Aлдарт “wrap” даашинзаар нэрд гарсан Белги гаралтай Diane von Furstenberg-ийг загварын ертөнцийн гүнж гэдэгтэй хэн ч маргадаггүй. Тэрээр ч өмнө нь жинхэнэ гүнж байсан билээ. 1946 онд Diane Simone Michelle Halfin болон мэндэлсэн тэрээр 1969 онд Германы хунтайж Egon of Furstenberg-тэй гэрлэж хамт амьдарсан хэдий ч 1972 онд хунтайжаас салж АНУ-ын хэвлэл мэдээллийн могул Barry Diller-тэй гэрлэсэн. Ийнхүү тэрээр гүнж гэж дуудагдахаа больсон ч нэрээ солилгүй хэвээр үлдээсэн юм. Түүний урлан бүтээсэн wrap даашинз нь 1970-аад оны стилийг тодорхойлоход маш том нөлөө үзүүлсэн бөгөөд тэрхүү даашинз эдүгээ Smithsonian institute-д өлгөөтэй байдаг аж.
30000 ам.доллараар эхлүүлсэн von Furstenberg-ийн бизнес нь 1970-аад оны үед ид мандаж байсан бол 1980-аад оны үед эрс уналтад орж, харин өнөөдөр ид цэцэглэж байна. 1990-ээд оны үед эмэгтэйчүүдийн шинэ үе түүний wrap даашинзуудыг vintage дэлгүүрүүдээс олсон нь энэ брэндийн дахин сэргэлтэд нөлөөлсөн юм. Өнөөдөр түүний wrap даашинзыг Jessica Alba, Madonna, Jennifer Lopez нар өмсөж байна. Зах зээл хэрхэн яаж хурдан өөрчлөгддөгийг von Furstenberg өөрөө маш сайн мэддэг. Тийм ч учраас 1970-аад оны сүүлээр тэр өөрийн бизнесээ зарсан юм. Тэр залуу дизайнеруудад зөвлөхдөө “Том компаниуд чиний бизнесийг худалдаж авна гэж бүү найдаж хүлээ. Өөрөө өөрийгөө хөгжүүл. Ингэснээр чи өөрийнхөө хувь заяаг илүү удирдаж чаддаг болно” гэдэг. 1997 онд бизнесээ дахин эхлэхдээ өөрөө мөнгөө гаргаж байсан тэрээр өнөөдрийн байдлаар 45 нэрийн дэлгүүртэйгээс гадна хувцаснууд нь дэлхийн 70-аад улсын олон дэлгүүрт худалдаалагддаг. Мөн ямар ч өргүйгээр өөрөө өөрийгөө санхүүжүүлээд явах хэмжээнд очсон байна. Өөрийн компаниа Diane von Furstenberg (DvF) гэж нэрлэсэн түүний бодлоор хүн болгонд зориулж хувцас хийхээсээ зах зээлийн нэг урсгалд зориулах нь илүү дээр байдаг аж.
Тэр эмэгтэйлэг бөгөөд биед маш эвтэйхэн хувцас хийхийг чухалчилдаг байв. Тэрээр “Би хүүхдийн хувцас хиймээргүй байна. Харин жаахан охидыг том болоод миний хувцасыг өмсөөсэй гэж хүсч байна. Бас эрэгтэй хүний хувцас хиймээргүй байна. Би эмэгтэйчүүдийг л хамгийн ихээр ойлгодог. Би нэг төрлийн эмэгтэй болъё гэж боддог байсан. Би тийм ч болсон” хэмээн нэгэнтээ ярьжээ. Хэдий ингэж ярьсан ч тэр 2011 онд энэхүү бодлоо өөрчлөн home коллекцио DIANE нэрийн үнэртэний хамт танилцуулсан бол 2012 онд GapKids-тэй хамтран анхныхаа хүүхдийн хувцасны коллекцийг гаргасан юм.
Diane von Furstenberg дайчин сэтгэлгээгээ ээжээсээ өвлөж авсан гэдэг. Дизайнерыг төрөхөөс 18 сарын өмнө ээж нь Auschwitz-д байсан бөгөөд охиндоо “айх нь сонголт биш” гэж сургадаг байжээ. Von Furstenberg эрх чөлөөндөө хайртай бие даасан эмэгтэй байсан хэдий ч 1969 онд жирэмсэн болсноор найз залуу хунтайж Egon von Fustenberg-тэй гэрлэн New York руу хамт явах болсон юм. Түүнтэй гэрлэхээ мэдсэн мөчид тэр өөрийн гэсэн карьертай болох, баян хүнтэй суусан жаахан охин болох ёсгүй хэмээн өөртөө эзэн болохыг хүсчээ. 1970-аад оны эхээр Vogue-ын эрхлэгч Diana Vreeland түүний дизайнерын карьерыг эхлүүлж нэг даашинзыг нь сэтгүүлдээ гаргасан юм. Тухайн үед эмэгтэйчүүд шинээр ажилд орж, секс эрх чөлөөнийхөө бэлгэ тэмдггийн нэгээр von Furstenberg-ын даашинзыг нэрлэж байжээ. Гэвч энэ үед зах зээл дээр хэтэрхий их wrap даашинз байсан учраас тэр өөрийн нэрийн бизнесээ зарахаас өөр аргагүйд хүрсэн юм. Магадгүй тэр үеийнхээ алдаануудаас суралцсан болохоор 1997 онд дахин эхлэхдээ илүү туршлагатай хандаж чадсан гэж хэлж болно. Тэрээр энэ тухайд “Энэ удаа би өөрөө ямар хүн болмоор байна, тийм л хүн болмоор байна” гэжээ. Одоо DvF жилдээ дөрвөн бүрэн хэмжээний коллекци санал болгодог. Түүний загварын ертөнцөд оруулсан хувь нэмрийг үнэлж Council of Fashion Designers of America (CFDA) 2005 онд Lifetime Achievement Award шагналыг өгсөн бол 2006 онд тэр өөрөө тус байгууллагын ерөнхийлөгчөөр сонгогдож өнөөдрийг хүртэл энэхүү албыг хашиж байгаа юм. Цаг мөч бүхэнд шинэчлэгдэж байдаг загварын ертөнцийн нэгэн том төлөөлөгч тэрээр загварын ертөнцөд гүнжийн байр сууриа хэзээ ч алдаагүй нэгэн билээ.
