АНУ-ын ерөнхийлөгч Барак Обама Японд суух Америкийн Элчин сайдаар Кэролайн Кеннедиг санал болголоо.
Америкийн 35 дахь ерөнхийлөгч Жон Кеннедигийн охины нэрийг авч хэлэлцүүлэхээр лхагва гаригт Сенатад өргөн мэдүүлжээ. 55 настай Кэролайн Кеннеди нэртэй өмгөөлөгч бөгөөд бестселлер болсон хэд хэдэн номын зохиогч гэдгээрээ ихээхэн алдартай. Тэрбээр Барак Обамагийн ялалт байгуулсан ерөнхийлөгчийн сонгуулийн кампанит ажилд чухал үүрэг гүйцэтгэсэн юм.
Ардчилсан намынхан олонхи байдаг Сенат Кэролайн Кеннедигийн нэрийг дэмжсэнээр энэхүү алдартай гэр бүлээс АНУ-ын Элчин сайдын суудалд сууж буй гурав дахь гишүүн болох аж. Түүнээс өмнө Кэролайны өвөө Жозеф П.Кеннеди Франклин Рузвельтын үед Берлинд, Билл Клинтоныг ерөнхийлөгч байхад авга эгч Жин Кеннеди Ирландад элчингээр сууж байжээ.
Обама Кэролайн Кеннедиг Японд элчингээр томилохоор төлөвлөж байгаа тухай мэдээлэл бүр дөрөвдүгээр сарын эхээр цацагдаж байсан юм. Гэвч энэхүү мэдээллийг албан ёсоор батлаагүй. Мэргэжлийн дипломат биш боловч ерөнхийлөгчийн сонгуулийн өмнөх кампанит ажилд чухал үүрэг гүйцэтгэсэн хүмүүсийг элчингээр томилох нь АНУ-ын практикт ихээхэн дэлгэрчээ.
Жишээ нь Орост суугаа АНУ-ын Элчин сайд Майкл Макфол өмнө нь Төрийн департаментын ажилтан байсан аж.
Б.Мишээл
/Нийгмийн толь/
