Зүрхний гүнээс гарсан дууны үг бүр нь хүмүүст бодол төрүүлж, хөг аялгуу нь сэтгэлд эгшиг нэмдэг гавьяат жүжигчин Ч.Амаржаргалыг “Яг одоо” буландаа зочноор урилаа. Хэдийгээр түүнд замбуулинг харах заяа дутсан ч хорвоо дэлхийг нүдээрээ биш сэтгэлээрээ тольдон уран бүтээлээ туурвидаг нь түүний дуунуудаас мэдрэгддэг билээ.
-Яг одоо та юу хийж байна вэ?
-Өнөөдөр удахгүй хийх гэж байгаа тоглолтынхоо талаар үзэгчдэд мэдээлэл өгнө. Тийм болохоор хувцсаа өмсөөд гэрээсээ гарах гэж байна.
-Энэ удаагийнх таны хэд дэх бие даасан тоглолт билээ?
-“Амин нүдэн” нэртэй 10 дахь бие даасан тоглолтоо энэ сарын 15,16-нд хийхээр бэлтгэж байна даа. Би 2011 онд “Сэтгэлд нуугдсан харц” нэртэй цомгоо гаргасныхаа дараа 21 аймгаар аялан тоглолт хийсэн. Түүний дараа Монгол Улсынхаа Ерөнхийлөгчөөс гавьяат жүжигчин хэмээх эрхэм цолыг хүртсэн юм. Энэ шагнал надад хийж бүтээх урам, аз жаргал өгсөн. “Амин нүдэн” тоглолтыг хийхээр болсон нь үүнтэй холбоотой. Урлагт 20 гаруй жил зүтгэсэн болохоор баяраа сонсогч, ард түмэнтэйгээ хуваалцахаар зүтгэсэн нь энэ юм.
-20 гаруй жилийн хугацаанд хэчнээн уран бүтээлийг өөрөөрөө овоглов доо?
-130 гаруй дуутай болжээ. Мөн хоёр хуурцаг, цомог гаргасан байна. Дуучид хүмүүсийн сэтгэлд хоногштол дуулсан уран бүтээлтэй байдаг. Миний хувьд “Амин нүдэн”, “Үггүй хайр” дуугаараа үзэгчдэд танигдаж, одоо хүртэл уран бүтээлээ хүргэсээр явна.
-Яг одоо ямар уран бүтээл сонсогчдодоо хүргэхээр ажиллаж байна вэ?
-Хамгийн сүүлд “Бурхан хайр” нэртэй дуу хийлээ. Ханьтайгаа хамтран дуулсан энэ дуу маань “Best FM”-ийн хит парадад гуравдугаар байрт явж байгаа. Нөхөр бид хоёр тоглолтоор явж байхдаа танилцаж, гэр бүл болсон. Хань маань миний дутууг гүйцээж, дундуурыг дүүргэж, нүд чих минь болдог. Хүний амьдралд янз бүрийн асуудал үүснэ. Тэр болгонд нөхөр маань түвэгшээлгүй дэмждэгт баярладаг юм.
-Таны уран бүтээлийн дийлэнх нь хайрын сэдэвтэй байх юм аа?
-Уран бүтээлийн маань 90 гаруй хувь нь хайрын сэдэвтэй байдаг. Хайр бол мөнхийн сэдэв. Хүн аав, ээжийнхээ хайранд өлгийдүүлж өсдөг. Тиймээс л энэ сэдэв надад хамгийн ойр санагддаг.
-1990-ээд оны дунд үед та орон нутгаар их аялан тоглодог байсан. Тэр үеийн дурсамжуудаасаа хуваалцаач?
-1987 оноос эхлэн “Аялгуу”хамтлагтайгаа хөдөөгөөр цахилгаан хөгжим тоглон явдаг байсан. Харин 1993 оноос бие даан уран бүтээл хийж 2-3 удаа эх орноо тойрсон. Гэхдээ энэ хугацаанд Баян-Өлгий аймагт очиж чадаагүй юм байна лээ. Очиж тоглох юмсан гэсэн бодол байдаг.
Б.СЭЛЭНГЭ
/Үнэн.мн/
