-ЭМЭГТЭЙЧҮҮДИЙГ ГЭРЭЭСЭЭ ГАРАХГҮЙ БАЙХЫГ ТУС УЛСЫН ДОТООД ХЭРГИЙН САЙД АНХААРУУЛЖЭЭ-
Энэтхэг улсын парламентын доод танхим хүчирхийллийн эсрэг хуулийг өнгөрсөн хёордугаар сарын сүүлчээр баталсан. Энэ нь сүүлийн зургаан сарын хугацаанд тус улсад эмэгтэйчүүдийг хүчирхийлэх гэмт хэрэг газар аваад байгаатай шууд холбоотой. Хамгийн гол нь энэтхэг эрчүүд бүлэглэн хүчингийн хэрэг хийх тохиолдол гурав дахин нэмэгдээд байгаа юм. Энэ бүхнийг ажиглагчид нийгмийн гажуудалтайн холбон тайлбарлаж байгаа билээ. Энэ нь тус улсын нэр хүндийг унагаад байгаа төдийгүй, ард түмний дургүйцлийг ихэд хүргэж хэд, хэдэн удаагийн жагсаалыг зохиоход хүргэсэн.
Эмэгтэйчүүдийн эрх тус улсад зөрчигдсөөр байгаад олон улсын эмэгтэйчүүдийн эрхийг хамгаалах байгууллагууд онцгой анхаарал хандуулах болсон. Улмаар Энэтхэгийн эрх баригчдад энэ талаар албан бичиг хүргүүлэн, эмэгтэйчүүдийн эрхийг хамгаалах, энэ төрлийн гэмт хэрэг үйлдсэн этгээдэд ноогдуулах ял шийтгэлийг нэмэх санал хүсэлт илгээж байсан юм. Парламентийн доод танхимын баталсан хуулийн дагуу хүчирхийлэл үйлдсэн этгээдийг 20 хүртэлх жилийн хорих ял оногдуулж, үйлдсэн хэргээс нь хамаарч цаазын ял хүртэлх шийтгэл оноохоор болоод байгаа. Дээрх хуульд хүн рүү хүчил цацах, хүний наймаа хийх зэргээр бэлгийн гаж үйлдэл хийсэн этгээдэд хуулийн хатуу арга хэмжээ авах талаар заажээ. Жишээ нь, өнгөрсөн арванхоёрдугаар сард тус улсад бүлэг залуус 23 настай эмэгтэйг хүчирхийлсэн хэрэг гарсан. Үүний улмаас олон нийт жагсаадл хийж таван хүний амь эрсэдсэн. Тиймээс дахиж ийм жагсаал болж, хүний амь эрсдүүлэхгүй байхын тулд дээрх хуудийг баталсан юм.
Тус улсын хүн амын талаас дээш хувь нь эрчүүд. Эрчүүд рүү чиглэсэн бодлоготой улсын нэг гэхэд болно. Эмэгтэйчүүдийн эрхийг зөрчдөг орнуудын жагсаалтыг ч тус улс тэргүүлдэг. Хүчингийн хэргээр дэлхийн жагсаалтыг ч тэргүүлэх болсон. Тус улсын эрчүүдийн ихэнхи хувь нь ажилгүйдэлд автсан. Гэмт хэргийн гаралт жилээс жилд нэмэгдэж байгаа гэх мэт тус улсын талаар таагүй мэдээ, баримт дэлхий нийтийг цочирдуулсаар байгаа. Тиймдээ ч тус улс руу гэх жуулчдын тоо сүүлийн 10 гаруй жилд эрс буурсан. Үүнийг тус улсны хууль хяналтынхан ч баталдаг аж.
Өнгөрсөн долоо хоногт Энэтхэгийн Дели хотод цагдаа нар болон жагсагчдын хооронд ширүүн мөргөлдөөн гарсан. Мөн л эмэгтэйчүүдийн эрхийг хамгаалах тайван жагсаал эцэс сүүлдээ үймээн болж хувирсан. Эсэргүүцэгчид цагдаагийн газар руу дайрч, дараа нь Ерөнхийлөгчийн ордон руу нэвтрэхийг завджээ. Цагдаа нар тэднийг нулимс асгаруулагч хий ашиглан тараахыг оролдсон ч хүчин мөхөсдсөн. Жагсаалд оролцогчид ихэвчлэн оюутнууд байсан бөгөөд хуулийн зарим заалт хэтэрхий үнэмшилгүй байгаа гэдгийг илэрхийлсэн.
Хамгийн аймшигтай нь өнгөрсөн сард гурван охиныг хүчирхийлж, худагт хийн амийг нь хөнөөсөн явдал дэлхий нийтийг цочирдуулав. Тус улсын Махараштра мужид зургаа, ес, 11 настай гурван охиныг бүлэг этгээд хүчирхийлж, дараа нь худагт хийн хэргийн газраас зугтжээ. Цагдаа нар тэднийг баривчилж, зохих хуулийн дагуу шийтгэхээ иргэдэд амласан. Энэ бүхнийг бузар хэрэг гэхээсээ илүү “сэтгэлгээний гажуудал” гэдгийг хэвлэлээр онцолсоор байна. Хохирогчид хичээлээсээ тараад гэмт хэргийн золиос болсоор байна. Дөрвөн хоног тэднийг хайсан боловч худагт хүчрихийлээд хаясан болохыг олж тогтоожээ. Энэ мэдээг дуулсан эцэг эх нь одоог хүртэл сэтгэлийн хүнд байдалтай, ухаан нь орон гаран байгаа талаар CNN агентлаг мэдээлэв.
Дэлхийд хүчирхийллийн гэмт хэрэг үйлдсэн жагсаалтаар эхний тавд ордог байсан Энэтхэг сүүлийн зургаан сард нэгдүгээр байрт орсон байна. НҮБ болон хүний эрхийг хамгаалах олон улсын байгууллагаас тус улсад 26 секунд тутамд нэг хүн хүчирхийлэлд өртөж байгаа талаар олж тогтоожээ. Эрүүл мэндийн үзлэг, сэтгэл зүйчийн зөвлөгөө гэх мэт нийгмийн болон гэр бүлийн хүчирхийллээс урьдчилан сэргийлэх ямар ч арга хэмжээ зохион байгуулдаггүй учир ийнхүү гэмт хэргийн тоо буурахгүй байгаа гэдгийг ч ажиглагчид дүгнэж байна.
Нью Дели хотод уржигдар хэдэн зуун мянган иргэд цагдаагийн штабыг бүслэн жагсаал хийсэн. Учир нь өнгөрсөн долоо хоногт тус улсын түүхэнд таван настай бяцхан охиныг хүчрхийлсэн анхны тохиолдол гарч, нийгэм тэр чигээрээ айдас, гажуудлын талаар гол анхаарлаа хандуулж, эсэргүүцэн зогсож байна. Гэмт хэрэгтэн таван настай охиныг хүчрхийлэхээс гадна тамлан зовоосон жигшүүрт хэрэг үйлдсэн аж. Охины сэтгэл санаа нь хүнд байдалтайгаас гадна одоо болтол цочролоос гарахгүй байгаа, шинжилгээний хариунаас харахад цусанд халдвар илэрсэн гэж үзлэг хийсэн эмнэлгийн эмч мэдэгджээ. Нью-Делигийн цагдаагийн газраас сэжигтэн 22 настай залууг баривчилсан талаар мэдээлсэн. Сэжигтэн Нью-Дели хотод хохирогч охинтой нэг байранд амьдардаг байсан ба хүүхэд хулгайлж, тамлан зовоосон хэргээр энэ долоо хоногын дотор шүүхийн өмнө хариуцлагаа хүлээх аж. Энэ нь эргээд нийгэмд ямар нэгэн жагсаал үүсгэхвий гэхээс урьдчилан сэргийлж байгаа нэг хэлбэр юм. Охины эмч Р.Х.Бансал “Би өмнө нь хэзээ ч ийм зүйл харж байсангүй. Үнэхээр аймшигтай. Жигшүүртэй хэрэг. Охины уруул, хацар, нуруу гээд гэмтээгүй газар бараг байхгүй. Түүний нуруу нэлэнхүйдээ хөхөрч гэмтсэн бөгөөд охиныг боож алахыг завдсан ул мөр илэрсэн” хэмээн цагдаагийн газар өгсөн баримтдаа дурьджээ.
Тус улсын дотоод хэргийн сайд Сушилкумар Шинде энэ төрлийн гэмт хэрэг онцгой анхаарал хандуулж, эмэгтэйчүүдийг аль болох гэрэл гэгээтэй газраар явах, шөнө дөлөөр гарахгүй байх, хүүхдээ анхаарал халамжгүй орхих, цагдаагийн бие бүрэлдэхүүнийг шөнийн ээлжээр ажиллуулах талаар удахгүй журам гарах гэж байгаа талаар мэдэгдсэн. Олон улсын хэвлэлээр энэ бүх аймшигт хэргүүдийн талаар “Энэтхэг эрчүүдийн сэтгэхүйд асуудал байна. Үүнийг төр засаг нь анхаарах хэрэгтэй. Эрчүүдийн ихэнхи нь сэтгэлгээний гажуудал, нийгэмд онц ноцтой аюул учруулахад бэлэн байгааг нөгөө талаасаа баталж байна” хэмээн онцолж байна.
Б.Баатар