Сэлэнгэ аймаг ойрын хугацаанд Сүхбаатар, Мандал, Баянгол сумдын ахмадын сувиллыг өргөжүүлэх, Жавхлант суманд ахмадын өргөө шинээр байгуулах, аймгийн төвд гэр бүл, ахмад настан, хөгжлийн бэрхшээлтэй иргэдэд үйлчилгээ үзүүлдэг “Гэр бүл- хөгжлийн ордон”-той болох, 40-өөс дээш насны хүмүүсийн ажлын байрыг нэмэгдүүлэх, 7 дугаар сард “Ахмадаа дурсъя” нэртэй томоохон арга хэмжээ зохион байгуулахаар төлөвлөөд байна.
Тус аймагт болсон Ахмадын хорооны удирдах ажилтны зөвлөлгөөний үеэр энэ талаар танилцуулжээ.
Бүх сумдын төлөөлөл оролцсон уг зөвлөлгөөнд аймгийн Ахмадын хорооны дарга Г.Зориг аймгийн Ахмадын хорооны 2012 оны үйл ажиллагааны тайланг зөвлөлгөөнд тавьснаас гадна ахмад настны нийгмийн халамжийн үйлчилгээ, эрүүл мэнд, хөдөлмөр эрхлэлт, нийгмийн даатгалын талаар авч хэрэгжүүлж байгаа ажлын талаарх мэдээллийг холбогдох байгууллагын удирдлагууд танилцууллаа. Мөн энэ үеэр “Гэр бүлийн үнэ цэн” хэлэлцүүлэг болж, ахмадууд гэр бүлийн бат бэх байдал хэрхэн юунаас болж алдагдаж байгаа, эхнэр, нөхөр хүний үүрэг, хүүхдийн хүмүүжил юунаас болж доголддог, сайхан сайхан, бат бэх гэр бүл байхад юуг анхаарвал зохих ёстойг шүүн хэлэлцлээ. Ахмадууд аймгийн Ахмадын хорооны 2013-2014 онд хийх ажлын чиглэлээ хэлэлцэн баталснаас гадна Сүхбаатар сумын 4,7-р баг, ХЦ-ийн 0243-р ангийн Ахмадын хорооны үйл ажиллагаатай танилцсан байна.
Дашрамд сонирхуулахад тус аймагт 7500 гаруй ахмад настан байгаагийн хоёр нь 100 настай, гурав нь 95-99 настай, 85-95 хүртэл настай 170 ахмад настан байдаг.
Сэлэнгэ аймаг Р.Бумдарь
