Ханхүү Гарригийн АНУ-д хийсэн долоо хоногийн аялал багагүй шуугиан тариад амжсан.
Энэ шуугиан бараг намжиж амжаагүй байхад Америкийн тэргүүн гоо бүсгүй, ‘АНУ-ын мисс 2012” тэмцээний титмийн эзэн Нана Меривезир Британийн хаан ширээ залгамжлагчийн бага хүүтэй гэрлэхийг хүсч байгаагаа мэдэгдлээ.
Бүсгүй 28 настай Гаррид ухаангүй дурласнаа хүлээн зөвшөөрсөн байна. Тэрбээр ханхүүг Нью-Йоркт болсон хандивын үдэшлэг дээр хараад л дурласан гэнэ.
Нана Меривезер тэрхүү хүлээн авалтад Жон Ленноны хүү, дуучин Шон Леннон, рэпер Уильям Адамс буюу Will.i.am зэрэг олон алдартнуудын хамт уригдан очжээ. 27 настай гоо бүсгүйд ханхүү үнэхээр таалагдсан учир ийнхүү сэтгэлээ илчилж байна.
“Түүнийг чөлөөтэй байгаа гэж сонссон. Би ч бас адилхан. Тэр их өндөр, царайлаг, жинхэнэ төгс төгөлдөр. Түүний эхнэр болохдоо маш аз жаргалтай байх болно. Бид яг л бие биендээ зориулагдаж төрсөн юм шиг санагдсан” гэж Америкийн мисс мэдэгджээ.
Гэхдээ Нана Гарриг 24 настай загвар өмсөгч Крессида Бонастай найзалж байгааг дуулаагүй бололтой. Ханхүү Лас-Вегаст “нүцгэн үдэшлэг” зохиож шуугиан тарьсны дараа томоотой байхыг ихэд хичээж байгаа бөгөөд найз бүсгүйгээ бүхий л талаар аргадах болсон.
Саяхан тэрбээр Крессидад чамин хийцийн үслэг гутал бэлэглэжээ. Туулайн үс оруулан илгээр хийсэн Канадын “Manitobah Mukluks” компанийн тэрхүү гутлыг Гарри 450 щвейцарь франкаар авсан аж. Гэхдээ тэр тооцоогоо еврогоор хийсэн бөгөөд дэлгүүрт байсан гэрчүүдийн ярьснаар 10 хувийн хямдралтай авсандаа сэтгэл их хангалуун байсан гэнэ. Дэлгүүрийн худалдагч “Ханхүү дэлгүүр хаахын өмнөхөн орж ирсэн. Тэгээд хямдралтай байгаа гэдгийг сонсоод их баярлаж байсан” гэж ярьжээ.
/Нийгмийн толь/