МУГЖ Б.Сарантуяагийн шаргал үст бяцхан үрс өдрөөс өдөрт өсөн том болсоор байна. Ээжийн эрх хүү Эрхэмбилэг өдгөө эрийн цээнд хүрэх дөхөж байгаа бол бяцхан гүнж Хулан нь сургуулийн босго алхаад байна.
Өдрөөс өдөрт өсөн том болж буй хүүхдүүддээ гавьяат маань хамгаас сайн ээж байж чаддаг билээ. Анхны хүү гэдэг утгаараа Эрхэмээгээ дэндүү эрхлүүлж өсгөсөн тэрбээр Хулан дүүг нь төрчихөөд байхад ч “Муу хүүгээ өрөвдөөд байдаг юм. Их өрөвмөөр шүү дээ. Дүүгээ төрөхөөс өмнө “Ээж ээ, та дүүг гарахаар намайг тоохоо болих уу” гэж их асуудаг байсан. Харин би яалаа гэж дээ, дүүг нь төрсөн ч ээж нь хүүгээ эрхлүүлсээр байх болно гэж хэлдэг байсан” гэж Сараа гавьяат хэвлэлд ярьж байв.
Хулан дүү нь төрснөөр Эрхэмээ хүү хүссэн хүсээгүй зайгаа тавьж өгсөн гэдэг. Зайгаа тавьж өгөөд зогсохгүй өөрөө ч ганц шаргал үст охин дүүдээ амиа тавьдаг болсон гэнэ лээ.
Түүнээс гадна Сараа гавьяат гурван хүүхэдтэй гэж явдаг. Учир нь гавьяатын ганц эрэгтэй, хамгийн хайртай дүү нь бөөрний дутагдлаар олон жилийн өмнө өнгөрөхөд газар дээрх ганц охиныг нь өсгөж, хүний дайтай болгоно хэмээн өөрийнхөө нэр дээр болгосон юм гэнэ лээ. Энэ утгаараа Б.Сараа гавьяат гурван хүүхэдтэй, өнөр өтгөн айлын эзэгтэй гэгддэг билээ.
