Нийслэлийн захирагчийн ажлын албаны хүнс худалдаа үйлчилгээний хэлтсээс согтууруулах ундаагаар үйлчлэх журам, архигүй цэнгээний газар шалгаруулах, нийслэлийн худалдаа үйлчилгээний журамд нэмэлт өөрчлөлт оруулах талаар хэлэлцсэн байна.
Өөрөөр хэлбэл, шөнийн цэнгээний газрууд шөнө дөл болтол согтууруулах ундаагаар бус жүүс, ундаагаар, алхоколгүй шар айргаар залууст үйлчилж, залуус архигүй цэвэрхэн орчинд эрүүл ухаанаар сэтгэж шавайгаа ханатал бүжиглэнэ гэсэн үг.
Үнэхээр нүдээ олсон шийдвэр гарах нь байна гээд магтчихъя. Залуус ч үүнийг л хүсч байгаа.
Шөнийн цэнгээний газарт ороод заавал тасартлаа архи ууж суух биш сайхан бүжиглээд гарах хүсэл сонирхолтой залуус олон болсон. Даанч шөнөжин архидсан согтуу хөлчүү залуус хоорондоо маргалдаж, зодолдох, эрүүл нэгнийг элдвээр дарамтлах зэргээр хэцүүхэн, төвөгшөөмөөр асуудал гаргадаг учраас боловсон залууст чөлөөт цагаа өнгөрүүлэх газар олдохгүй болчихоод байна.
Харин энэ шийдвэр хэрэгжээд эхэлчихвэл хайртай хосууд, найз бүсгүйчүүд соёлтой, архигүй орчинд сайхан бүжиглэж, өдрийн ажлын ачаалал, стрессээ тайлах бүрэн боломжтой болно.
Манайхан л болсон хойно, архигүй орчин гэж юу байх вэ, тодорхой хэмжээнд архи зарж л таараа гэх биз. Тэгвэл харин ч эсрэгээрээ энэ санаачилгыг залуус маш идэвхтэй дэмжиж, сар бүрийн 1-нд архигүй орчинд бүжиглэх залуус архитай өдрүүдтэй адилхан байдаг гэж байгаа.
Одоогийн байдлаар нийслэлийн хэмжээнд 779 баар 250 орчим кафе, 500 гаруй ресторан үйлчилгээ явуулж байгаа гэсэн статистик судалгаа гарсан байдаг аж. Эдгээр газрууд бүгд архи, согтууруулах ундаагаар үйлчилдэг. Тэндээс ядахдаа 40 орчим хувь нь ч гэсэн архигүй, алхоколгүй шар айргаар үйлчилдэг олон улсын жишиг тогтоож цэвэрч боловсон орчинг бүрдүүлчихвэл үүр цайтал ажиллах эрхийг нь хариуцдаг байгууллагууд нь өгчих хэрэгтэй.
Баар, ресторан, шөнийн цэнгээний газрын эзэд ч үүнийг дэмжиж байгаа гэх юм билээ. Харин “баар” гэсэн нэр зүүсэн архичин, үл бүтэх хулгайч, дээрэмчдийг үүр уурхай болсон захын хорооллын газруудыг хаах, хатуу хяналт тогтоох зэргээр ажиллаж чадвал болохгүй зүйл гэж байхгүй шүү дээ.
Энэ шийдвэрийг ажил хэрэг болгохоор оролдож байгаа хүмүүс Архидан согтууралттай тэмцэх тухай хуульд нэмэлт өөрчлөлт оруулахаар бэлтгэл ажлаа хийж байгаа гэнэ. Уг хуульд спиртийн агууламж нь 20 хувиас дээш байвал согтууруулах ундаа гэнэ гэж заасан байдаг аж.
Тэгэхээр нэмэлт өөрчлөлт оруулаад, асуудлыг хэн хэндээ ашигтай байдлаар шийдчихвэл гэмт хэргийн гаралт, согтуу жолоочийн хар гай, согтуу залуусын санамсаргүй хийсэн алдаа хоёр алхам хойшилж, нэг ч гэсэн гэр бүл эрүүл энх, элэг бүтэн аз жаргалтай амьдрах бус уу.
Залуус бид хөлчүү залуусын хэнээрхэл, согтуу хүүхний орилоон хашгираанаас зугтаж залуу насаа гэртээ зурагт үзэх, хол явлаа гээд кино теарт орохоос өөрөөр өнгөрөөж чадахгүй байгаа тохиолдол их бий. Энэ бүхнээс шалтгаалж жин нэмэх, биеийн эсэргүүцэлгүй болж амархан өвчлөх, сандлын ард өдөржин суудаг ажлаасаа болж мэдрэлийн ядаргаанд өртөх нь элбэг болж. Тэр хэрээрээ бухимдаж, бухимдлаа архи ууж тайлж байна.
Тэгэхээр архигүй алжаалаа тайлаад бүжиглэж, дуулж хуурдах боломжтой болох хүсээд байгаа тэр орчинг нь бүрдүүлээд өгчихвөл ханатлаа бүжиглэж, ядахдаа л хөдөлгөөний дутагдлаас эрүүл орчинд гарч, стрессээ тайлчихна гэдгийг хаа хаанаа бодолцож эхэлжээ гэж ойлгож байна.
Өнөөдөр архинд тавьсан хатуу хяналтын хуульгүйгээс өглөө бүхэн айдас дагуулсан аймшигт хэргийн гэрч, золиос болж, эрүүлжүүлэх байрыг хөрөнгөжүүлдэг. Тэгэхээр Ерөнхийлөгчийн санаачилсан архигүй Монгол залуус гэдгээ баталж, өнөөдрөөс эхлэн энэ ажлыг дэмжих хэрэгтэй байна.
Монголын Залуучуудын холбоо, Их дээд сургуулиудын оюутны холбоо, хэвлэл мэдээлэл гээд бүгд идэвхтэй дэмжиж, дуугаа нэгтгэж чадвал өнөөдөр биш гэхэд маргааш бид архинаас бүрэн татгалзаж чадна.
Тэр ажлын эхлэл болсон архигүй соёлтой орчинд бүжиглэх эрхийг олгох сайхан ажлыг эхлүүлсэн энэ хүмүүсийн ажилд саналаа нэмэрлэж, дэмжицгээе, залуусаа.
Б.Өнөртогтох
