Уран нарийн, чамин тансаг хийц, хараа булаам чимэг, зүүлт бүхий хувцастай үндэстэн Монголоос өөр хаана ч байхгүй биз ээ. Монгол хүний ур ухаан, өв соёл шингэсэн дээл, хувцасны талаар Монголын Үндэсний музейн захирал, Урлаг судлалын ухааны доктор Ж.Саруулбуянтай ярилцлаа.
-Өвөг дээдсээс бидэнд үлдээсэн үндэсний нэгэн бахархал бол яах аргагүй Монгол дээл. Хүннүгийн үе, дундад зууны үед монголчуудын өмсөж байсан дээл хувцасны хэв загварын талаар яриагаа эхлэх үү?
– Монгол хүний ур ухаан шингэсэн чимэглэлтэйгээрээ монгол дээл бусад үндэстнүүдийн хувцсаас ялгардаг. Манай өвөг дээдэс 100 гаруй төрлийн дээл хувцас хэрэглэж ирсэн түүхтэй. 13 дугаар зууны үеийн дээл хувцас ямар байсныг манай музейн үзмэрээс харж болно. Ястан үндэстэн болгон өөр, өөрийн гэсэн хэв маяг , ёс заншлыг харуулсан хувцастай байсан.
13 дугаар зууны үед бараг, захчин, өөлд, торгууд, урианхай, баяд, халхчуудыг хувцасаар нь ялгадаг байж. Тэд үндэстэн ястныхаа онцлогыг харуулсан хувцас өмсөж байсан. Нэг ёсондоо үндэстэн ястны дээл хувцас бол түүх, соёл, зан заншлыг шингээснээрээ аугаа юм. Өнгөц харахад хувцас амьдралын нэгэн хэрэглээ мэт боловч цаанаа түүх, соёлыг хадгалж байдгаараа онцлогтой. Монголчууд найр наадам, мал хуй хариулахад, аян замд ямар хувцас өмсөх вэ гээд дөрвөн улиралдаа зохицуулж хувцасладаг байж. Эхэс дээдэс, энгийн ард, хүүхэд багачуудын хувцас өөр, өөрийн гэсэн хэв маягтай. 17 дугаар зууны дунд үеэс гүн, тайж, ван зэрэг дэвээс шалтгаалан өмсөх дээлний хэв загварыг тогтоож өгсөн байдаг. 20 дугаар зууны эхэн үеэс төрийн ёслолын хувцас нэлээн өөрчлөгдөж эхэлсэн. Түүнчлэн Монгол үндэсний хувцасыг бэлэгдэл, зөн бэлэг дагаж явсан байгаа юм.
-Манжийн үеэс Монголчуудын дунд манж маягийн хувцас дэлгэрсэн гэж ярьдаг. Судлаач хүнийхээ хувьд та үүнийг судалж үзэв үү?
-Тухайн үед манж хувцасны хэв маяг орж ирсэн мэт харагдавч үнэн хэрэгтээ монголчууд үндэснийхээ хувцсыг хөгжүүлж ирсэн байдаг. Манжийн үед язгууртан, дээдэс янз бүрийн хэргэм цол авч байсан. Тэр үед зэрэг дэвийг малгайн чимэг, отог жинсээр нь илэрхийлж байсан учраас манжийн хувцас орж ирсэн гэж үздэг. Сүүлд Богд хаант засгийн үед эрэгтэй, эмэгтэй хүн ямар хэв маягтай хувцас өмсөх вэ гэдгийг зааж өгснөөр манж хувцасны хэв маяг халагдсан түүхтэй. Нийгэм цаг үеэ дагаад Монгол дээл өөрчлөгдөн хувьсаж ирсэн. Тухайлбал ардын хувьсгалын үед партизанууд дөрвөн талтай жанжин малгай, хантааз өмсөж байсан хувцасны улбаа өнөө хүртэл явж байна шүү дээ. Нэгдэлжих хөдөлгөөн өрнөж эхлэнгүүт нударгагүй дээл гарч ирсэн. Эндээс үзэхэд Монгол дээл маань хувьсаж, хүмүүс биед эвтэйхэн загвар хийцийг сонгож ирсэн нь харагдаж байгаа юм.
-Дээр үед эхнэр хүний эдэлж хэрэглэж байсан хувцасны хэв маяг маш өвөрмөц. Гадныхан байтугай монголчууд өөрсдөө гайхаж шагшдаг. Эхнэр хүний хувцасны зүүлт хэрэгсэл гэхэд нэлээн жин дардаг байсан гэлцдэг. Энэ тухай та юу хэлэх вэ?
– Маш өвөрмөц хувцас. Толгойн гоёлыг алт, мөнгөн эдлэл, шүр, сувдаар маш нарийн урлаж хийсэн. Эхнэр хүний хувцасны гоёл хэрэгсэл нь 5-8 кг байсан гэдэг. Халх эмэгтэйчүүдийн хувьд эхнэр хувцас нь эвэр үстэй түнтгэр мөртэй байсан . Өөлд эхнэр хүний өмсдөг байсан гол хувцас бол ууж юм. Ууж нь урд хэсгээрээ богино хойд хэсгээрээ урт байсан гээд угсаатны хувцас өөр, өөрийн онцлогтой.
-Ингэхэд эхнэр хүний дээлний эвэр үсийг юугаар хийдэг байсан юм бол оо?
-Эвэр үс нь хангарьд шувууны далавчийг илтгэдэг байж. Эхэн үедээ жонхуу буцалгаж өөрсдийнхөө үсээ хэлбэрт оруулдаг байсан гэдэг. Харин сүүл үедээ морины дэл сүүлийг ашиглан эвэр үсийг хийдэг болжээ.
-Цагийн эрхээр монгол дээлний хэв маяг хувьсаж байна. Жирийн амьдрал дээр эртний үед өмсөж байсан дээл хувцсаа өмсдөг хүн гэж байдаггүй?
– Үнэндээ олон ястны хувцас бол бараг хэрэглээнээс гарчихлаа. Өөлд эмэгтэйчүүд уужаа өмсөхөө больж үндсэндээ үндэстэн ястны хувцас нэг загварт орсон. Ястны хувцсыг хэн авч үлдэв гэсэн чинь урлагийнхан буюу тайз дэлгэцийнхэн авч үлдсэн байдаг юм. Үнэндээ баруун монгол, зүүн монгол, халхын бүжгүүдээр дамжуулж ийм хувцас өмсдөг байж гэдгийг бид мэдэж байгаа. Хамгийн гол нь үндсэн хэв загварыг нь гээлгүй орчин үедээ нийцүүлж цог золбоотой болгож ирсэн. Уг нь ард түмэн урлагийнхнаас дээл хувцасныхаа загварыг авч байх ёстой юм шүү дээ. Гэтэл өнөөдөр урлагийн хувцас шиг дээл өмсчихөж гээд нэгнийгээ хэлдэг. Энэ бол буруу. Тэр чинь урлагийн хувцас биш юм шүү дээ. Эсрэгээрээ тэр дээл хувцас чинь ард түмнийх юм шүү гэдгийг ойлгох ёстой. Эрт дээр үед өмсөж байсан үндэсний хувцас бол музейд л байдаг. Гагцхүү үүнийг түүчээлэх хүмүүс нь урлагийнхан, бөхчүүд, улс төрчид. Гол нь тайзнаас тэр дээл хувцсыг буулгаж ард түмэн хэрэглээгээ болгох ёстой.
Цагийн аясаар монгол хувцсыг ёвроп хувцастай зохицуулан өмсөж ирсэн. Тухайлбал Их Зохиолч Д.Нацагдорж Монгол дээлийг орос хромон гутал, бүрх малгатай хослуулж дэлгэрүүлсэн.
-Дуучин С.Жавхлан Солонгос улсад Монгол дээл өмсөөд явж л дээ. Өмнө нь энгийн хувцастай явахад хэн ч анзаарч хардаггүй байж. Гэтэл монгол дээлээ өмсөөд гарсан чинь хүмүүс гайхаад зургаа хүртэл хамт татуулсан гэж ярьж байсан. Тэгэхээр монгол дээл бол биднийг гадаадад таниулах нэрийн хуудас юм уу даа?
– Гадныхан монгол дээл өмсөөд явахад бүр гайхдаг шүү дээ. Гол нь монгол хүмүүст дээл маш сайхан зохидог. Үндэсний хувцас маань баатар болгодгийн нэг жишээг та ярилаа. Хуучин үед дипломат ёсонд гадагшаа явахад үндэсний хувцсаа заавал авч явж өмсөх ёстой. Энэ бол маш зөв. Ямар дээл өмсөхийг нь хүртэл зааж өгдөг байсан. Зарим хүмүүст нь дээлийг нь хийж өгдөг байлаа шүү дээ. Харин одоо манай томчуул хэр дээл өмсдгийг сайн мэдэхгүй байна. Их л ховор байх даа. Үнэхээр Монгол дээл бол үндэсний бахархал юм. Тиймээс монгол хүн бүр гадагшаа явахдаа заавал дээл өмсөх хэрэгтэй. Үүнийг бүр хуульчлаад өгөхөд ч гэмгүй. Монгол дээл хувцас бол биднийг дэлхийд таниулах сурталчилгаа гарцаагүй мөн.
-Сүүлийн үед хүмүүс хятадаас дээлний загвар буулгаж дууриалаа гэх болж. Энэ тухай та юу гэж бодож байна вэ?
-Ёстой би үүний эсрэг байна шүү. Харин ч өвөрлөгч орныхон манай дээлний загварыг дууриадаг. Үнэндээ Өвөр монголын дээл хувцасны хийц маяг маш болхи шүү дээ. Тэд бол дээлээ ч сайхан хийж чаддаггүй. Яг үнэндээ өвөр монголчууд манай хамгийн уран оёдолчдыг авч явж дээл, хувцасаа хийлгэдэг шүү дээ.
-Монголчууд бид дээлээ яаж хамгаалах ёстой юм бол оо?
– Монгол хувцсаа авч үлдэхийн тулд дунд болон их, дээд сургуулийн сургалтын хөтөлбөрт дээл яаж хийдгийг оруулж өгөх ёстой. Өнөөдөр дээл оёдог хүн ховордсон шүү дээ. Цөөн тооны оёдолчид байна. Нэг ёсондоо дээл хийх бол бараг мэргэжил болоод хувирчихлаа. Торгоо эсгээд дээл хийх хүн ховор. Ялангуяа залуу үеийхэнд бараг байхгүй дээ.
-Танай музейд Н.Багабанди ерөнхийлөгчийн дээлээс эхлээд үе үеийн ерөнхийлөгчдийн дээл байсан нь сонирхол их татлаа?
-Анхны ерөнхийлөгч П.Очирбатаас эхлээд үе, үеийн ерөнхийлөгчийн тангараг өргөх үеэр өмссөн дээл хувцсыг музейд авсан. Түүнээс гадна манай музейд маршал Х. Чойбалсан. Ю Цэдэнбал даргын хувцас бий. Энэ нь Монголыг удирдаж явсан хүмүүс ямар дээл хувцсаар гоёж байсан юм бэ гэдгийг харуулах гэсэн хэрэг л дээ.
-Ингэхэд эртний үеийн дээл хувцас хэр байгаа вэ. Танай музейн үзмэрт байгаа дээл хувцас эх хувиараа байгаа юу?
-Үзмэрт байгаа дээл хувцасны ихэнх нь эх хувиараа байгаа. Бүр эртний үеийн дээлүүдийг л орлуулж хийсэн. Зарим алт мөнгөн чимэглэл, эдлэл дууриамал юм. Бүр эртнийх гэх юм бол Хэнтийн аймгийн Дэлгэрхангай сумын нутгаас 13 дугаар зууны үеийн булшнаас олдсон эртний үеийн дээл байгаа. Уг дээлийг манай соёлын өв төвөөс сэргээн засварласан. Язгууртан хүний хэрэглэж байсан шаглаж хийсэн нарийн хийцтэй дээл бий.
-Дээлтэй монголчууддаа хандаж юу хэлэх вэ?
– Монгол дээл бол хаана ч байхгүй сайхан хувцас. Тиймээс хүн болгон Монгол дээлээрээ гоёж өв соёлоо хадгалаарай л гэж хэлье.
Б.Ариунзаяа
