөртэйгөө тооцоо бодох болно. Гэвч өөрийн сонголт ихэвчлэн зөв байдаг шүү.
Экстэйгээ ярихаа боль
Харилцаанд чинь шавар хаах хамгийн их нөлөөтэй хүн бол чиний экс! Гэхдээ нөгөө талаар чиний экс ч биш, чи л өөрөө харилцаагаа өөрийн гараар сүйрүүлж байна гэсэн үг. Учир нь чи л түүнийг амьдралаасаа хасахгүй байх сонголтыг хийсээр байгаа гол хүн нь. Хамгийн “аймаар” нь экс, та хоёрын хооронд хичнээн таагүй зүйлс болсон байсан ч, тэр чиний талаар бүхнийг мэдэх учраас жаахан ярилцах төдийд л түүнээс дулаахан мэдрэмжийг авч чаддаг. Түүний нүдээр чи бол онцгой, чухал хүн. Харин шинэ залуугийн хувьд чи бол хоосон цаас шиг үл ойлгогдох ертөнц хэвээрээ байгаа. Чи өөрийгөө хэн гэдгээ харуулахын тулд хийх үйлдэлдээ хянуур байх хэрэгтэй. Хоёр талаасаа хичээл зүтгэл шаарддаг харилцааны эхэн үед эмэгтэйчүүд өөрийгөө шинэхэн амрагтаа сайн ойлгуулж чадахгүй байгаадаа шантарч, хуучин луугаа тэмүүлдэг явдал их гардаг. Гэхдээ ийм байдлаар удаан явбал чи хэзээ ч хүний шинэ, өөрийн мэддэггүй талыг олж харж чадахгүй.
Найзуудынхаа өмнө гэмтэй юм шиг санагдаж байна уу?
Чи шинээр хүнтэй үерхсэн ч найзуудтайгаа өмнөх шигээ уулзаж байх хэрэгтэй. Тэглээ гээд хайрттайгаа хоёулахнаа байх цагийг өөрөөсөө болон түүнээсээ харамлах хэрэггүй. Ганц бие найзуудынхаа хэлсэн “Чи энэ залуугаа биднээс дээгүүр тавьж болохгүй” гэж хэлсэн үгнээс болоод өөрийгөө цэгнээд байлгүй, ядаж долоо хоногийн 2 өдрийг түүнтэйгээ уулзахад зарцуулаарай хонгор минь. Тэр чиний дуртай үедээ уулзаж, дургүй үедээ больж байдаг утсан хүүхэлдэй биш шүү дээ. Одоо тэр чиний хамтрагч, та хоёр нэг тал болсон гэж ойлго. Муухай зан гаргаж, шалтгаангүйгээр хүнийг гомдоох хэрэггүй.
ЭХ СУРВАЛЖ:ГООЛИНГОО