Өглөө ажилдаа явахдаа Батзориг гэргийнхээ духан дээр нь үнэрлээд, орой хамт гадуур хооллохыг урилаа. Бага зэрэг гайхшралтай үлдсэн Дүүрэнгийн сэтгэл өдөржин гэгэлзсээр. Товлосон цагаа хүлээсээр цаг харахад аажуухнаар чаг чагхийнэ. Цаг ямар хурдан юм бэ, гэсээр уралдаж ажлаа хийсэн өдрүүдэд ингэтлээ цагийг удаан гэж анзаарсан нь нэгээхэн ч үгүй юм шиг. Ханьтайгаа учирсан анхны болзоог санагдуулам бяцхан догдлолыг зүрхэндээ тээснээ Дүүрэн анзаарлаа.
Цагтаа багтааж ажлаа дуусгахаар яаравчилсан Батзориг байн байн цагаа харна. Баярын совинд сэтгэлээ эзлүүлсэн түүний нүдэнд хайр халамжаа харамгүй зориулсан гэргийнх нь гайхширсан харц үзэгдээстэй. Инээмсэглэл, догдлол тээсээр хүлээх оройн хоолны болзоо гэр бүлийн хоёрыг шинэхэн хосууд шиг гэгэлзүүлнэ…
Амьдралд болзоо өнгө нэмдэг. Сэтгэлд болзоо хөг эгшиглүүлдэг. Хайранд болзоо итгэл бэхэлдэг. Гэр бүлд болзоо догдлол авчирдаг. Болзоо товлож, болзоонд яарч, болзоонд бэлдэх тэр чигээрээ тэмүүлэл байдаг. Тэмүүлэлтэй амьдрах сайхаан.
Б.Болороо