“Samsung” корпорац дуудлага хийж болдог, шаардлагатай тохиолдолд анхааруулга өгдөг зэрэг олон ид шидтэй өнгөт дэлгэцтэй ухаалаг цаг танилцуулсан байна. “Galaxy Gear” нэртэй энэ цаганд мэдээж гүйж, дасгал хийхэд хэрэглэдэг программууд ч бий гэнэ. Дэлхийн хамгийн их борлуулалттайгаар тодроод буй ухаалаг гар утасны компани ингэснээр мөн ухаалаг цаг гаргахаар зэхэж буй өрсөлдөгчид болох “Apple”, “Google”, “Microsoft”-ыг ардаа орхиж байгаа юм.
Тус компанийн хувьд гар утасны борлуулалт нь бага зэрэг удааширсантай холбоотойгоор ашиг орлогоо нэмэгдүүлэх шинэ арга зам хайж олсон нь энэ аж. Харин шинжээч нар энэхүү цагийг худалдаанд гаргаснаар “Samsung”-ийн бусад Galaxy Android бүтээгдэхүүний борлуулалтад сөргөөр нөлөөлнө хэмээн анхааруулж байна.
Берлинд болж буй шинэ технологийн шоуны үеэр танилцуулсан энэхүү ухаалаг цагийг энэ сарын 25-нд худалдаанд гаргах бөгөөд 299 ам.долларын үнэтэй байх аж. Ухаалаг цаг нь тийм ч шинэ санаа биш боловч өмнөх хувилбаруудтай харьцуулахад олон давуу талтайгаа дагаад илүү өндөр үнэтэй байгаа юм байна. Galaxy Gear цаг нь 1.6 инчийн LED дэлгэц, 1.9 мегапикселийн камер, чанга яригч, микрофонтой бөгөөд дөрвөн гигабайтын багтаамж, авч болдоггүй батерейтай юм байна.
Э.Наранбат
ЭХ СУРВАЛЖ: EAGLE TV