Өөрийн чинь хүрээний эсвэл ганц хоёр хүн чамаас илүү найзыг чинь магтаж, найзад чинь эсвэл хажуудах өөр эмэгтэйд анхаарал хандуулсны төлөө чи өөрийгөө түүнтэй харьцуулж эхэлдэг. Энэ бол эмэгтэйчүүдийн “зан биш гэм” юм. Өөрийгөө бусадтай жиших сэтгэлээс л атаархал үүсдэг.
Хөөрхөн юм аа гэвэл би юугаараа дутуу гэж, гуалиг юм аа гэвэл би тарган гэж үү, тэр их зохион байгуулалт сайтай шүү гэвэл би тийм биш юм уу гээд л шууд өөр дээрээ тусгаж авна. Ийм бодол байнга давтагдаад ирвэл дон болдог тухай сонсож байсан уу?
1. Таны тухай хэн нэгний хэлсэн таагүй үгний тухай ямагт бодож, цагаа дэмий үрдэг бол
2. Хамт ажиллагсад, эсвэл найз нөхдийнхөө уулзалтад очих дургүй, ажил мэргэжлийн чиглэлийн хурал цуглаанд явахдаа нэг л өөртөө итгэлгүй, ер нь л бусдаас дор орох вий гэсэн айдастай байдаг бол
3. Бусдын амжилтад хүрсэн тухай түүхийг сонсох дургүй байдаг бол
4. Бүр ойр дотныхоо найз нөхдийн хүрээнд байхдаа өөрийн бодол санааг буруу бол яана хэмээн эмзэглэж хэлэхээс эмээдэг бол
5. Танд хэлж буй сайхан үгэнд талархсан ч итгэдэггүй бол
6. Ажлынхаа тухай ярьж эхлэхдээ “би ердөө л…” гэдэг бол
7. Толинд харахдаа зөвхөн дутагдлаа олж хардаг бол
8. Өөртөө итгэдэггүй учраас шийдвэр гаргах хэцүү байдаг бол та харьцуулахын дон туссан байна гэсэн үг.
Үүнээс хэрхэн салах вэ?
Өөрийгөө чамлах нь юунд хэрэгтэй гэж. Хойш бүү тавь. Одоохон арга хэмжээ ав. Тэгэхгүй бол та хэсэг хугацааны дараа хүнээ алдаж мэднэ шүү. Бодоод үз л дээ. Ихэнх хорон муу санаа атаархлаас л үүсдэггүй гэж үү? Сайн найзууд, ажлын сайн хамтрагч, сайн эгч дүүсийн сайхан харилцаанд атаархал л томоос том ангалыг бий болгодог. Хэн нэг таньдаг эмэгтэйдээ дургүй байна гэж бодоход шалтгааныг нь сайн бодоод үзвэл атаархал л байдаг. Харин өөрийн мэдэлгүй өөрийгөө бусадтай харьцуулаад байвал яах вэ? Үүнтэй тэмцэх хамгийн сайн арга бол өөрөөрөө бахарх. Эхлээд тайвшир. Тэгээд өөрийнхөө атаархдаг хүнийг таньдаггүйгээр төсөөл. Тэр хүнтэй анх танилцаж байна гэж бод. Хүмүүст бидний тухай анхны сэтгэгдэл сайхнаар үлдээсэй гэж боддог шүү дээ. Яг түүн шиг түүнд сайнаар хандаж байна гэж төсөөл. Чи түүнд тусалж байна тэр чамд талархлын сайхан үгнүүдийг хэлж байна. Чиний эелдэг найрсаг занд чинь тэр талархах болно. Чамд шууд хэлдэггүй юм аа гэхэд ойр тойрныхондоо чамайг сайшаан ярьж бай гэж бод. За ингээд л чи түүнээс илүү болчихлоо шүү дээ. Гол нь түүнийг өөрөөсөө илүү гэж бодсон ч гэсэн тэр бодолдоо битгий итгэ. Дараа нь түүнтэй уулзахдаа төсөөлж байсан дүрээ л сэтгэлдээ хар тэгээд түүнтэй эелдэг харьц.
Сөрөг бодлоо эерэг болго.
“Тэр ч мэдлэгтэй юм аа, харин би хажууд нь юу ч мэдэхгүй байна” гэж бодохын оронд “Би ч бас энэ ажлыг хийж чадахуйц бүрэн дүүрэн мэдлэгтэй, ухаантай хүн.” гэж бод. Эхэндээ хулганы нүхэнд баавгай чихэж байгаа аятай итгэхэд хэцүү байж магадгүй л юм. Гэхдээ олон дахин давтаад байвал чи тийм болох л болно. Өөртөө итгэ.
Зөвхөн өөрийн зориулагдсан зүйлийг л хий
Найз бүсгүйн чинь зураг гудамжны том самбарууд дээр зураг нь тавигдаж, зурагтаар тоглосон реклам нь байн байн цацагдлаа гээд чи ч гэсэн загвар өмсөгч болох албагүй. Хүн болгонд зориулагдсан зүйл гэж бий, түүгээрээ л дагна. Мэдээж чи найзаасаа дутахааргүй гоо үзэсгэлэнтэй гэдэгт би итгэж байна. Гэхдээ зүгээр л өөрийгөө баталж харуулахын тулд өөрийн хүсэж мөрөөддөггүй зүйлийн хойноос хөөцөлдөхөд амьдрал дэндүү богинохон биш гэж үү? Үүний оронд өөрийнхөө зориулагдсан зүйлийг хий. Жишээ нь чамд зохион байгуулах авъяас харамгүй заяасан бол найзынхаа загварын шоуг хийж болно шүү дээ.
Цэвэр өрсөлдөөн
Өрсөлдөгч бол хамгийн сайн найз. Өөр нэг хүн амжилттай байгаа тухай сонсвол түүний төлөө баярла. Тэгээд өөрийгөө ч зоригжуул. Таныг бодвол амжилтанд хүрээгүй байгаа хүнтэй өөрийгөө харьцуулж болно. Тэгвэл та өөрийгөө ямар азтай , чадвартай, ухаалаг гэдгээ мэдэрнэ. Гэхдээ харьцуулна гэдэг нь басахаас огт өөр гэдгийг санаарай. Хэнийг ч хэзээ ч басаж болохгүй, хүн болгонд таниас илүү ямар нэг зүйл бий. Бас таниас дутуу зүйл ч бий. Бид эвлүүлдэг тоглоом шиг бие биетэйгээ зохицож, нэг нэгнийхээ дутууг нөхөж байж л хорвоо дэлхий тэнцвэрээ олдог байх даа.
Чи хангалттай ухаантай, бас хангалттай хөөрхөн. Атаархал бол сул дорой, өөртөө итгэлгүй хүмүүст л байдаг зүйл. Гаднаа өөртөө итгэлтэй, харц дээгүүр харагддаг мөртлөө дотроо үргэлж атаархуу бодол тээдэг бүсгүйчүүд байдаг. Тэдний дээгүүр харц бол зүгээр л өнгөлөн далдлалт, хүчгүй талаа нуух гэсэн оролдлого байдаг юм шүү. Чи хэнд ч атаархахгүй байхаар хангалттай хүчтэй. Тийм биз?
GOOLINGOO
