Төрөлх нутгийнхаа түүхт 90 жилийн ойг угтсан их ажлын гарааг урлаг соёлын салбараас эхэлсэн Тосонцэнгэлчүүдийн цог хийморь өөдөө байлаа.
Олон улсын дуурийн дуу дуулаачдын уралдааны Гран при шагналт, Монгол улсын гавьяат жүжигчин У.Далантайн нэрэмжит дууны наадмыг Тосонцэнгэл сумын соёлын төвийн захирал Гончигдоржийн санаачилгаар тус сумын Улаанбаатар дахь нутгийн зөвлөлийн ивээл дор 2013 оны 03 дугаар сарын 29 нөөс 31-ний өдрүүдэд Тосонцэнгэл суманд зохион байгууллаа.
Тус уралдааны шүүгчээр СУИС-ийн Завхан дахь ХБК-ийн захирал СТА Н.Зоригт, СТА хөгжмийн зохиолч Л.Очирбат, СТА Улаанбаатар чуулгын дуучин М.Анхтуяа, аймгийн Засаг даргын Тамгын газрын мэргэжилтэн С.Нарантуяа нар ажиллаж, Тосонцэнгэл сумын Улаанбаатар дахь нутгийн зөвлөлийг төлөөлж Гүйцэтгэх захирал Г.Саранчимэг, тэргүүлэгч С.Ганбаатар, Г.Энхтуяа нар, Л Ванганы нэрэмжит хөгжимт жүжгийн театрын үндэсний хөгжмийн хэсэг, TV-9 телевизийн орон нутаг дахь сурвалжлагч нар уригдан оролцжээ.
Гурван төрлөөр, гурван шаттай, гурван өдөр үргэлжилсэн тус наадамд Завхан, Архангай, Хөвсгөл аймгийн 10 гаруй сумдын 50 гаруй авьяаслаг залуус хүчээ сорьжээ.
Ардын дууны төрөлд Архангай аймгийн Цахир сумаас оролцсон Баттулга тэргүүлэн, Завхан аймгийн Нөмрөг сумын Л.Мөнхсувд удаалж, Тосонцэнгэл сумын С.Лхагвадорж гутгаар байр, Тосонцэнгэл сумын М.Энхбаяр , Их-Уул сумын Оюунчимэг нар тусгай байр, зохиолын дууны төрөлд 10 гаруй эрчүүдтэй ганцаараа өрсөлдсөн Хөвсгөл аймгийн Цэцэрлэг сумын Ж.Азжаргал бүсгүй тэргүүлэн, Тосонцэнгэл сумын Н.Батболд удаалж, Дөрвөлжин сумын В.Очирдорж гутгаар байр, Их-Уул сумын Ц.Бямбадорж, Тэлмэн сумын Т.Батцоож нар тусгай байр, харилцаа дууны төрөлд Эрдэнэхайрхан сумын Д.Сүнрэгжав, Уранчимэг нар тэргүүлэн, Идэр сумын М.Батмөнх, А.Нархажид нар удаалж, Тосонцэнгэл сумын Н.Доржготов, О.Эрдэнэчулуун нар гутгаар байр, Их-Уул сумын Э.Мөнхсайхан, З.Балданчимэг нар тусгай байранд шалгарав.
Наадмын тэргүүн байр – Алтан гэрэгэ, Алтан цом, 500,000 төгрөг, удаахь байр- дурсамж, мөнгөн цом, 300,000 төгрөг, гутгаар байр- дурсамж, 200,000 төгрөг, тусгай байр- тус бүр дурсамж, 50,000 төгрөгийн шагналтай байсан нь ардын авьяастнуудын хувьд анхны том шагнал байлаа.
Наадмын зохиолын дууны төрлийн II шатанд оролцогчид Я.Өлзийдэлгэрийн шүлэг, УГЗ Д.Цэвээнравдангийн хөгжим МУГЖ У.Далантайн дуулсан “Санах нутаг” дууг дуулсан бөгөөд энэ дууг хамгийн сайн дуулсан Тосонцэнгэлийн Д.Намсрайжав тухайн дууны уран бүтээлчдийн шагнал болох 32 инчийн 3D-тэй LED телевизорын эзнээр тодорсон нь наадмын бас нэгэн сюрприз болсон билээ.
Наадмын шагналтнуудын хамтарсан “ГАЛА” тоглолтонд МУГЖ У.Далантай, СТА Улаанбаатар чуулгын дуучин М.Анхтуяа нар оролцсоноор энэхүү наадам чадварлаг зохион байгуулалт, чанартай оролцоо, шударга шүүлттэй наадам болов гэсэн үзэгчдийн үнэлгээгээр өндөрлөсөн билээ.
Энэ ялдамд энэхүү наадмыг санаачлагч Тосонцэнгэл сумын Соёлын төв, ивээн тэтгэсэн Тосонцэнгэл сумын Улаанбаатар хот дахь нутгийн зөвлөл, зохион байгуулсан Тосонцэнгэл сумын ИТХ, Засаг дарга, тамгын газрын хамт олонд чин сэтгэлийн талархал илэрхийлэн ажлын амжилт, хамгийн сайн сайхныг хүсье.
