Сая мэдээ уншлаа.
Монголын морин спорт, уяачдын холбооны санаачилгаар дэлхийд анх удаа 3000 морь уралдуулж, 10 мянган морьтон нэгэн дор жагсах гэж байна. Мөн 10 мянган морьтны жагсаалыг Монгол Улсын Ерөнхийлөгч, ММСУХ-ны тэргүүлэгч гишүүд, Монгол Улсын Тод манлай, Манлай, Алдарт уяачид манлайлан жагсч, дэлхийд дээд амжилт тогтоосноор оролцсон бүх хүмүүст Гиннесийн амжилтын батламж гардуулах гэнэ.
Карл Маркс аль 18-р зуунд “Германы идеологи” номондоо монголчуудыг, тэд бол Хөгжлийн анхдагч “примитив” үедээ явж байгаа үндэстэн гэж онож хэлсэн. Залхуу, тэнэг, арчаагүй, наргиж цэнгэх дуртай, ядуу хэвээрээ, өнөөдөр мөн л нялхаараа байгаа бидэнд. Үнэхээр тэр Гиннестээ бүртгүүлээд сая сая доллар аваад өөрийгөө өрөөл олонтойгоо тэжээчихдэг байсан бол, энэ нэр хүнд олох гэсэн өрөвдөлтэй арга тохирохсон.
Даан ч үгүй юм даа. Нэг ч доллар дагалдахгүй алга дарам батламжийг авахын төлөө хийрхэлд автан, гадныхны нүдээр бикини буюу усны хувцас өмссөн мэт өмсгөлтэй гүзээтэй эрчүүдээ олноор нь цуглуулж, бас үндэсний хувцастай хүмүүсээ талбайгаар алхуулж, бяцхан үрсээ өлсгөж, наранд шаруулан байж биелгээ бүжиглүүлэх гээд сэтгээд байна шүү дээ…6000 бөхийн барилдаан, Арван мянган тэмээн цуваа, 5000 биелээчид, удахгүй болох түмэн морины уралдаан. Гэмгүй хүүхдүүдийн амь л мулгуу насанд хүрэгчдийн галзуурлаас болж дахин үрэгдэх байхдаа.
Олон хүнийг хамарсан үйл ажиллагаа бүртгэгдэж “шагшруулдаг” юм бол. Яагаад тэрбум хүнтэй Энэтхэг, Хятад энэ Гиннесийн номонд орохгүй байна? Тэдэнд зуун сая шүтдэг үхрээ Ганга мөрний эрэгт угаачих, эсвэл хэдэн зуун сая хүнээ Цагаан хэрэм дагуу жагсаан, мантуу идүүлэхэд ядах юм байхгүй. Бүх учир нь манайх шиг өөр гажигтай улс орон энэ бөмбөрцөг дээр үнэндээ алга.
Бид ядуу орны хүмүүст ерөөсөө зохимжгүй энэ үзэл суртлыг Хэн, Яах гэж зориудаар гааруулаад байгааг анзаарах хэрэгтэй.
999 уртын дуучин дуулуулж Дэлхийн хамгийн бүдүүн эмэгтэйтэй мөн хамгийн урт хиртэй хумстай хүнтэй хамт энэ номонд хэвлүүлж “гайхуулснаар” Монгол улсын эдийн засаг сайжран, ядуурал багасан, өлсөж байгаа монгол хүүхэд цадах уу?
Үгүй… харин ингэж байгаа нь Үндэстний хэмжээний солиорол улам газар аван замбараагүй болж. Үүнийг санаатайгаар залах хэсэгхэн хүмүүс олныг яг манжийн үед шиг баяр наадам цэнгүүнээр хууран, массын эрүүл сэтгэхүйг үгүй болгож.
Улс оронд тулгамдсан гол чухал асуудлууд болох Бондын өр, Оюу Толгойн луйвар, Таван Толгойн зээл, Төгрөгийн үнэгүйдэл, үнэ өсөлт, хорт утаа, Авилгалын хэргүүдээс таны анхаарлын холдуулж.
Эрх мэдэлд ээлжлэх цөөн гэмт этгээд нөхөд энэ орныг бодлоготой мөхөөж байгааг [Үнэн үү? Эндээс ийм дүгнэлт гарах уу? – Нийтлэгч] харуулж байна.
Бид энэ номонд бичигдснээр хөгжих үү?! гэж Монгол хүн Та өөрөөсөө асуугаарай.
Ч.Өрлөг
