Орчин үеийн “Ромео Жулеттагийн түүх” гэж нэрлэж болохуйц “Twilight” цуврал киноны гол дүрийн Белла гэхээр хүн бүр л түүнийг танина. Тэрээр өөрийн гэсэн орон зайгаа кино ертөнцөд аль хэдийнэ бий болгожээ. Түүний тухай уншигч авхай та бүхэндээ толилуулж байна.
“Twilight” киноны од, Холливудын залуу жүжигчин Кристен Стюарт 1990 оны 4-р сарын 9-нд Калифорн мужийн Лос Анжелос хотод төрж өсчээ. Түүний аав нь театрын найруулагч, ээж нь кино зохиолч бөгөөд охиноо багаас нь холливудын ертөнцтэй танилцуулжээ. Кристений гэр бүлийн амьдрал бүхэлдээ камерны ард өнгөрдөг байсан нь ирээдүйд кино ертөнцөд ороход нь нөлөөлсөн гэдэг. Гэхдээ тэрээр багадаа жүжигчин болно гэж огт боддоггүй байжээ. Кристен: “ Би хэзээ ч олны анхаарлын төвд орохыг хүсч байгаагүй. Мөн алдартай болох, жүжигчин болохыг ёстой бодож ч байгаагүй ч би үргэлж гарын үсгээ зурах дасгал хийдэг байсан. Тиймээс би үзгэнд маш их дуртай. Үзгүүдээрээ би юм бүхэн дээр гарын үсэг зурдаг байсан” хэмээн ярьж байжээ.
Урлагийн гэр бүлд өссөн түүний карьер багаас нь эхэлжээ. Найман настай Кристен сургуулийнхаа шинэ жилээр нэг үзүүлбэр үзүүлсэн нь нөлөө бүхий нэгэн эрхмийн анхаарлыг ихэд татжээ. Мөн 9 настай “Disney” сувгийн “The Thirteenth year” кинонд туслах дүрд тоглосон зэрэг нь түүний жүжигчний гараа болсон байна. 2001 онд “The Safety of object” кинонд гол дүрийн дэггүй охины дүрд тоглож, өөрийн авьяасыг нээн харуулж, “Залуу жүжигчин”-ий шагналд нэр дэвшиж байжээ. Түүнчлэн “Panic room” болон “Cold creek manor” зэрэг аймшгийн кинонд тоглож мөн “Залуу жүжигчин”-ий шагналд нэр дэвшжээ. Энэ үеэс тэрээр олны анхаарлыг татаж эхэлсэн юм.
Түүнийг өнөөдрийн дэлхийд танигдсан од болоход хамгийн том нөлөө үзүүлсэн бүтээл бол “Twilight” цуврал билээ. Анх 2008 онд гарсан цагаасаа хойш өнөөг хүртэл уг кино дэлхий нийтийг байлдан дагуулсаар байгаа билээ.
2011 онд “Forbes” сэтгүүлээс гаргасан “Холливудын хамгийн шилдэг жүжигчин” жагсаалтын нэгдүгээрт Кристен Стюарт бичигдэж байжээ. Мөн 2011 оны 5-р сараас 2012 оны 5-р сар хүртэлх хугацаанд хамгийн өндөр үнэлгээтэй жүжигчний жагсаалт гаргахад тэрээр тэргүүлсэн байна. Түүнчлэн энэ хугацаанд 34,5 сая долларын орлого олж, “Twilight” цувралаас 12,5 сая долларын ашиг олжээ.
Алдартай жүжигчин болохыг огт мөрөөдөж байгаагүй Бяцхан Кристен өнөөдөр “Twilight” киноны Беллагийн дүрээрээ дэлхий нийтэд танигдсан алдарт жүжигчин болжээ. Түүний даруухан төрх, элдэв маяг хөөцөлдөлгүй үргэлж өөрийнхөөрөө байдаг зэрэг нь шүтэн бишрэгчдийнх нь хайрыг татдаг билээ.
Б.Бадамаа
